Ads by Google Ads by Google

Toe taliu i Uosinitone, Failautusi Initeria, FofogaoSamoa Ryan Zinke


O le taimi lava na fa'ailoa mai ai ua talia talosaga na fa'ao'o atu a ta'ita'i o le tatou malo e tusa ai o Fa'asao o le Gataifale, na tago ane loa ma le susuga le Failautusi o le Initeria i a'ao o le tatou Kovana sili ma si'i i luga. "Patipatia faiva o tama o le malo, fa'afetai i na fa'aiuga lelei." [ata: Leua Aiono Frost]

O le fa'ailo lea a le susuga le Failautusi o le Initeria, o lo ua talia e Peresetene Trump le fanoga o Amerika Samoa na fa'auia atu e ona ta'ita'i. [ata: Leua Aiono Frost]

O le fa'atalofa a le susuga Faafo'i o le Pule o le Packing Room a le Kamupani I'a a le Star Kist Samoa, o le a'ao lava lea o le vasega o le au safu i'a, faamama i'a, tao i'a ma le au tiau, ua fa'atalofa atu i le susuga Ryan Zinke, o le malosi lava lea o le aufaigaluega a le Star Kist Samoa. [ata: Leua Aiono Frost]

O le aoauli o le aso Tofi ua te’a sa tu’uva’a ese atu mai le atunu’u le faigamalaga a le Failautusi o le Initeria a le malo tele, Ryan Zinke, lea sa asia le teritori mo le umi e lima itula i sana malologa pupu’u.

 

Ina ua mae'a le feiloa'iga i le Malae Va'alele na agai le malaga maimoa a Zinke ma le au malaga, ma agai atu i le falema’i o le LBJ ma toe fa'aauau i le taulaga ma aga'i atu i le StarKist Samoa.

 

O le susuga Taotasi Archie Soliai sa fai ma fofoga o le StarKist na te fa'aleo le talosaga a le kamupani ‘ia, e tusa o le naunauta'iga e fia fa'aauauina pea le tautua i Amerika Samoa nei ona e popo'e fo'i se lagona, i le anoanoa'i o e faigaluega ma fa'amoemoe tausiga o latou aiga i lea kamupani.

 

Saunoa ia Zinke, e fa'apupula le mau mai ia Peresetene Trump. "Ua mae'a fa'ailoa mai e Peresetene ia te a'u, i lo'u sau ai i la'ua malaga lenei, e fa'ailoa atu ia Amerika Samoa, o mea uma sa outou fa'atalosaga, ua talia ma o le a faia e pei ona talosaga atu ai."

 

Na patipatia e le to'atele lea saunoaga, ma sa matua si'i i luga e Zinke a'ao o Kovana Lolo Moliga e fa'amautu atili ai lea saunoaga.

 

O meaalofa na tapena e le taupulega a le StarKist ma sa taua'aoina ai latou I'a tu'uapa numeratasi ia Amerika atoa, ae o le oloa faatau atu i fafo a Amerika Samoa.

 

Na iloa gofie le agaga o Zinke i lona faliu ane loa ma amata fa'atalofa ma talanoa fa'amalo i tagata faigaluega.

 

Mai le StarKist sa malaga mai lea i latou i le Malae o le Suigaula o le Atuvasa i Utulei. O iina sa amata loa ona agaia le Ava o Feiloa'iga e le Kolisi Tu'ufa'atasi o Amerika Samoa.

 

O le Tausala Lalelei o Amerika Samoa, o le Tausala Lalelei fo'i lea o le Pasefika 2018 Matauaina Gwendolyn Toomalatai, sa ia palua lea 'ava.

 

A'o le'i aloava le saofaiga, na mua'i tulei le afioga le Ma'oputasi o le Failautusi o le Ofisa o Mataupu Tau Samoa, Mauga Tasiaeafe Asuega, ua tasi moemoe lo latou finagalo, o le a tapa ipu se suafa matai e fa'asuafaina le Failautusi o le Initeria, aua o se ua iloga lona sao i le fa'alaileleina o mana'oga o Amerika Samoa.

 

"O le suafa o le a fa'ae'e i lenei ta'ita'i o ‘FofogaoSamoa’. O oe fo'i e fai ma to'omaga o Amerika Samoa i ana mataupu e feso'ota'i ai ma le Malo Tele."

 

O le afioga Mauga ma le afioga le Fa'atui Misaalefua John Hudson, sa la'ua fa'ao'o le fa'apa'iaga fa'aleaganu'u o le Nofo a le afioga FofogaoSamoa.

 

O le mae'a ai lea vaega tele o le fa'amoemoe sa faliu loa ma taute 'ava. Na mua'i tapa Ipu le afioga FofogaoSamoa, so'o ai ma le ava ipu a le afioga i le kovana sili Lolo Moliga ma fa'asolo ai se'ia o'o ina mae'a lea itu o le taligamalo.

