Ads by Google Ads by Google

Toe tula’i fo’i i luma Fa’amasinoga le ali’i na ta’usala i le gaoi

ausage@samoanews.com

O le vaiaso nei lea na toe tula’i ai i luma o le Fa’amasinoga Maualuga se ali’i talavou ua ta’usala e le fa’amasinoga i le 6 tausaga talu ai i moliaga o le gaoi ma le talepe fale, ona o isi fo’i tu’uaiga o le gaoi ma le talepe fale e pei ona ta’usala ai o ia e le fa’amasinoga.

 

O le aso Faraile na te’a nei na fa’atulaga e lau ai le fa’asalaga a Ioane Faimata i luma o le afioga i le ali’i Fa’amasino sili ia Michael Kruse, ona o le fa’alavelave lea na ta’usala ai o ia i le moliaga o le gaoi ma le talepe fale, lea na ia gaoia ai ni oloa e silia i le $9,600 lo latou tau pe a fa’atupe mai se faleoloa Asia.

 

Ae talu ai e lei maua se avanoa o ali’i Fa’amasino e faitau ai i le ripoti a le Ofisa Faanofovaavaaia, na mafua ai loa ona toe tolopo le lauina o le fa’asalaga a Faimata seia aulia le vaiaso fou.

 

O le aso Gafua o le vaiaso nei na tula’i ai loa Faimata i luma o le afioga i le ali’i Fa’amasino sili lagolago ia Elvis P. Patea, ona o se tusi saisai na saini e le fa’amasinoga e loka ai o ia, e mafua mai i lona le usitaia o tuutuuga o lana nofovaavaaia sa tuuina atu i le 2012.

 

O le masina na te’a nei na faamoemoe e tuuina atu ai le kopi o le tusi saisai ia Faimata, peita’i e saili atu Faimata ua sola ese mai le falepuipu sa taofia ai i Fagatogo. Na mafua ona sola i tua le ua molia mai le falepuipui, ona o se inugapia sa faia ma isi ali’i pagota e to’afa o loo taofia ai, lea na tula’i mai ai se fusuaga i le va o ali’i pagota ma i’u ina sola ese ai loa Faimata.

 

O le vaiaso na te’a nei na fa’atoa maua ai e Leoleo ia Faimata ma toe taofia ai loa o ia i le falepuipui i Fagatogo, ma tula’i ai loa o ia i luma o le fa’amasinoga i le taeao o le aso Gafua o le vaiaso nei.

 

Ina ua valaau lana mataupu, na talosaga le loia a Faimata ia Michael White ina ia fa’atulaga se aso e faia ai le ulua’i iloiloga o lenei mataupu. O le aso 7 o Ianuari o le tausaga fou lea ua fa’atulaga e toe valaau ai le mataupu a Faimata i luma o le fa’amasinoga.

 

O tu’uaiga fa’asaga ia Faimata, o lona le usitaia lea o tuutuuga o lana nofovaavaaia sa tuuina atu i le 2012, ina ua ta’usala e le fa’amasinoga o ia i le moliaga o le gaoi ma le talepe fale.

 

MATAUPU O LE 2012

 

E 7 tausaga na faanofovaavaaia ai Faimata e le fa’amasinoga i le 2012, ina ua ta’usala o ia i le moliaga o le gaoi ma le talepe fale. O ni isi o tuutuuga o lana nofovaavaaia, o lona tuliina lea o masina e 28 i le toese i Tafuna, atoa ai ma le fautuaina lea o ia e aua ne’i ona toe solia se tulafono.

 

O le 2010 na osofa’i ai e Faimata ma isi ali’i se faleoloa Asia i Pava’ia’i ma latou ave faagaoi ai ni oloa e silia ma le $600 le tau, faapea ai ma se tinoitupe e $1,050.

 

MATAUPU O LE 2017

 

O le tausaga na te’a nei na molia ai fo’i e le malo ia Faimata i le moliaga o le gaoi ma le talepe fale, o moliaga fo’i ia e lua o lea ua ta’usala ai o ia e le fa’amasinoga. I le tali ioe ai o Faimata i moliaga mamafa ia e lua na ia taua ai e fa’apea, i le aso 10 o Novema 2017,

 

Na maua atu e le aufaigaluega a le faleoloa o le Pacific Mini Mart ia Faimata o loo ia gaoia oloa mai totonu o le faleoloa, ma latou saisai ai loa o ia e fa’atali ai le taunu’u ane o Leoleo.

 

Na faailoa e Faimata i Leoleo e fa’apea, o latou ma isi ali’i na taupulepule e gaoi oloa mai le faleoloa, lea e tusa ma le $9,600 le tau o oloa sa latou gaoia.

 

O loo taofia pea Faimata i le toese e fa’atali ai le aso e toe tula’i ai i luma o le fa’amasinoga maualuga.