Ads by Google Ads by Google

Toe tolopo palota Senate i le eseese o fuainumera o loo i totonu Pili


[ata: foa'i]
ausage@samoanews.com

Ua toe tolopo e le Senate lana palota mulimuli i le pili e fa’atulafono ai laisene ave ta’avale i Amerika Samoa, ina ua maua mulimuli ane e i ai fuainumera o loo i totonu o le pili e le o tutusa ai le gagana fa’aperetania ma le gagana Samoa.

 

O le pili na talosagaina e le faigamalo a Lolo ma Lemanu, ma ui mai ai i le maota o sui. O le mae’a ai ona pasia e le maota o sui o le pili i le faitauga fa’atolu, na tu’uina mai ai loa i le Senate mo sa latou fa’aiuga.

 

O le vaiaso na te'a nei sa fuafua e faitau fa’atolu ai le tulafono i luma o afioga i Senatoa. I le taimi o le tauaofiaga a le Senate, ma saunia ai loa le maota mo le fa’atinoina o le palota. A o le i fa’atinoina le palota, na tula’i le afioga i le ali’i Senatoa ia Faiivae Iuli Godinet ma fa’ailoa i le maota le tulaga o loo eseese ai le gagana o le pili i le faaperetania atoa ai ma le fa’asamoa.

 

O loo taua mai e le tulafono e fa’apea, e $40 mo le laisene ave ta’avale (lea o loo $12 i le taimi nei), o le laisene e 5 tausaga le umi e aoga ai. O le totogi lava fo’i lea o le laisene pe afai ae toe fa’afou.

 

I le gagana Samoa, o lo o taua mai ai le totogi e $40 mo le laisene, peita’i i le gagana fa’aperetania e pei ona saunoa Faiivae, o loo taua mai ai le totogi o le laisene e $100, ae o le $40 o loo i ai ua kolosi ese.

 

Na fesiligia e le afioga a Faiivae le maota, poo fea tonu le fuainumera e sa’o, o le $40 poo le $100. Na lagolagoina e le afioga i le ali’i Senatoa ia Magalei Logovi’i le saunoaga a Faiivae.

 

Na manino i le taimi o le tauaofiaga a le maota maualuga, o le gagana lava lea na fa’aulufale atu ai le tulafono i totonu o le Fono.

 

I le mae’a ai o nai talanoaga puupuu e tau fa’amautu ai eseesega e pei ona saunoa i ai afioga i Senatoa, na saunoa ai loa le afioga i le ali’i Peresetene o le Senate ia Gaoteote Palaie Tofau, ina ia tolopo le faitauina faatolu o le tulafono, ae o le a tuuina atu se fesootaiga i le afioga i le Fofoga Fetalai o le maota o sui, e fa’amanino mai le mataupu o lo o nenefu ai afioga i Senatoa.

 

Na taua e ni sui se to’alua o le maota o sui i le Samoa News i le vaiaso na te’a nei le pasia e afioga i faipule o le pili e aunoa ma ni suiga, e ui sa i ai se fautauga ina ia sii i luga le totogi o le laisene.

 

O le tulafono mo laisene ave ta’avale e pei ona taumafai atu i ai le malo ma le Fono Faitulafono, o se taumafaiga lea ina ia suia le tulafono o lo o i ai nei, ae suia i le tulafono fou e pei ona fuafuaina, ina ia mautinoa ua mulimulita’i Amerika Samoa i tulafono o laisene a le Feterale.