 

Ina ua mae'a sa fa'asolo atu le feiloa'iga a Zinke i le pa'ia lasilasi o le Malo sa nofoia faleie i le malae. O le vaega muamua na pa'au i ai Zinke o fanau a Amerika Samoa sa latou galulue i faiva tinei afi i Kalefonia lea ua fo’i mai i fanua. E to'a 17 i latou, ose vega o le National Park.

 

O lana fa'atalofa na soso'o ma le vasega o Fitafita Tuai. O Zinke, o se tasi o le US Navy SEAL. Sa o’o atu foi i sui o le fono Faitulafono, fa’atasi ai ma vaega uma o le malo sa i ai i le malae.

 

Na saunoa fa'afetai Lolo i le Aumalaga ae maise le Failautusi o le Initeria, "O faiva tau le sailiga manuia e le o toe faigofie, ae fa'amoemoe i le Atua e foa'i mai auala e fa'afaigofie ai mea fita i sailiga o manuia mo le atunuu atoa."

 

"O le o'o mai o le Failautusi o le Initeria, ua tatou vavalalata atili ai ma le Malo Tele i lenei aso. Ua tatou le saili mamao i Uosigitone ae ua sau Uosigitone ia i tatou, faafetai. O nei taimi i Upufaiomalo e le o toe faigofie, pe fa'ataiopapa'u, ua lutaluta ma ua tai o loloto i taimi uma. Ae amatu'u mai se taofi ma se tamau sa utetele, o se fa'amanuiaga tele fo'i ua o'o mai, e i ai la le taeao lenei. O le taeao taua tele i o tatou olaga i luga o nei motu laiti o tatou o ola ai."

 

I lona suafa ua fa'asuafa matai ai e le atunu'u, sa fa'apea ai lafoga a le kovana, "FofogaoSamoa, o ou mama na, alofagia e le Atua ou faiva, ae maise lou loto e te fa'autagia ma una'ia ai mataupu tau le olaga o tagata Amerika Samoa i totonu o faigaupufai o le Malo tele. Fa'afetai fo'i o lo'o i ai pea alo o le atunu'u, e tula'i mai i taimi e mana'omia ai le latou tu'ualalo, i nei ta'ita'i iloga o le Initeria."

 

I se lafoga tali a FofogaoSamoa sa ia fa'ailoa ai, "E taua mataupu uma tau i Vetereni po'o fitafita tuai, mataupu tau Laufanua Fa'asao ma le Gataifale Fa'asao o le tatou Teritori. Ae silisili ona taua le sao ua faia nei e alo nei o Amerika Samoa sa malaga atu e fai so latou sao Kalefonia, e tineia le afi. Ua outou faia se sao ua mitamita ai Amerika Samoa. O outou o Toa ma ua onomea ona avea outou ma Siamupini!"

 

"O outou Fitafita Tuai, o outou sa outou tau'ave le pagatia i o outou olaga taito'atasi e tete'e atu i le fili na lamalama mai i le tatou malo ma ona tagata, i o outou aiga ma pelega. Sa outou puipui ma leoleo, ua mae'a lo outou sao, ua outou manumalo mai ai, fa'afetai tele. E olaola pea le lagona o fitafita e tutu e tete'e atu i faiga leaga e tula'i ma tete'e mai! E taua outou ma la outou sao, fa'afetai mo la outou tautua, ae o lea lava tatou te iinei, fa'aauau lau tautua i au pelega,” o sana tala lea i le vasega o fitafita tuai.

 

O sana tala i le tatou falema'i, sa ia fa'apea ai, "O lea o le a tatou mafuli atu e faaleleia lo outou falema'i.”

 

Na faia fa'aaloaloga ma sa foa'ia le to'oto'o ma le fue fa'afailauga i le afioga FofogaoSamoa, ma fa'apea fo'i ona molita'i mai lana sua fa'aaloalo ma isi fo'i ana pusa i'a tu'uapa. Na fa'apena fo'i ona fa'aso'o ane i nisi o sui o le malo tele sa malaga fa’atasi mai ma Zinke.

 

I le toe taliu atu i le Malae Vaalele o le a taliu le faigamalaga, ae fa'afeiloa'ia Zinke ma le Lolo e se tina ma sana tama, o se tamaititi o lo'o a'oa'oina i lona aiga, e le o a'otauina i le potu a'oga. O ia lea sa ofoina atu ai le pine fa'apitoa a le Failuautusi o le Initeria mo ia ma si ona tina i le malae va'alele.

 

Sa malolo le aumalaga mo sina taimi i le VIP Lounge mo ni nai feuta'iga mulimuli o ta'ita'i o le Malo ma i latou ona tu'uva'a ese atu ai lea i le taimi atofaina 2:00pm. Ma sa malaga ai fo’i ma le sui o Amerika Samoa i le Koneresi, Aumua Amata i le sa o lana afioga FofogaoSamoa.