Ads by Google Ads by Google

Toe taofia i le falepuipui ni ali’i na tatala i tua e le fa’amasinoga

ausage@samoanews.com

Ua toe taofia nei i le toese i Tafuna ni ali’i na tatala i tua e le fa’amasinoga, ina ua tu’uaia i laua i lo la le usitaia o poloaiga a le fa’amasinoga maualuga.

 

O Lafaele Sefo na poloaina e le fa’amasinoga maualuga ina ia auai i soo se taimi e valaau ai lana mataupu, peita’i talu mai lava le masina o Me o le tausaga nei, e le i toe oo atu lava o ia i luma o le fa’amasinoga. O le mafua’aga lea na sainia ai loa e le afioga i le Fa’amasino Sili ia Michael Kruse se poloaiga e pu’e fa’apagota mai ai o ia.

 

O le ali’i o Methodist Kuka Mika na tatala i tua ina ua mae’a ona tuli lana fa’asalaga i le toese i Tafuna, i lalo o tuutuuga e aua ne’i ona toe solia se tulafono, pe na te toe tagofie fualaau fa’asaina poo le ‘ava malosi.

 

O le vaiaso na te’a nei na toe loka ai e Leoleo ia Mika ona o tu’uaiga i lona ‘ona ma fa’atupu vevesi solo, ma tula’i ai loa o ia i luma o le Fa’amasinoga Fa’aitumalo. Talu ai o le mataupu fou e pei ona tu’uaia ai o ia, na faila ai loa e le Ofisa Faanofovaavaaia se talosaga i le Fa’amasinoga maualuga mo se poloaiga e loka ai Mika, ona o lea ua ia le usitaia tuutuuga sa tuuina atu ia te ia.

 

O le aso Lua na te’a nei na tutula’i ai Sefo ma Mika i luma o le fa’amasinoga maualuga mo le la ulua’i iloiloga.

 

O le ali’i loia fautua ia Michael White o loo tula’i mo i laua, ae o le ali’i loia sili lagolago ia Woodrow Pengelly o loo tula’i mo le itu a le malo.

 

O afioga i ali’i Fa’amasino Lagolago ia Fa’amausili Pomele ma Muasau T. Tafili o loo lagolago i le afioga i le fa’amasino sili ia Kruse mo le iloiloina o se fa’aiuga o le mataupu a Sefo ma Mika.

 

LAFAELE SEFO

 

Ina ua valaau le mataupu a Sefo, na fesili Kruse ia White pe i ai se fa’amatalaga a Sefo e tuuina atu i le fa’amasinoga, e fa’amatala atu ai le mafua’aga na ala ai ona fiu e saili o ia. Na tali White, e le o sauni Sefo e fa’ailoa i le fa’amasinoga i le taimi nei lea tulaga.

 

O le taimi lea na tuuina atu ai loa e Kruse sana poloaiga, ina ia faaopoopo le tupe e tatala ai Sefo i tua i le $10,000.

 

Na fa’alogo le Samoa News o fa’amatala e Sefo i lana loia o White e fa’apea, o ia na alu atu i le fa’amasinoga i le aso 2 Me 2018, peita’i na fai atu lana loia sa i ai muamua o Douglas Fiaui, e toe fo’i o ia i le fale, ae se’i uma ona ia fesoota’i atu lea e fa’ailoa atu le aso e toe tula’i ai i luma o le fa’amasinoga. Fai mai Sefo, e oo mai lava i le taimi na loka ai o ia e Leoleo o fa’atalitali mai pea i se toe valaau atu a Fiaui. Ae na fa’ateia o ia ina ua ia maua le tala, ua fa’amavae Fiaui mai lana galuega.

 

O le aso 5 Oketopa lea ua fa’atulaga e toe tula’i ai Sefo i luma o le fa’amasinoga.

 

O loo tuuaia e le malo ia Sefo i le moliaga o le umia fa’asolitulafono o vaega o le pauta fa’asaina o le aisa. I le masina o Ianuari o le tausaga nei, na tatala ai i tua Sefo ina ua mae’a ona totogi le tupe e $5,000 na fa’atulaga e le fa’amasinoga i lalo o tuutuuga e aofia ai le tatau lea ona auai i soo se taimi e valaau ai lana mataupu.

 

Na taua e le malo e fa’apea, ua fa’atele ona le auai Sefo i aso e valaau ai lana mataupu. E lei auai i le aso 3 o Mati, sosoo ai ma le aso 23 o Aperila, faapea ai ma le aso 2 Me o le tausaga nei lava.

 

O le aso Toona’i o le vaiaso na te’a nei, na pu’e fa’apagota ai e Leoleo ia Sefo ma se isi ali’i, ina ua la fufusu i luma o le tama’i maketi lea e fa’atau ai fua o fa’aeleeleaga a le aufai fa’atoaga i Malaeimi, ma mafua ai loa ona toe maua o ia.

 

METHODIST KUKA MIKA

 

O le Methodist Kuka Mika na toe tula’i i luma o le fa’amasinoga maualuga i le vaiaso nei, ona o tu’uaiga i lona le usitaia lea o poloaiga a le fa’amasinoga. O le vaiaso na te’a nei na pu’e faapagota ai o ia e leoleo ona o tu’uaiga i lona ‘ona ma fa’atupu vevesi i nofoaga faitele.

 

E lei leva atu nei na tatala ai Mika i tua ina ua mae’a ona tuli lana fa’asalaga fa’a falepuipui e 28 aso, e mafua mai i lona le usitaia o poloaiga a le fa’amasinoga, a o lea fo’i ua toe taofia o ia i le falepuipui ma tu’uaia i lona le usitaia o poloaiga a le fa’amasinoga.

 

O le masina o Mati o le tausaga nei na ta’usala ai e le fa’amasinoga ia Mika i le moliaga o le umia faasolitulafono o vaega o le pauta o le aisa. Na tuu e le fa’amasinoga le avanoa ia Mika, ma faanofovaavaaia ai loa o ia mo le 5 tausaga i lalo o poloaiga e ao ona ia usita’i i ai.

 

O nisi o ia poloaiga e aofia ai le aua ne’i ona toe fa’aaogaina fualaau fa’asaina. E 4 aso talu ona tatala Mika i tua mai le falepuipui i le masina o Aperila o le tausaga nei, ae toe taofia o ia i le falepuipui ina ua faamaonia i le suega sa faia lona fa’aaogaina o le fualaau fa’asaina o le aisa.

 

E na o le 28 aso na faasala ai o ia i le toese i lona le usitai i le poloaiga a le fa’amasinoga, ao lea fo’i ua toe taofia o ia i le toese ona o le isi foi tuuaiga o lona le usitaia o poloaiga a le fa’amasinoga, e mafua mai i le fa’alavelave lea na loka ai o ia e Leoleo i le vaiaso na te’a nei ona o le ‘ona i nofoaga faitele.

 

O le aso 5 Oketopa lea ua fa’atulaga e toe tula’i ai Mika i luma o le fa’amasinoga.