Ads by Google Ads by Google

Tofu mataupu Lomu luma Fa’amasinoga Maualuga


[ata: SN]
ausage@samoanews.com

Ua tofu atu nei i luma o le Fa’amasinoga Maualuga mataupu tau solitulafono e 2 o lo o tu’uaia ai e le malo ia Merika Lomu, ina ua fa’amalieina le Fa’amasinoga Fa’aitumalo i mau sa tuuina atu e le itu a le malo, e lagolagoina ai le tagi ua latou faila fa’asaga i le ua molia.

 

E 2 tagi ua faila e le malo fa’asaga ia Lomu. I le tagi muamua, o loo tu’uaia ai o ia i moliaga mamafa e 4, lea e aofia ai le umia faasolitulafono o le pauta oona o le aisa ma le fa’amoemoe e tulei ma fa’atau atu i isi tagata; umia fa’asolitulafono o le pauta o le aisa; umia fa’asolitulafono o le fualaau faasaina o le mariuana ma le fa’amoemoe e tulei ma fa’atau atu i isi tagata, ma le umia fa’asolitulafono o le fualaau fa’asaina o le mariuana.

 

O ia moliaga na afua mai i se fa’alavelave na tula’i mai i le aso 15 Aperila, 2018.

 

I le tagi lona lua, o lo o tu’uaia ai fo’i e le malo ia Lomu i moliaga mamafa e fa. O ia moliaga e tutusa lelei lava ma moliaga o loo i le tagi muamua.

 

O ia moliaga na afua mai i se fa’alavelave na tula’i mai i le aso 15 Me, 2018, ina ua osofa’i e Leoleo mai le Vaega e Suesueina Fualaau Fa’asaina ni fale se 2 i Pago Pago, ma maua atu ai Lomu ma se isi ali’i i totonu o se potu o se tasi o fale, ma le anoano o vaega o fualaau fa’asaina e aofia ai ma mea e fa’aaoga e tagata e utu ma ula ai fualaau fa’asaina.

 

I le mae’a ai ona iloilo ma faitau e le afioga i le ali’i Fa’amasino ia Fiti Sunia o mau sa tuuina atu e le malo e lagolago ai tagi e 2 fa’asaga ia Lomu, na taua ai loa e le ali’i Fa’amasino le fa’amalieina o le fa’amasinoga i mau sa tuuina atu, e lagolago ai le tagi lona lua fa’asaga ia Lomu.

 

O moliaga uma i le tagi lona lua fa’asaga i le ua molia, ua tofu atu nei i le Fa’amasinoga Maualuga e fa’aauau ai.

 

Ae mo le tagi muamua, na solofua e le afioga a Sunia moliaga e 2 o le umia o le pauta faasaina o le aisa ma le fa’amoemoe e tulei atu i isi tagata, atoa ai ma le umia fa’asolitulafono o le pauta o le aisa, ina ua le mafai e le malo ona tuuina atu mau e lagolago ai le isi vaega o le latou tagi.

 

Ae mo moliaga e 2 o lo o totoe ai e fa’atatau i le umia faasolitulafono o mariuana, atoa ai ma le umia ma le fa’amoemoe e tulei ma fa’atau atu i si tagata, ua tofu atu nei ia moliaga i luma o le Fa’amasinoga Maualuga.

 

Lona uiga, mai moliaga mamafa e 8 o loo tu’uaia ai e le malo ia Lomu, e na o le 6 lea ua tofu atu i luma o le Fa’amasinoga Maualuga, ae o le isi 2 ua solofua e le Fa’amasinoga Fa’aitumalo.

 

O le tama’ita’i loia sili lagolago ia Christy Dunn o lo o tula’i mo le malo i lenei mataupu, ae o le ali’i loia ia Marcellus T. Uiagalelei o lo o tula’i mo Lomu, lea o lo o taofia pea i le toese se’i vagana ua totogi le $15,000 lea ua fa’atulaga ona fa’atoa mafai lea ona tatala o ia i tua.

 

E tasi le molimau a le malo na valaau i le ulua’i iloiloga sa faia i le aso Lulu o le vaiaso na te’a nei, o le susuga lea i le ali’i Leoleo sa fa’auluulu i ai le suesuega, Det. Justin Thomsen mai le Vaega e Suesueina Fualaau Fa’asaina.

 

Na taua e Thomsen e fa’apea, o le masina o Fepuari o le tausaga lenei na maua ai e Leoleo ni fa’amatalaga maumaututu i le a’afia ai lea o Lomu i le fa’atauina atu o fualaau fa’asaina, mai se molimau fa’atuatuaina lava.

 

Talu mai lea taimi, na amata ai loa ona galulue faatasi Leoleo ma le molimau fa’atuatuaina lenei, i le tu’u fa’atasia lea o fa’amatalaga e tusa ai o tu’uaiga fa’asaga ia Lomu, e pei o lona fa’atauina atu lea o fualaau fa’asaina, atoa ai ma le auai o ia i se pisinisi a se tagata e igoa ia Sio Godinet Jr o lo o tulei atu ai fualaau fa’asaina.

 

O le aso 15 Aperila 2018 na fa’atinoina ai e Leoleo se fa’atauga faapitoa, e ala i le tuuina atu o le $30 i le lima o le molimau fa’atuatuaina, ma aga’i atu ai lea molimau ma fa’atau mai fualaau fa’asaina mai ia Lomu.

 

I le aso o le fa’atauga, sa i ai Lomu fa’atasi ma Godinet Jr i totonu o le ta’avale a Godinet. Sa i ai fa’atasi fo’i ma isi tagata i totonu o le ta’avale i le aso lea. O fualaau fa’asaina o le mariuana na maua mai i le fa’atauga, na tuu atu e le molimau i Leoleo.

 

O le maua ai e Leoleo o mau fa’amaonia e lagolago ai gaioiga o lo o faia e Lomu, na latou talosagaina ai loa se poloaiga mai le Fa’amasinoga e su’e ai le fale o Godinet Jr i Pago Pago, lea o lo o masalomia o loo fa’amautu ai iina le la pisinisi ma Lomu, o le tulei ina atu lea o fualaau fa’asaina.

 

O le afiafi o le aso 15 Me, 2018 na osofa’i ai loa e Leoleo le faleo Godinet Jr i Pago Pago, ma maua atu ai Lomu ma le isi ali’i i totonu o se tama’i potu i le foga fale i lalo o le Fale Foga Falelua a Godinet Jr, fa’atasi ai ma le anoano o fualaau fa’asaina o le aisa ma le mariuana, atoa ai ma mea e fa’aaoga e utu ma fa’atau atu ai fualaau fa’asaina.

 

Na teena e Lomu moliaga fa’asaga ia te ia ina ua tula’i i luma o le fa’amasinoga maualuga i le aso Faraile na te’a nei.

 

O le aso 5 Oketopa lea ua fa’atulaga e toe tula’i ai o ia i luma o le fa’amasinoga maualuga, ma o lo o taofia pea o ia i le toese e fa’atali ai le aso o lana iloiloga.