Ua tolopo e le afioga i le ali’i Fa’amasino ia Fiti Sunia le aso e lau ai le fa’asalaga a Jane Vasa, fuafua lava i le taimi e mae’a ai mataupu a isi ali’i e to’alua o lo o molia fa’atasi ma Vasa i le mataupu e pei ona ave fa’agaoi ai pepa ‘ai mai le polokalame a le Food Stamp talu mai le tausaga na te’a nei.

O le 2 vaiaso talu ai na tula’i ai Vasa i luma o le Fa’amasinoga Fa’aitumalo mo le lauina o lana fa’asalaga.

Na ulua’i molia o ia i le moliaga mamafa o le gaoi, peita’i na solofua e le fa’amasinoga le moliga mamafa, ae ioe ai loa Vasa i le moliaga mama o le gaoi, ina ua toe faila e le malo le moliaga fou lea fa’asaga ia te ia.

I le tali ioe ai o Vasa i le moliaga mama o le gaoi e pei ona ta’usala ai o ia e le fa’amasinoga, sa ia ta’utino ai e fa’apea, i se taimi o le masina o Tesema 2017 i Amerika Samoa, ao tofia o ia e galue i le Ofisa e tuu atu ai pepa ‘ai mo le polokalame o le Food Stamp, sa ia tuuina atu ai ia Vincent Toeava se pusa o loo i ai pepa ‘ai mo Food Stamp.

Na taua e Vasa i Leoleo ina ua fesiligia o ia i lenei mataupu e fa’apea, i se taimi o le masina o Tesema, na alu atu ai Toeava ia te ia ma fai atu, pe mafai ona ia tuuina atu se pusa pepa o ‘coupon’ mo Food Stamp, se’i tau vaavaai i ai i le auala e mafai ai ona fa’atulaga sana pepa pisinisi (business cards).

Na taua lona musu i le ulua’i taimi na talosaga atu ai Toeava ia te ia, mulimuli ane sa ia taliaina le talosaga ma ia tuu atu loa i ai le pusa sa ia talosagaina. O le vaiaso na sosoo ai, na alu atu ai Toeava ma avatu le $4,000 ia te ia, o lona totogi lea e tusa ai o le pusa sa ia tuuina atu ia te ia.

Ina ua maua le avanoa e fa’aleo ai lana fa’atoesega i luma o le fa’amasinoga, na fa’atoese ai Vasa e tusa ai o lana solitulafono, ma ia talosagaina ai se isi avanoa mo ia. Sa ia fa’atoese i le malo, o lona aiga, o lona to’alua ma lana fanau, aemaise ai le matagaluega o Auaunaga ma Tautua Lautele sa tautua ai.

Na taua e Vasa i le faamasinoga ma ona loimata, o se taimi pito sili lenei ona faigata mo ia ma lona aiga, talu mai le aso na taofia ai o ia ma molia i lenei mataupu.

Na talosaga lana loia fautua ia Ryan Anderson i le fa’amasinoga mo se fa’asalaga faanofovaavaaia.

Na talosaga le loia a le malo ia Bianca Lherisson mo se fa’asalaga faanofovaavaaia e 24 masina mo Vasa. E ui o le ulua’i taimi lea ua molia ai o ia i se solitulafono ma ta’usala e le fa’amasinoga, peita’i na finau le loia a le malo, e talafeagai le fa’anofovaavaaia o Vasa mo le 24 masina, fuafua lava i le matuia o lana gaioiga i lenei mataupu.

Na fesili Sunia i le loia a Vasa poo le a tonu le gaioiga a le ua molia sa fai, ae na tali le loia, “na gaoi e le ua molia se pusa pepa ma tuu atu ia Toeava.”

Na toe fesili Sunia poo le a le taua o le pusa pepa na mafua ai ona gaoi e Vasa, ae na toe tali le ali’i loia ia Anderson, o le pusa pepa o loo i ai pepa ‘ai o le polokalame o le Food Stamp. Sa ia taua atili e fa’apea, e ui o Vasa na aveesea mai le pusa pepa ma tuu atu ia Toeava, peita’i e le i malamalama lelei o ia i le mafua’aga na ala ai ona mana’o Toeava i le pusa pepa.

I le mae’a ai ona fa’afofoga o le fa’amasinoga i fa’afinauga a loia atoa ai ma le fa’atoesega a le ua molia, na saunoa ai loa Sunia e fa’apea, o le a tolopo le tuuina mai o se fa’asalaga a le fa’amasinoga o Vasa, se’i vagana ua mae’a mataupu a i laua e to’alua o lo o molia fa’atasi i latou, o le susuga lea ia Toeava ma le ali’i faipisinisi Asia ia Liren Zhang, poo Kevin fo’i e pei ona iloa ai o ia.

O loo molia e le malo ia Toeava i moliaga mamafa e 19, ae 17 moliaga mamafa o lo o molia ai Kevin. O lo o taofia pea i laua i le toese i Tafuna ina ua le mafai ona la totogi le vaega tupe e ta’i $450,000 na fa’atulaga e tatala ai i laua i tua.