Ads by Google Ads by Google

Tofu le mataupu a Alesana Tipi i luma o le Fa’amasinoga Maualuga


[ata: SN]
ausage@samoanews.com

Ua tofu atu nei i luma o le Fa’amasinoga Maualuga le mataupu o lo o tu’uaia ai e le malo le susuga a Alesana Tipi i lona umia fa’asolitulafono o fualaau fa’asaina, ina ua mae’a le ulua’i iloiloga sa faia i le vaiaso nei, ma faamalieina ai le Fa’amasinoga Fa’aitumalo i le atoatoa lea o mau sa folasia e le malo e lagolago ai le latou tagi ua fa’aulu fa’asaga i lenei ali’i.

 

O le taeao ananafi na tula’i ai Tipi i luma o le Fa’amasinoga Maualuga, ma ia teena ai moliaga mamafa e 2 ua faia fa’asaga ia te ia. O ia moliaga e aofia ai lona umia faasolitulafono o vaega o le pauta fa’asaina o le aisa ma le fa’amoemoe e tulei ma fa’atau atu i isi tagata; faapea ai ma le moliaga o lona umia faasolitulafono o vaega o le pauta faasaina o le aisa.

 

O le masina fou o Aokuso lea ua fa’atulaga e faia ai le ulua’i iloiloga o le mataupu a Tipi i luma o le Fa’amasinoga Maualuga, ma ua fautuaina o ia e le fa’amasinoga ina ia tausisi pea i tuutuuga o lo o tatala ai o ia i tua, i le mae’a ai lea ona ia totogi o le tupe e $5,000 sa fa’atulagae le faamasinoga.

 

O le aso Lua o le vaiaso nei na fa’ataunuuina ai le ulua’i iloiloga o lenei mataupu i luma o le afioga i le alii Fa’amasino ia Elvis P. Patea i le Fa’amasinoga Fa’aitumalo.

 

O le ali’i loia tua ia Marcellus Talaimalo Uiagalelei sa tula’i mo Tipi, ae o le tama’ita’i Loia Sili lagolago ia Christy Dunn na tula’i mo le malo.

 

E to’atasi le molimau na valaau e le malo o le susuga lea i le ali’i Leoleo ia Tavake Foma’i.

 

Na taua e Foma’i i lana molimau e fa’apea, o le mataupu e pei ona molia ai Tipi, na afua mai i se taumafaiga a Leoleo Suesue e fa’atino se gaioiga faapitoa, e ala i le fa’aaoga lea o se molimau faatuatuaina a Leoleo na te fa’atauina mai fualaau fa’asaina mai lenei ali’i.

 

O le va o le aso 21 o Aperila ma le aso 10 o Me 2019 sa fa’atinoina ai e Leoleo lea gaioiga faapitoa i Vaitogi i le nofoaga o loo aumau ai le ua molia.

 

O lea gaioiga ina ia fa’aaoga se tagata na te fa’atauina mai fualaau fa’asaina mai ia Tipi, na faia lea ina ua tele fa’amatalaga ma ripoti na maua e Leoleo, e fa’atatau i se pisinisi o loo a’afia ai lenei alii’i, i le fa’atauina atu lea o fualaau fa’asaina mai lona fale i Vaitogi.

 

O ia fa’amatalaga e pei ona taua e Foma’i i lana molimau, sa taua ai e tagata e fa’apea, o lo o i ai se alii i Vaitogi e suafa ia “SULU” o lo o ia fa’atauina fualaau fa’asaina i tagata lautele.

 

O le susuga a “SULU”, o le igoa valaau lea a le susuga a Tipi ua lauiloa ai o ia e le to’atele o tagata latou te fa’atauina fualaau fa’asaina.

 

O le tagata na fa’aaoga e Leoleo na te fa’atauina mai fualaau fa’asaina mai ia Tipi, o se tagata e masani ona ia fa’atauina mai fualaau fa’asaina mai ia Tipi.

 

I le aso na faatino ai e Leoleo le gaioiga o le fa’atauina mai o fualaau fa’asaina mai ia Tipi, na tuu atu ai e Leoleo le $30 i le molimau fa’atuatuaina lea ma le faamoemoe e fa’atau mai ai fualaau fa’asaina.

