Ads by Google Ads by Google

Ulua’i au lakapi ta’ito’a 7 a Tama’ita’i mo Ta’aloga a le Pasefika


[ata: foa'i]
ausage@samoanews.com

Ua sauni atu nei le au lakapi ta’ito’a 7 a tama’ita’i e fai ma sui o Amerika Samoa i Taaloga a le Pasefika i Samoa i le masina fou. O se ulua’i au ta’ito’a 7 fa’avaomalo lenei mo le vaega o tama’ita’i ua filifilia e fai ma sui o le atunu’u i ni ta’aloga fa’avaomalo.

 

O le ‘au lakapi o le a ta’ita’ia e le Tama’ita’i Faiaoga ia Annielyse Coffin , ma le Sui Faiaoga ia Uini Taunuvasa. E to’a 13 sui o le au lakapi. O i latou ua filifilia e aofia ai sui tuai e to’afa, ma sui fou e to’a 9.

 

Na taua e le Faiaoga o le au tama’ita’i i le Samoa News e fa’apea, o tama’ita’i fou ua filifilia i le ‘au a tama’ita’i, o lo o aofia ai tama’ita’i se to’alua fa’atoa fa’au’u mai i Aoga Maualuluga i le masina lenei, faatasi ai ma se tama’ita’i e 17 tausaga le matua, ua mae’a ona tuuina mai le ioega a ona Matua e taalo ai.

 

Ua tele masina o tu’u fa’atasi mai le ‘au a le atunu’u e pei ona taua e Coffin, ma ua vaaia fo’i se suiga tele i le tulaga o a latou tapenaga. Na taua e Coffin e fa’apea, o se tasi o itu o lo o taumafai malosi pea e a’oa’oina i tama’ita’i, o le malamalama lea i le tulafono e fa’atautaia ai le ta’aloga i totonu o le malae.

 

“O le isi lea itu taua e tatau i soo se sui o le ‘au ona tapena i ai, ia malamalama i le tulafono o lo o fa’atautaia ai le ta’aloga, ma ia malamalama fo’i i gaioiga eseese e faia i totonu o le malae i soo se taimi a o fa’agasolo le ta’aloga,” o le saunoaga lea Coffin.

 

Ina ua fesiligia le tulaga ua i ai tapenaga a le ‘au mo Samoa, e pei o le tulaga i le malosi atoa ai ma le fa’atinoina o le ta’aloga, na taua e Coffin ua lava tapena le ‘au.

 

“Ua sauni le ‘au lakapi ta’ito’a 7 a tama’ita’i o le atunu’u e tausinio i Ta’aloga a le Pasefika, fa’atasi ai ma isi ‘au malolosi o le pasefika. O se avanoa taua lenei mo la tatou ‘au e fa’ailoa atu ai lo latou tomai ma le iloa i le ta’aloga lakapi”.

 

Na taua e Coffin e fa’apea, e le o i ai se fa’amoemoe e manumalo le ‘au a le atunu’u i se pine auro, ona o lea fa’atoa ofi atu i ta’amilosaga tetele fa’avaomalo. Ae o le itu taua e pei ona ia talanoa i sui o le ‘au, ia fa’aaoga lenei avanoa e atia’e ma fa’aleleia ai lo latou silafia i le ta’aloga.

 

“O lo o molimauina pea le mata’alia o le ‘au i le tele o taimi e fa’atino ai a latou koleniga. E le gata e naunau ina ia latou a’oa’oina se mea fou, ae fiafia fo’i e fa’aleleia le iloa i le ta’aloga,” o se tala lea a Coffin.

 

“O se avanoa lelei lenei e tausinio ai la tatou ma ‘au tetele a le Pasefika e pei o Samoa, Ausetalia ma Fiti, ina ia a’oa’oina mai ai se isi mea fou e fesoasoani ai mo a latou tapenaga i le lumana’i”.

