Ads by Google Ads by Google

Tu’ua le malo pulesili Ofisa Fesootaiga a le malo (ASTCA)


O se va'aiga i le Aufaigaluega a le ASTCA, lea matagaluega sa tula'i ai le tofa Puleleiite Liamatua Tufele Jr. e ta'ita'i ma ua peseina fo'i i latou se tasi o pese o lona ulua'i sauniga i le EFKAS Lauli'i i le aso Faraile na te'a nei. [ata: Leua Aiono Frost]

O le saofaiga mamalu a le fa'aao o le Malo o Amerika Samoa, Kovana Lolo Moliga, le faletua Cynthia Malala Moliga, Faipule i le Konekeresi Aumua Amata ma le, Sui Kovana Lemanu Peleti Palepoi Mauga. [ata: Leua Aiono Frost]

Le Auauna a le Atua ua taita'i mai le solo mamalu e molita'i mai le Sa o lana susuga le CEO ASTCA Puleleiite Li'amatua Tufele Jr mo le amataga o le ulua'i sauniga mamalu o ona toe sauniga i le taeao o le aso Faraile na te'a, Iuni 1, 2018 i le EFKAS Laulii. [ata: Leua Aiono Frost]

O le uluai sauniga o toe sauniga fa'apitoa mo le pulesili o le Ofisa o Feso'ota'iga a le Malo (ASTCA), Pulele’iite Tufele Li’amatua Jr, na faia i le taeao o le aso Faraile ua te’a i le EFKAS Lauli’i.

 

O lea sauniga sa auai taitai ma sui o le malo, e aofia ai le afioga i le kovana sili, Lolo Moliga, ma lana Kapeneta.

 

"Ua tu'ua le tofi, peita'i e manatua pea galuega lelei sa ia faia. O lona taumafai fo'i e fa'atula'ia auaunaga lelei mo le lautele, sa ia faia lava i le malosi o totoe ia te ia e tautua ai, ma le atamai fo'i sa ia te ia e fa'atino ai ona tiute, fa'afetai mo lau auaunaga, Puleleiite,” o se tasi lea o saunoaga a Lolo.

 

E le gata ina sa avea fo'i o ia taiulu o lea matagaluega tele a le Malo, o sana toe tautua i le atunu'u ma lana faigamalo, ae sa mua'i avea fo'i o ia ma Faipule, o le itumalo o Sua i le Maota o Sui.

 

O ia fo'i o se tasi e faipisinisi tumaoti. O lo'o ia umia ma le pulega fa'atasi ma isi i le Breakers Point Inc., T&L Services Construction, Eastside Service Station ma le Paradise Pizza Restaurant and Catering Services.

 

"I lona soifua galue ai o le pule sili o le ASTCA, e lei leva lana lea tautua ae ua iloga ana mea ua mae'a faia mo lea matagaluega. E leai se mea e vili mai ai Puleleiite ia te a'u, ou te fa'anoanoa ai, na'o mea e fa'afiafiaina ai lava a'u, ona e fa'ailoa mai mea lelei ua mae'a tapena ma ua mae'a faia ia lelei,’ o le molimau lea a le kovana e tusa o le galue a Pulelei'ite.

 

Sa molimauina fo'i e le kovana, "E ui ina ua ou iloa lelei ua ma'i Pulele'i'ite, ae sa ou mana'o e tautua pea se'ia faaaoga ai lona malosi o totoe, aua o se tasi e faigaluega malosi, ma taumafai e fa'aleleia mea i lana matagaluega ma e fa'afiafialoto fo'i ala o lana tautua, e aumai lava na'o tala fiafia ia te a'u, e fa'aosofia ai le loto fiafia e galulue pea ma faia mea lelei e tautua ai le atunu'u."

 

O sana tala i le toe vala'au a Pulele'i'ite ia te ia, "O lana toe vala'au mai fo'i, o sa'u toe fa'alogo lea i lona leo, sa ia vala'au mai ai i le aso Tofi, ae Aso Faraile malolo. ‘Lau afioga le Kovana, ua mae'a faatulaga mea uma, ua lelei lava ta'ua, ua sauni mo le aso ua mae'a faatulaga o le Hawaiki’. O sana tala lea, na faigata ai ona talia e le mafaufau le toe vala'au atu a Lemanu i le ta o le 12:00, ua maliu o ia. E manatua pea o ia, ona o galuega lelei sa ia taumafai e fai, ma isi galuega fo'i ua mae'a fa'atino aua le tautuaina o le atunu'u, le malo ma ona tagata."

 

Ina ua mae'a le molimau a le Kovana sili, ona soso'o lea ma le masi'i fa'aaloalo a le Malo i le Tausiali'i Sinaita'aga Gaoteote - Tufele ma le pa'ia o Aiga. Na fa'auia atu le meaalofa tupe a le Malo, ona ua fa'ia se tasi mai le fuifui o le nofoa Fa'atonu ao galue pea, $20,000 ae maise fo'i o le meaalofa mai le vasega o tagata faigaluega i le ASTCA e $6,000.

