Ads by Google Ads by Google

Tofu atu le mataupu a Sione Lui i luma o le Fa’amasinoga Maualuga

ausage@samoanews.com

Ua tofu atu nei i luma o le Fa’amasinoga Maualuga le mataupu i le va o le malo o Amerika Samoa ma Sione Lui, i le mae’a ai lea o le ulua’i iloiloga sa faia i le vaiaso na te’a nei, ma faia ai le faaiuga a le afioga i le ali’i Fa’amasino ia Elvis P. Patea, e tuuina atu ai lenei mataupu e fa’aauau lona iloiloina i luma o le Fa’amasinoga Maualuga.

 

O le ulua’i iloiloga sa faia i le vaiaso na te’a nei, na iloilo ai e le Fa’amasinoga mau folasia a le malo, pe lava ma totoe a latou mau e lagolagoina ai le solitulafono sa fa’atinoina, ae pe lava fo’i ma totoe ia mau e lagolagoina ai, o Lui o lo o tu’uaia i le soliina o le tulafono.

 

Ina ua mae’a ona fa’afofoga le Fa’amasinoga i mau folasia a le malo, na saunoa ai loa Patea e fa’apea, ua faamalieina le Fa’amasinoga i mau sa folasia e le malo, ua lava ma totoe a lagolagoina ai le latou tagi ua faia fa’asaga i le ali’i ua molia.

 

O le taeao ananafi na tula’i ai Lui i luma o le Fa’amasinoga Maualuga, ma ia teena ai tu’uaiga fa’asaga ia te ia.

 

O le masina fou o Setema lea ua faatulaga e faia ai lana ulua’i iloiloga i luma o le afioga i le ali’i Fa’amasino Sili lagolago ia Fiti A. Sunia.

 

Ae i le ulua’i iloiloga sa faia i le vaiaso na te’a nei i luma o le afioga i le ali’i Fa’amasino ia Patea, e to’alua molimau na valaauina mo lea iloiloga.

 

O le susuga i le ali’i Leoleo Suesue sa molimau mo le malo, le susuga ia Det. Motu Tafaovale, faapea ai ma le Tama o le ali’i ua molia, lea sa valaau e molimau mo le itu tete’e.

 

O le tama’ita’i Loia Sili lagolago ia Christy Dunn na tula’i mo le itu a le malo i lea iloiloga, ae o le tama’ita’i Loia Fautua lagolago ia Anna Whiles sa tula’i mo Sui, lea o lo o taofia pea i le toese i Tafuna, se’i vagana ua totogi le $10,000 ua fa’atulaga e le Fa’amasinoga ona fa’atoa mafai lea ona tatala o ia i tua.

 

E 2 moliaga mamafa o lo o tu’uaia ai e le malo le susuga a Lui. O ia moliaga e aofia ai lona umia fa’asolitulafono o vaega o le pauta fa’asaina o le aisa ma le fa’amoemoe e tula’i ma fa’atau atu i isi tagata, atoa ai ma lona umia fa’asolitulafono o le pauta o le aisa.

 

O ia solitulafono mamafa, e mafai ona fa’asala ai se tasi i le toese mo le umi e le sili atu ma le 20 tausaga, pe fa’asala fo’i i le salatupe e le silia i le $20,000.

 

O lo o taua e le malo i le latou tagi e fa’apea, o le po o le aso 19 o Me 2019 na aga’i atu ai Lui ma ni ali’i se to’alua i se ta’avale e momoli se pusa vai i le toese i Tafuna. I totonu o lea pusa vai sa maua i ai ni straw e ta tipi tulimanu o lo o i ai vaega o le pauta fa’asaina o le aisa.

 

O molimau sa fesiligia e Leoleo i le latou suesuega sa latou faamaonia mai, o Lui lea na ia kilivaina atu le pusa vai sa maua i ai vaega o fualaau fa’asaina, peita’i na tete’e malosi i ai le itu a Lui.

 

Sa finau le itu a Lui i le fa’amasinoga e fa’apea, o Lui sa i ai ma lona Tama i le nofoaga e faigaluega ai lona Tama o se Leoleo, i le faleaoga a le South Pacific Academy (SPA) i Tafuna.