 

Na maua le avanoa o le Samoa News e fesiligia ai le ali’i sa gafa ma le fa’atinoina o koleniga a le ‘au ta’ito’a 7 a tama’ita’i o le atunu’u, le susuga a Telasio Koroiadi.

 

O Koroiadi o se tagatanu’u o Fiti, ae ua silia i le 20 tausaga o aumau i Amerika Samoa ma lona aiga, ma ua tele fo’i kalapu lakapi i le atunu’u ua mafai ona ia fesoasoani ai.

 

Na taua e Koroiadi e fa’apea, o se tasi o fa’afitauli numera tasi o lo o fetaia’i ma Amerika Samoa i le ta’aloga lakapi, o le leai lea o ni ta’amilosaga e fa’agasolo ina ia mafai ai ona fa’amasani alii ma tama’ita’i taaalo i tulafono o le ta’aloga.

 

Sa ia taua atili fo’i lona faanaunauga o lo o i ai, i le fia faia lea o sana kalapu e atina’e ai le taaloga lakapi i totonu o le atunu’u.

 

“O le tele o taamilosaga e faagasolo i le atunu’u, o le lava fo’i lena o le taimi e mafai ai ona faaleleia le atina’e o le lakapi i le atunu’u,” o le saunoaga lea a Koroiadi.

 

O nisi o vaega sa ia taua sa faamamafa i ai koleniga mo le ‘au lakapi a tama’ita’i, o le faamasani lea i auala e taofi ai le polo i le latou itu, atoa ai ma le auala e mafai ai ona latou aveese mai le polo mai le isi ‘au i taimi o osofaiga.

 

Na taua e Koroiadi e faapea, e ui e le lelei atoatoa le tapenaga a le ua lakapi a tama’ita’i o le atunu’u, peita’i o le itu taua ua molimauina, o le naunau lea o tama’ita’i e faamasani i le taaloga ma a’o tulafono i auala e fa’atino ai le ta’aloga.

 

E 12 atunu’u o le Pasefika o le a tausinio i le ta’aloga lakapi ta’ito’a 7 i le masina fou i Apia. O le ta’amilosaga e faia i le aso 12-13 o Iulai, i le malae taalo o le Apia Park Stadium, mai le itula e 10:00 i le taeao seia oo i le itula e 6:00 i le afiafi.

 

O le ulua’i ta’aloga o le ta’amilosaga o le a taaalo ai Fiti ma Solomona i le itupa o tama’ita’i.

 

O le faatulagaina o pool mo le ta’amilosaga ta’ito’a 7 a ali’i ma tama’ita’i, o lo o fuafua lava i le faaiuga sa i ai ta’amilosaga ta’ito’a 7 a le lalolagi ma le Pasefika, e pei o le ta’amilosaga a le IRB lea e fa’agasolo i tausaga ta’itasi, o le taamilosaga a le Oceania Sevens Championship, faapea ai ma Taaloga Laiti a le Pasefika i le 2017.

 

I le vaega o tama’ita’i, o lo o aofia Amerika Samoa i le pool A fa’atasi ai ma Ausetalia, Samoa ma Niu Kaletonia. O le Pool B o lo o i ai Fiti, Papua Niu Kini, Nauru ma Solomona.

 

O le amataga o le masina o Iulai lea ua faamoemoe e amata gasolo ai loa le au malaga a Amerika Samoa mo ta’aloga a le Pasefika. E 3 vaiaso le umi o le a fa’agasolo ai nei ta’aloga i Samoa.

 

OFISA O LE AU LAKAPI A TAMA’ITA’I:

 

Faiaoga: Annielyse Coffin

 

Faiaoga Lagolago: Uini Tanuvasa

 

Faiaoga faia Koleniga: Telasio Koroiadi

 

Ta’ita’i Malaga: Teuila Fainu’ulelei

 

Foma’i: Fusiuta Laulu.