Ua tofu atu nei i luma o le Fa’amasinoga Maualuga le tagi a le malo fa’asaga ia Togamamao J. Letulisagenoa, ina ua fa’amalieina le Fa’amasinoga Fa’aitumalo i le ulua’i iloiloga sa faia i le vaiaso  na te’a nei, o lo o i ai mau fa’amaonia e lagolagoina ai le tagi a le malo fa’asaga ia te ia.

O le taeao ananafi na tula’i ai Letuligasenoa i luma o le Faamasinoga Maualuga, ma ia teena ai le moliaga mamafa e tasi o loo tu’uaia ai o ia, le moliaga o le umia fa’asolitulafono o vaega o le laau fa’asaina o le mariuana.

O le masina o Ianuari o le tausaga fou lea ua fa’atulaga ai le ulua’i iloiloga a le ua molia i luma o le Fa’amasinoga Maualuga.

O le ali’i loia tua ia Marcellus T. Uiagalelei o loo tula’i mo Letuligasenoa, ae o le tama’ita’i loia sili lagolago ia Christy Dunn o loo tula’i mo le itu a le malo.

Ua tatalaina nei i tua le ua molia i le mae’a ai lea ona ia totogi i le $2,000, e fa’atalitali ai taualumaga o lana fa’amasinoga.

ULUA’I ILOILOGA

O le taeao o le aso Faraile o le vaiaso na te’a nei na faia ai le ulua’i iloiloga o lenei mataupu i luma o le afioga i le ali’i Fa’amasino ia Fiti Sunia, e saili ai e le fa’amasinoga pe lava mau fa’amaonia a le malo e mafai ai ona fa’amasinoina le tagi fa’asaga i le ali’i ua molia.

O le ali’i Leoleo Suesue ia Det. Jimmy Tagata na valaau e le malo e fai ma a latou molimau i le ulua’i iloiloga.

E pei ona taua e le malo i le latou tagi e fa’apea, o Letuligasenoa, o se tasi lea o pasese na malaga mai i le va’alele o le Hawaiian Air i le po o le aso 13 o Setema 2018. A o fa’agasolo siaki masani a le Ofisa o Tiute i le malae va’alele i Tafuna, na fa’ailoa mai ai e le masini e siaki ai uta mai fafo le i ai lea i totonu o le ato a le ua molia o ni vaega e fa’asaina.

Sa saili e sui o le Ofisa o Tiute le ato ma latou maua i ai ni fagu o loo i ai se suavai. I totonu o lea suavai o loo i ai elemeni e maua i le laau fa’asaina o le mariuana.

O le alia’e mai ai o lenei mataupu, na logoina ai loa e le Ofisa o Tiute le Ofisa o Leoleo, ma tofia ai loa le ali’i Leoleo Suesue ia Det. Tagata na te suesueina i lenei mataupu.

Na taua e Det. Tagata i lana molimau e fa’apea, o le aso 19 o Setema o le tausaga nei na logoina ai o ia e le Ofisa o Tiute mai le Malaevaalele, e fa’atatau i se mataupu e masalomia le a’afia ai o fualaau fa’asaina. O lea mataupu e pei ona taua e le molimau, e fa’atatau lea i le ali’i o Letuligasenoa lea na malaga mai i le va’alele o le Hawaiian Air i le po o le aso 13 o Setema, ma masalomia le maua i ai o vaega o fualaau fa’asaina.

E ui e lei i ai o ia i le malae va’alele i le taimi na aga’i mai ai Letuligasenoa, peita’i e tusa o fa’amatalaga sa tuuina atu e le sui o le Ofisa o Tiute ia te ia, na taua ai e Det. Tagata e fa’apea, na maua e sui o le Ofisa o Tiute ni mea faitino se 4 i totonu o le ato a le ua molia. O ia mea faitino e aofia ai ni fagu o loo i ai se suavai i totonu.

O lea suavai o loo i ai elemeni o loo maua i le laau fa’asaina o le mariuana.

Na taua e Det. Tagata e fa’apea, ina ua maua e sui o le Ofisa o Tiute mea molimau i totonu o le ato a le ua molia, sa faia ai loa se latou suesuega e tusa ai o mea sa maua.