 

A o le i aga’i atu le molimau fa’atuatuaina e fa’atau mai fualaau fa’asaina, na muamua vili e Leoleo le telefoni a Tipi ae talanoa i ai le molimau fa’atuatuaina, ma fa’ailoa i ai le manaoga mo le fia fa’atauina mai o ni fualaau fa’asaina o le aisa.

 

Sa fa’aleotele e Leoleo le sipika o le telefoni ina ia mafai ai ona lagona talanoaga a le molimau fa’atuatuaina ma Tipi.

 

Na tali mai e le tagata le telefoni ma fa’ailoa mai, o lona igoa o SULU. O SULU, o le igoa valaau lea a Tipi.

 

Na faailoa e le molimau fa’atuatuaina ia Tipi lona mana’o e fia fa’atau mai ni ana fualaau fa’asaina o le aisa i le tau e $30. Na ioe Tipi i le talosaga, peita’i sa ia fa’ailoa mai i le molimau fa’atuatuaina i luga o le telefoni, o ia o loo i luga o le mauga o Logotala i le taimi lea, ae mana’omia lona toe fo’i i lona fale i Vaitogi e toe fa’atumu mai lana sapalai o fualaau fa’asaina, ina ia mafai ai ona maua le fa’atau o loo ia mana’o i ai.

 

A o le i aga’i atu le molimau faatuatuaina a Leoleo mo le fa’ataunu’uina o le fa’atau, na muamua siaki e Leoleo lona tino ma lana ta’avale ina ia mautinoa e le o i ai ni fualaau fa’asaina.

 

I le taimi na fa’atinoina ai le fa’atau faapitoa, sa molimauina e ni Leoleo se to’alua mai totonu o se ta’avale faapitoa sa la nonofo mai ai.

 

Na taua e Foma’i i lana molimau lo la molimauina ma le ali’i Leoleo Suesue ia Det. Justin Thomsen o le taimi na tu ai le ta’avale a Tipi, ma vaaia ai le oso mai o Tipi i fafo ma savali atu i le ta’avale a le molimau fa’apitoa.

 

Sa la vaaia fo’i le taimi na tu’u atu ai e Tipi le pepa iila o lo o i ai vaega o le pauta o le aisa, ma le taimi na tuu atu ai e le molimau faapitoa le tupe i le lima o Tipi.

 

Ina ua mae’a le fa’atinoina o le fa’atau, sa toe fo’i loa le molimau faapitoa i le nofoaga lea ua mae’a ona fa’atulaga latou te toe feiloa’i ai ma Leoleo, ma tauaao atu loa e le molimau faapitoa le pepa iila o lo o i ai le pauta o le aisa i Leoleo.

 

O le tauaaoina ai e Leoleo o pepa o lo o i ai le aisa i totonu, na saunia ai loa sa latou ripoti mo le talosagaina o se poloaiga mai le fa’amasinoga e sailia ai le fale o Tipi i Vaitogi.

 

Na taua e Foma’i e fa’apea, pe tusa o se vaiaso talu ona tuana’i le gaioiga sa fa’atinoina ai le faatau fa’apitoa, ae faatinoina loa e Leoleo le poloaiga a le fa’amasinoga e sailia ai le fale o Tipi i Vaitogi.

 

I lea osofaiga, sa maua i ai fualaau fa’asaina o le mariuana, o se tinoitupe, faapea ai ma le tele o pepa iila e fa’aaoga e utu ai le pauta o la aisa.

 

O se tasi o itu na fesiligia ai e le loia a Tipi le molimau a le malo, o le igoa o le latou molimau fa’atuatuaina lea na fa’aaoga na te faia le fa’atau, peita’i o lea fesili sa lei mafai ona taliina e le molimau, ina ua talia e le afioga i le ali’i Fa’amasino ia Patea le fa’atuiese a le malo.

 

Saunoa Patea e fa’apea, e le taua i le fa’amasinoga poo ai le igoa o le molimau fa’atuatuaina a Leoleo, pau le itu e taua i le fa’amasinoga e tusa ai ma le ulua’i iloiloga lenei, o le fia iloa lea pe lava mau a le malo e lagolagoina ai le latou tagi fa’asaga ia Tipi.