 

Na taua e le ali’i Leoleo sa molimau mo le itu a le malo e fa’apea, e to’atele molimau sa mafai ona ia fesiligia i le taimi o le suesuega. O nisi o nei molimau e aofia ai ali’i e to’alua sa malaga ma Lui i le ta’avale e momoli le pusa vai, faapea ai ma tama’ita’i Leoleo sa tiute i le lotoa a le Toese i Tafuna i le taimi na taunu’u atu ai le pusa vai.

 

Na taua e le ali’i Leoleo e faapea, pe tusa o le te’a laititi o le 8:00 i le po o le aso 19 o Me o le tausaga nei, na aga’i atu ai ni ali’i se to’alua ma piki mai Lui mai luma o se Fale’aiga e le mamao ese mai le nofoaga e Leoleopo ai lona Tama i le SPA, ma latou aga’i atu ai loa e momoli le pusa vai i le nofoaga o le Toese i Tafuna.

 

A o aga’i atu le ta’avale i le nofoaga o le Toese, na taua e le isi ali’i i Leoleo lona vaaia o Lui o loo taumafai e sagole se mea i totonu o le pusa vai. Na te lei manatu mamafa i ai i gaioiga a Lui, ae ana le alia’e mai lava le mataupu i fualaau fa’asaina, e le toe tau lona mafaufau i gaioiga a Lui sa faia i le pusa vai a o alu le ta’avale.

 

Na taua fo’i e le isi molimau mai le Toese i Tafuna, lona maitauina lelei o le tagata na alu atu e momoli atu le pusa vai, o le susuga lea ia Lui.

 

Na fesili le loia a Lui i le ali’i Leoleo, pe sa ia suesueina Lui e uiga i lenei mataupu, ae pe sa maua ai fo’i ni fualaau fa’asaina i lona tino. Na tali le molimau, sa ia fesiligia Lui, peita’i na te le i mauaina ai ni fualaau fa’asaina i lona tino.

 

Ina ua mae’a le molimau a le malo, na tula’i ai loa le molimau a le itu tete’e mo le folasia o lana fa’amatalaga. Na taua e le Tama a Lui i lana molimau e fa’apea, o ia e galue o se Leoleopo i le lotoa a le SPA i Tafuna.

 

O le tele o po e aofia ai ma le po o le aso 19 o Me o le tausaga nei, latou te o uma ai ma lona to’alua ma lana fanau e aofia ai Lui i le lotoa o loo faigaluega ai, faatoa latou toe to’i ese mai lava i le nofoaga i le vaveao pe a manava lana galuega.

 

O le galuega a le Tama o Lui, e amata i le 9:00 i le po ae manava i le 5:00 i le taeao o aso uma lava.

 

I le po o le aso e pei ona taua, na taua ai e le Tama lo latou aga’i atu i le latou ta’avale i le lotoa a le SPA pe tusa o le 8:30 i le po lea ma latou taunuu ai loa i le lotoa. I le taimi atoa lea, e le i toe alu ese lava lona atali’i mai le lotoa a le aoga, ae sa latou i ai pea lava seia oo i le taimi na mavana ai lana galuega.

 

I faafinauga faai’u a Loia, na finau ai le loia a Lui e fa’apea, e foliga mai e le o sa’o le molimau a le malo. O lea e finau mai o le ta o le 8 na piki ai e ali’i e to’alua ia Lui, ae tusa ai ma le fa’amatala a le Tama o Lui, o le taimi lea na latou tuua ai lo latou fale ae aga’i ane i le latou ta’avale i le lotoa a le SPA mo lana galuega.

 

Na taua e Patea i lana faaiuga e fa’apea, o le tiute o le Vaega Iloilo iuga, o le latou iloiloina lea o mau faamaonia ina ia mafai ai ona iloa poo fea tonu mau latou te talia ma talitonu i ai.

 

Saunoa atili Patea e fa’apea, tusa lava e eseese faamatalaga a molimau a itu e 2 e uiga i lenei mataupu, e le taofia ai le faaiuga a le Faamasinoga, o le tuuina atu lea o le mataupu lenei e faamasinoina i luma o se Vaega Iloilo iuga.