Ua tofia e le Failautusi o le Matagaluega o le Initeria a le malo fetarale, le afioga i le Fa’amasino ia Fiti Alexander Sunia, o le Fa’amasinoga Fa’aitumalo, e avea ma fa’amasino sili lagolago (Associate Justice) fou o le Fa’amasinoga Maualuga a Amerika Samoa.

O lea tofiga fou mo Sunia sa faamaonia mai e le Ofisa o le Kovana i le aoauli o le aso Faraile o le vaiaso ua te’a.

Ua fai ona sina leva tausaga o avanoa pea le tofi o le Fa’amasino Sili Lagolago, ina ua litaea Lyle Richmond, lea sa avea lea tofiga mo le tele o tausaga ua mavae. Ma e silia ma le 24 masina, o lo’o tauave ina e le afioga i le Fa’amasino Fa’aitumalo ia Elvis P. Patea, le tofiga, o le sui Faamasino sili Lagolago, e pei ona tofia ai o ia e le Failautusi o le Initeria, ae fa’atalia ai le tofiga o se fa’amasino lagolago tumau e sui tulaga ia Richmond.

E pei ona manino mai i le fa’avae o Amerika Samoa ae maise tulafono a le malo, o le tofi Fa’amasino Sili ma le Fa’amasino Sili Lagolago o le Fa’amasinoga Mauluga a Amerika Samoa e tofia e le Failautusi o le Initeria. Ma o ia tofiga e lua e fa’atupeina o la totogi e le Matagaluega o le Initeria ma o i laua foi ia o tagata faigaluga a le malo fetarale.

O le aoauli o le aso Faraile o le vaiaso ua te’a sa fa’ailoa mai ai e Iulogologo Joseph Pereira, o se sui sinia o le Ofisa o le Kovana, e fa’apea o le taeao o lea lava aso, sa maua e le afioga i le Kovana Sili, Lolo Matalasi Moliga, tusitusiga mai le Matagaluega o le Initeria ua ma’ea tofia o Fiti Sunia e avea ma Fa’amasino Sili Lagolago.

E le’i mafai ona fa’amonia e le Samoa News i le aso ananafi pe o afea e fa’atautoina ai Sunia, e 57-tausaga o lona soifuaga, mo lona tofiga fou i le Fa’amasinoga Maualuaga a Amerika Samoa.

E pei ona lipotia e le Samoa News i le lua tausaga ua te’a, o le masina o Ianuari i le tausaga e 2016 sa fa’amaonia ai e le Maota Maualuga a le Senate ia Sunia e avea ma Fa’amasino i le Fa’amasinoga Fa’aitumalo. Ae le’i tulai mea i lea tulaga sa avea o ia ma fa’amasino le tumau (judge pro tempore) mo le Fa’amasinoga Fa’aitumalo.

O tusitusiga ma fa’amaumauga mai le Ofisa o le Kovana sa tuuina atu i le Maota Maugaluga ia Ianuari 2016 o lo’o fa’ailoa ai aoga ma galuega a Sunia. O le tikeri o le Juris Doctroate a Sunia sa maua mai i le Aoga Loia a le Iunivesite o Howard i le laumua i Uosinotone D.C. ma o lo’o avea o ia ma totino o le fa’alapotopotoga a loia i le Washington D.C., le setete Pennsylvania, ma Amerika Samoa.

Ua le gata i lea sa galue Sunia o se loia i le tele o tausaga i le laumua Washington D.C. ae le’i toe foi mai i Amerika Samoa i le tausaga e 1997 ma galue i le Ofisa o le Loia Sili. O tolu tausaga o avea o ia ma Loia Sili o Amerika Samoa. Ina ua maea lea tofiga o le loia sili sa faia ai loa lona ofisa loia i le 2005 se ia o’o i le vaitau na tofia ai o ia ma fa’amaonia e le Maota Maualuga e avea ma fa’amasino o le Fa’amasinoga Fa’aitumalo.

O le masina o Iulai i le tausaga ua te’a, 2018, sa fa’alauiloa ai e le afioga i le kovana sili e fa’apea ua ma’ea ona logoina lona ofisa e le Matagaluega o le Interia le fa’alauaiteleina o le avanoa o le Fa’amasino Sili Lagolago ina mafai ona fa’afaigaluegaina ai se tasi.

Sa muamua ona talosaga e le kovana le Matagaluega o le Initeria mo le fa’atumuina o le tofiga o le Fa’amasino Sili Lagolago ona o le tele o mataupu o lo’o taoto i luma o le Fa’amasinoga Maualuga. Ma o lo’o ma’omia e le Fa’amasinoga Maualuga le fesoasoasoani.