Ads by Google Ads by Google

Tuumalo le Fa’atonusili o le Ofisa o le AS-EPA ia Ameko Pato

Ua ufitia nei le faigamalo a Amerika Samoa, aemaise ai nu’u ma aiga i le ao pogisa, ona o le tuua fa’afuase’i o le malo e le sa avea ma Fa’atonusili o le Ofisa o le Puipuiga o le Siosiomaga a Amerika Samoa (AS-EPA), susuga Ameko Pato, i le fa’aiuga o le vaiaso ua te’a.

 

Na molimauina i luga o fesootaiga televavave (social media) le tele o uo ma aiga o le afioga i le ali’i Fa’atonusili, sa latou tusia ni fa’amatalaga fa’amafanafana ma upu aualofa, e fa’ailoa ai lagona ootia ma le fa’amomoiloto, ona o le motusia fa’afuase’i o le mafutaga ma lenei fo’i ta’ita’i o le atunu’u.

 

E talitonu le Samoa News, o se fa’alavelave fa’afuase’i i lona soifua maloloina, na mafua ai ona fa’anatinati atu Pato i le falema’i i Fagaalu i le Aso Sa ua te’a, mulimuli ane maliu ai lava o ia.

 

O le fonotaga  lona 40 a Vaega Eseese o le malo tele e talanoaina ai auala e puipuia ai le gaitalafale ma amu o lo o usuia i le Fale Laumei vaiaso nei ma le fa’amoemoe e mae’a i le aso, sa fa’amoemoe e maua ai le avanoa o Pato e feiloa’i ma fono ai ma ni isi o ta’ita’i o lo o malaga mai i lenei fonotaga, mo ni isi o mataupu taua e fa’atatau i le tautua a le Ofisa o le AS-EPA.

 

Na fa’ailoa aloaia e le afioga i le ali’i Senatoa ia Magalei Logovi’i i luma o le Senate i le vaiaso nei, le tuua fa’afuase’i o le malo e le afioga i le ali’i Fa’atonusili.

 

Na filifilia Pato e avea ma Fa’atonusili o le AS-EPA i le ulua’i taimi na tula’i mai ai le faigamalo a Lolo ma Lemanu i le 2013. O se tasi ua leva ona tautua i le galuega fa’a faiaoga, e malosi fo’i i le fa’alauiloaina o tulaga i le soifua maloloina e aofia ai le savali ma fa’amalositino ina ia fa’atoilalo ai le gasegase o le suka ma le toto maualuga.

 

Ia fa’amaise le Atua i le faletua ia Dr. Rose Makaiwi Pato ma le fanau ona o le tuua fa’afuase’i o le malo e le Tama o le aiga.