Ua tuuina atu e Kovana Lolo Matalasi Moliga le tupe fa’asoasoa a le malo mo le tausaga tupe fou 2020 i lona aofaiga e $421.4miliona - e fa’aitiitia e tusa ma le $18.1miliona - nai le tausga tupe lenei 2019.

Ua fa’ailoa mai o le tupe e maua mai fa’alofoifale e $100.3miliona, ua silia mai le $98.6miliona i le tausaga tupe lenei.

O isi vaega tupe e fa’atupeina ai le tausaga tupe 2020 e aofia ai tupe Feterale $127.9 miliona; Tupe mai le Enterprises a le Malo $183.4 miliona ma le CIP e $9.7miliona.

O alagatupe maua a le Malo o le tausaga tupe fou:  Lafoga o totogi tagata faigaluega - $65.9miliona; Laisene ma Pemita $1.5miliona; Pili ma Fa’asalaga totogia $4.8miliona; totogi mo tautua matagaluega eseese $6.3miliona; ae o le paleni mai isi alagatupe.

I le malo lava latou i ona vaega uma ua aotelega ai le 4,825 tagata faigaluega tumau, ae to’a 4,986 mo le tausaga fa’aletupe 2019, o lona uiga ua pa’u mai lea faitauga. Peitai, ua si’itia le aofa’iga o tagata faigaluega fa’akonekarate i le 18%, lea na si’itia mai le 1,716 i le 2,017 i le tausaga fa’aletupe fou 2020.