Ads by Google Ads by Google

Tu’uaia se ali’i i lona tau fa’amata’u i lona niece


[ata: SN]
ausage@samoanews.com

O le vaiaso na te’a nei na pu’e fa’apagota ai e Leoleo se ali’i ma molia i lona faia o ni uiga tau fa’amata’u i lona niece, e aofia ai lona folafola o le tatipi o ia i se naifi (tulou). Ua tuuaia nei e le malo ia David Te’o o Pago Pago i moliaga mama e 2 o le fa’atupu vevesi i nofoaga faitele, atoa ai ma le faia o ni gaioiga e ono lamatia ai le saogalemu o fanau e laiti i lalo o le tulafono.

 

O le aso Faraile o le vaiaso na te’a nei na tula’i ai Te’o i luma o le Fa’amasinoga Fa’aitumalo, ma ia teena ai tu’uaiga fa’asaga ia te ia. Na talia e le afioga i le ali’i Fa’amasino ia Fiti Sunia talosaga a loia ina ia tatala Te’o i tua e aunoa ma se tupe e totogi, i lalo o tuutuuga e ao ona ia usita’i i ai.

 

O ni isi o ia tuutuuga e aofia ai le fa’asa lea ona ia toe alu i le fale o lona niece na tula’i mai ai le fa’alavelave, fa’asa ona ia umia ni a’upega mata’utia pe na te toe faia ni gaioiga e fa’atupu ai le vevesi, a ia avea o ia ma tagata e usita’i i le tulafono ma auai i soo se taimi e valaau ai lana mataupu.

 

O le ali’i Loia Fautua lagolago ia Ryan Anderson o loo tula’i mo Te’o, ae o le tama’ita’i Loia Sili lagolago ia Bianca Lherisson o loo tula’i mo le itu a le malo i lenei mataupu.

 

O lenei mataupu na tofu atu i le Ofisa o Leoleo i Fagatogo, ina ua talosagaina e le tama’ita’i na a’afia se fesoasoani, e tusa ai o lona uncle na alu atu ma folafola le tatipiiina o i laua ma lona uso laititi i le naifi.

 

Na taua e le tama’ita’i na a’afia i Leoleo e fa’apea, na fa’ateia i laua ma lona uso laititi ao la pisi e tau tipi moa e fai ai le meaai, ae fa’afuase’i loa ona ulufale atu le ua molia ma laulauvavale atu ia te i laua, ma fesili atu poo le a lea mea ua latou faia ia te ia.

 

Na tali i ai le tama’ita’i na a’afia i lona uncle ma faapea atu i ai, e le malamalama i laua i le mataupu o loo talanoa atu ai o ia. O le mae’a ai o se tama’i vevesi e pei ona tula’i mai, na fa’atonu ai loa e le na a’afia lona uncle e alu ese ma le fale, manu e lei logoina Leoleo. Peita’i sa tali atu i ai lona uncle, o ia e le kea i ni Leoleo. O le mae’a ai o le mau folafolaga a le ua molia, na ia tuua ai loa le fale ma alu ese.

 

Na fa’ailoa e le tama’ita’i na a’afia i Leoleo e fa’apea, e le o se taimi muamua lenei ua faia ai e le ua molia uiga tau fa’afefe nei i le latou aiga. Sa ia taua le isi fo’i fa’alavelave na tula’i mai i se taimi e le i mamao atu, lea fo’i na telefoni atu ai lona uncle ia te ia ma fa’ailoa atu mea e lua e filifili i ai, o lona alu atu e fasi lona Tama, poo le fasioti uma o tagata o le latou aiga.

 

O le mae’a ai ona fa’amatala e le tama’ita’i na a’afia i Leoleo o le nofoaga o loo nofo ai lona uncle ma lona aiga, atoa ai ma le lanu o lana ta’avale, na aga’i atu ai loa Leoleo ma saili le ua molia.

 

Na taofi e Leoleo le ta’avale ina ua molimauina e tutusa lelei ma le lanu o le ta’avale lea na fa’ailoa ane e le molimau, ma latou fesiligia ai loa le ave ta’avale poo ai lona suafa, ae na fa’ailoa ane e le ave ta’avale, o ia o David Te’o.

 

Na taofia le ua molia ma auina atu loa i le Ofisa o Leoleo mo isi suesuega. Na taua e Leoleo e fa’apea, ao latou fesiligia le ua molia, sa fa’alogoina le manogi pia e sau mai lona tino.