Ina ua fesiligia Letuligasenoa i lenei mataupu, sa ia fa’ailoa ai i sui o le Ofisa o Tiute e fa’apea, o le suavai lea e i totonu o le fagu, e sasa’a muamua i totonu o le paipa ona fa’atoa ula ai lea.

Ina ua mae’a ona fesiligia Letuligasenoa e sui o le Ofisa o Tiute, sa fa’ailoa atu ai loa ia te ia, o le a taofia mea sa maua ia te ia, se’i saili muamua pe fa’ataga ona aumaia i totonu o le atunu’u nei ituaiga mea faitino.

Na taua fo’i e Det. Tagata le faailoa atu e le ua molia i sui o le Ofisa o Tiute, sa ia aumaia muamua fo’i mea nei i totonu o le teritori i se taimi ua mavaea, ae pe aisea fo’i e fa’asa ai i Amerika Samoa ae o lo o fa’ataga i le setete o Hawaii.

O le mae’a ai ona maua e Det. Tagata o fa’amatalaga mai sui o le Ofisa o Tiute e uiga i lenei mataupu, sa ia taumafai ai loa e saili ni fa’amaumauga e uiga i le ua molia. Sa ia aga’i atu i luga o le Ofisa o le Loia Sili ma aumai ai fa’amaumauga e tusa ai o faigamalaga a Letuligasenoa i fafo atu o Amerika Samoa.

I le faila sa ia mauaina mai i le Ofisa o le Loia Sili, lea o loo i ai lona suafa atoa ma lona ata, sa taua mai ai, o le po o le aso 10 o Setema 2018 na tuua ai e Letuligasenoa Amerika Samoa mo Hawaii, ae toe taliu mai o ia i Amerika Samoa i le po o le aso 13 o Setema, o le po lava fo’i lea na maua ai loa e sui o le Ofisa o Tiute vaega o fualaau fa’asaina i totonu o lana ato sa aumai.

O paipa e 4 sa maua i totonu o le ato a Letuligasenoa, lea e fa’aaoga e ula ai le mariuana i nisi o vaega o le Iunaite Setete, e tau le maua i Amerika Samoa nei, e pei ona taua e Det. Tagata i lana molimau.

O vaega sa maua i le ato a le ua molia, sa maua i ai se suega i le Ofisa o Leoleo, ma fa’amaonia ai i lea suega, o vaega nei o loo i ai le vailaau o loo maua i totonu o le laau fa’asaina o le mariuana.

Ina ua maua le avanoa o le itu tete’e e fesiligia ai le molimau, na fesiligia ai loa e Uiagalelei ia Det. Tagata, pe sa i ai o ia i le malae va’alele i le taimi na taunu’u mai ai Letuligasenoa i le teritori, na tali le molimau e leai.

Na toe fesili fo’i Uiagalelei i le molimau, pe sa maua sa’o lava i le tino o Letuligasenoa ni mariuana, na toe tali fo’i le molimau, e leai.

Sa toe fesili Uiagalelei i le molimau, pe sa ia sailia totonu o le ato a Letuligasenoa ma ia maua i ai vaega o fualaau fa’asaina, na tali le molimau, e leai.

I le fa’aiuga o fesili ma tali a Loia fa’asaga i le molimau, na finau ai loa le loia a le malo ina ia tuuina atu le mataupu a le ua molia i luma o le fa’amasinoga maualuga e fa’aauau ai lona fa’amasinoga. Na taua atili e le loia a le malo e fa’apea, ua lava ma totoe mau sa tuuina atu e lagolago ai le latou tagi fa’asaga ia Letuligasenoa.

Na tete’e Uiagalelei i le fa’afinauga a le malo. Sa ia taua e fa’apea, e leai ni vaega o le laau fa’asaina o le mariuana na maua i le tino o Letuligasenoa.

Saunoa le afioga a Sunia e fa’apea, ua manino i le molimau a le malo, o mea ia sa maua i le ato a le ua molia, o loo aofia ai le vailaau o loo maua i le laau fa’asaina o le mariuana.

Saunoa atili fo’i Sunia e fa’apea, i lalo o le tulafono, o loo manino mai ai e fa’apea, e le faatagaina ona umia fualaau fa’asaina, e aofia ai ma isi ituaiga elemeni e maua i totonu o fualaau fa’asaina.