E lei leva atu le osofaiga a Leoleo i Pago Pago ma taofia ai tagata e toatolu i le umia faasolitulafono o le pauta fa’asaina o le aisa, ae sosoo ai ma le taofia faapagota e Leoleo o se ali’i i le po o le aso Lulu na sosoo ai o le vaiaso lava na te’a nei, ona o tu’uaiga i lona umia fa’asolitulafono o vaega o le pauta fa’asaina o le aisa.

Ua molia nei e le malo le lai’i o Suilefaiga Toala i le moliaga mamafa o le umia faasolitulafono o vaega o le pauta oona o le aisa. O le aso Faraile na te’a nei na tula’i ai o ia i luma o le Fa’amasinoga Faaitumalo mo lana ulua’i tula’i, ma faatulaga ai loa lana iloiloga faapitoa i le aso Faraile o le vaiaso nei.

O Leoleo mai le Ofisa o Leoleo i Tafuna sa latou taofia le ta’avale a Toala i luga o le alatele i Iliili, ina ua maitauina e Leoleo ua mae’a le aoga o le laisene o loo faapipi’i i le pito i tua o lana ta’avale.

Ina ua taofia e Leoleo le ta’avale a le ua molia, sa molimauina e Leoleo ni gaioiga sa faia e le ua molia i totonu o le ta’avale, e foliga mai o loo taumafai o ia e aapa atu i le isi itu o le nofoa o le pasese.

Na taunu’u Leoleo ma faailoa ia Toala le mafua’aga o le taofia o lana ta’avale, ma faia ai loa le faaiuga ina ia taofia lana ta’avale. Ae ina ua saili e Leoleo le tino o le ta’avale, sa maua ai se taga pepa o loo i ai vaega o le pauta pa’epa’e.

Mai aoaoga sa auai Leoleo, o le pauta pa’epa’e sa i totonu o le ta’avale, e masalomia o se vaega lea o fualaau fa’asaina. O le mafua’aga lea na logo ai loa le fesoasoani a le Vaega e Suesueina Fualaau Fa’asaina e le Ofisa o Leoleo, ma aga’i atu ai loa Leoleo fa’atasi ai ma ta’ifau mo le fa’atinoina o le latou galuega.

O le faaiuga o lea suesuega atoa ai ma se suega sa faia, na faamaonia ai o le pauta pa’epa’e sa i totonu o le ta’avale, o vaega ia o le pauta oona o le aisa.

I luma o le fa’amasinoga, na faailoa ai e le afioga i le ali’i Fa’amasino ia Fiti Sunia le i ai o ni tusi saisai ua mae’a ona sainia e le faamasinoga e sailia mai ai Toala, e mafua mai i lona le auai i ni isi o ana mataupu sa valaauina i luma o le Fa’amasinoga.

E $5,000 le vaega tupe lea ua fa’atulaga e le faamasinoga e tatala ai i tua le ua molia. Afai ae tatala o ia i tua, ua fa’asa ona ia toe umia ni fualaau faasaina pe tagofia fo’i le ‘ava malosi. O le a faia se suega i lona tino atoa ai ma ana meatotino, ina ia faamaonia na te le o toe tagofia fualaau faasaina ma le ‘ava malosi.

O le aso Tofi fo’i na te’a nei na toe valaau ai le mataupu a i latou e to’atolu ia na pu’e faapagota mai e Leoleo mai Pago Pago, ma tu’uaia i le umia faasolitulafono o vaega o fualaau fa’asaina.

O i latou e to’atolu e aofia ai Lyon Grey, Meriko Lomu ma Sio Jr Godinet. O le aso Tofi o le vaiaso fou, Me 31 ua fa’atulaga e faia ai ulua’i iloiloga o le mataupu a i latou nei e to’atolu.

Ua faatulaga le $50,000 e tatala ai Grey, ae ta’i $30,000 mo Lomu ma Godinet. E pei ona faamanino e le afioga i le ali’i Fa’amasino ia Sunia, e na o le tinoitupe e mafai ona tatala ai i latou nei i tua mai le toese i Tafuna.