 

O le isi molimau na soso'o ai na tapena i ai le Fofoga Fetalai o le Maota o Sui o le Fono Faitulafono Savali Talavou Ale, ae sa mua'i tolaulauina e le tama'ita'i Faipule Itumalo o Sua, Fialupe Felila Fiaui Lutu, le poloa'iga malilie fa'atasi a le Fono Faitulafono e taualoa ai le tautua matavela a le tofa Puleleiite i lona Malo, lana Ekalesia, Aiga, ma le atunu’u.

 

TALA'AGA O LONA SOIFUA

 

Na soifua mai Puleleiite i ona matua, le afioga Lealofioamoa Tufele Li'amatua mai Ta'u, Manu'a ma lona tina Tofiga Aulava Tufele mai Lauli'i Amerika Samoa, ia Fepuari 01, 1968. Na fa'aipoipo i le tama'ita'i o Sinaita'aga mai Vatia ia Novema 29, 1997.

 

E to'afa o la'ua alo, e to'atolu teine: Tofiga Princess Anastasia Tufele; Fa'alelegafulu Sinaita'aga Lady Jazmin Tufele ma Princess Toluselau Puleiite Tufele. To'atasi le aloali'i o Li'amatua lll Jr Maugasolo Tufele. E toatolu a la'ua fanau tausi: Fenunuivao Kamuta Ugapo, Tupouamoa Gaoteote ma Dalton Momo'epunoua'i Gaoteote.

 

E toatolu ona uso ae to'aiva ona tuafafine ua mae'a lisia suafa i le polokalama. Sa aoga ma fa’auu mai i le Marist High School (1983-1986).

 

O lana ulua'i galuega na faigaluega i le Manu'a Air Transport i Pago Pago  mai le tausaga e 1989 se'ia o'o i le 1990 ma sa faigaluega mai le Ofisa va'alele lea i le Manu'atele.

 

Suia lana galuega ina ua avea ma Faitelefoni Lipea ai telefoni a le Ofisa o Feso'ota'iga 1991 - 1992, ona si'itia lea o lana galuega i le Ofisa Ulu i Fagatogo ma ua avea pea ma Main Office Telephone Technician mai le 1992-1994.

 

Si'itia lona tulaga e galue ai ma avea ma IXC Supavaisa ASTCA mai le 1994-1999 ma ua avea fo'i o ia ma se tasi e fa'atula'ia ituaiga feso'ota'iga LUCENT 5ESS o le KI lea ua fa'aaogaina mo feso'ota'iga uma a le ASTCA.

 

Tula'i mai o se tasi o MSC-NSS Technician mo le Bluesky Communications 1999-2000 ma sa avea ma sui e fa'atula'ia le DMS-100 Tautua fa'auaealesi a lea Kamupani e pei ona i ai nei. Mai le tausaga 2000-2006 avea ai ma Switch Supavaisa a le Bluesky Communications. 2006-2008 avea loa ma Fa'atonu o le Network Operations Center - Bluesky.

 

Mai le tausaga 2008 i le 2013 avea ma Chief Technology Officer a le Bluesky, ma toe si'itia ai i le isi ona tulaga i lea lava Kamupani mai le 2013 - 2017 avea ai ma Senior Management Advisor.

 

Peita'i 2008 lava na avea ai ma faipule o lona Itumalo Sua Numera 2 i le Maota o Sui se'ia o'o mai i le 2017 fa'ato'a fa'amavae aloa'ia mai ai i lea tofiga. E fa'amavae o ia, ae lima lelei ana nofoa'iga na tautua ai i lona itumalo. 2017 lava na tofia ai e Kovana Lolo e avea ma pulesili o le ASTCA.

 

I lona aiga ua iloga fo'i lana tautua e ala i lona suafa matai "Pulele'i'ite" fa'apea ma lona auai i mea uma a le aiga o si ona tina, Aiga Sa Aulava. E le fa'avaivai fo'i ona tula'i mai e tautua aiga o si ona tama, a'o tau'avea le suafa le "afioga Le Alofioamoa Tufele."

 

I lana Ekalesia, EFKAS i Lauli'i, na avea ai ma Tiakono i le tausaga e 2002, ma ua maliu lava o tau'avea lea tofi.

 

O nisi o ana tautua lautele sa tofia ai e avea ma Sui i le Komiti Fa'afoe o le Faletupe ANZ Amerika Samoa Bank i le 2005-2010. Avea fo'i ma Peresetene o le Marist High School Boys Alumni 2008 se'ia o'o ina maliu nei.

 

O le tele o ona fa'ailoga ma tusi pasi uma ua fa'ailo ma tamau ai lona agava'a, e feso'ota'i uma ma le tofi Technician i Masini Tau Feso'ota'iga, lea ua talafeagai lava ona toe fa'ai'u mai i ai ona faiva, a'o le'i tu'ua le malo. Fa'amaise i le pa'ia o aiga loto fa'avauvau ona o le amia o le tama o le aiga.