Ads by Google Ads by Google

Toe sauniga & lagomau, le afioga le Matua, Utu Abe Malae


O se vaaiga i Malu o le Malo ma le Tagavai o Amerika Samoa i luga o le sa o le afioga i le Matua, Utu Abe Malae, i le vaiaso ua te’a. [ata: Leua Aiono Frost]
ausage@samoanews.com

O le aso Faraile o le vaiaso ua te’a sa faia ai toe sauniga o le afioga le Matua, Utu Abraham Daniel Malae i le EFKAS Amouli, ma sa auai le afioga Kovana sili Lolo Moliga, sui o le kapineta, Fono Faitulafono ae maise Pule'aga ole Eletise ma le Sauvai Taumafa.

 

I le moliamau a le kovana, sa ia saunoa ai, "Soia ia tatou te fa'ameo i le pule faito'atasi a le Atua i mea uma o lenei olaga, a o'o loa i o tatou taimi ua tatou o loa. Ae si'i a'e le fa'afetai, aua o faiva sa tau'avea e le afioga le Matua Utu Abe Malae, sa matua fa'ataunu'uina lava, e faigata fo'i ona toe fa'atinoa e se tasi e to'atasi i le taimi lenei ua le o toe fa'atasi ma i tatou. O le fa'afetai i le Atua, aua o Utu o se meaalofa aoga tele, sa ia faia fo'i le mea silisili, o se mea fo'i e le faigofie ona ausia e se tasi e tautua fa'atasi ma ia. I lona vaitau sa tautua ai, sa fa'amaoni.

 

“Tau ina ou fa'afetai atu Utu Abe Malae, i lau tautua, ia fa'aleo mo le pa'ia o aiga i ona itu tetele ma ona itu taulagi, aua o lo outou alo, sa to'omaga lava i ai le malo i le tele o taimi, ona o lana tautua o'o'o'o ma lona loto i so'o se tiute na te fa'atinoa."

 

"E le tau fa'afuluina le toga lelei, e le tau vivi'ia fo'i galuega ua tino ma ua tutula'i e avea ma va'aiga i lona soifuaga galue mo lona malo ma ona tagatanu'u. Fa'afetai e ui ina e alu, ae moni ai le tusi, ‘E ola pea ia!’ ona o ana galuega va'aia i le atunu'u, malo na feso'ota'i ma ia, ae maise le vasa pasefika i ona manatu ma le tofa saili sa ia fa'amautu ai nisi o aiaiga e tele tau le Malosi'aga Fa'aeletise,” o se folasaga lea a le kovana.

 

Ina ia fa'atino le alofa tula'i o le Malo sa taua'aoina ai le Fa'ailoga Fa'apitoa lea na tutula'i le tama'ita'i Fa'atonusili o le Uafu, ma Malaeva'alele, Taimalelagi Dr. Claire Poumele.

 

Ua fa'apea fo'i ona tutula'i le afioga le Peresetene o le Senate, Senatoa Gaoteote Palaie Tofau, ma sa tauaaoina fo'i le latou Iugafono Malilie Fa'atasi a le Fono Faitulafono e taualoa ai le auaunaga matavela a Utu.

 

O le molimau a le aiga, le afioga Le'i Sonny Thompson lea na soso'o ai, aua ua ia talatala lona gafa na sausau sema ma ua matagofie ai lona tala'aga, o ia lava o le atali'i o le fa'afeagaiga.

 

"E ui fo'i ina le va'aia so'o lona tino i laufanua o le Manu'atele, ae o lona agaga atoa o le aiga o lona tama, e le misia fo'i i mea e ao ina fa'atino mo le aiga potopoto. I le afio'aga o Amouli, o le afioaga o lona tina, lea e alaala tumau ai ma avea ai ma afioga le Matua o Faumuina, ‘Utu’ e tautua ai. Peita'i o lona tina fo'i i Fagatogo i le pa'ia o aiga Sa Lutu, ua malamalama ma ua le tu'ua fo'i e ia. E osi aiga, tausi tina, masalo o se mea fo'i lea ua leai ai lava sona to'alua e faia."

 

Tula'i le afioga Asi na malaga mai Samoa mo le molimau na auvasa mai e fa'aleo ona e o'o i Samoa i ona aiga. "E le ose tagata e fa'aalia sona taofi e te'ena ai se mea ua tasi i ai le matou aiga, e sapaia e ia tonu uma ua fulisia i ai o matou lagona e fa'atautaia se fa'alavelave. O ia o se tasi e lima mafola ma tausi aiga, e iloa lelei lona va ma ona aiga. Ae silisili ia te ia ona tausi matua."

 

Sa faia fo'i le molimau a le aufaigaluega a le ASPA ma sa tutula'i ai le susuga Fonoti Perelini Perelini, le taitai fono o le komiti fa’afoe a le ASPA.  "O le a se matou tala e le'i silafia e le to'atele. O ia o se tasi e le fa'amalieina i se mea e le'i lelei ona fa'atino ma mautu lelei. O mea nini'i e o'o i mea tetele e matua va'ai toto'a i ai ona fofoga i le galuega. E le faigofie ona e faigaluega fa'atasi ma ia pe afai e te le fa'atinoa ou tiute i le taimi ma le atoatoa e tusa ma le lelei o mana'omia ona faia ai ou tiute. Fa'apu'upu'u, e le mafai e se tagata e to'atasi ona fa'atinoa ona tiute sa faia mo lenei galuega!"

 

Sa ia toe fa'aopoopo lana saunoaga, "Lea ua alu, o ai a atoatoa ai le galuega tautua a le Matagaluega lenei, e ao ia i matou uma lava, ona tutu fa'atasi e fa'atino uma tiute sa loto i ai, galuega na ia fa'atulaga e faia i lenei vaitau mo le matagaluega, ae maise, e faanoanoa tele, pe afai o nei ona tiute uma sa fa'atino, ua afua ai ona gasegase ma ua tu'ua ai le mafutaga."

 

"E le galo lava oe [Utu] i le tatou galuega, e le faigofie ma e le mafai lava, ona faia to'atasi e se tasi ou tiute uma sa fai, aua e o'o lava i e faigaluega i fafo e te asiasi i ai ma talanoa i ai. E amata mai le taeao ona e fafau lau aufaigaluega ina ia malolosi tino ma ia gafatia ona fa'ataunu'u tiute ma le mata'alia. E faia fa'amalositino ma fa'atonu ina ia auai uma, soia le matamoe ma usu fia moe mai se tasi i le galuega. E lamatia le ola i galuega nei, e ao ina mata'alia uma outou. Ae e te le'i fa'atalale fo'i i le tu'uina mai o le totogi i au tagata faigaluega, ae maise fo'i ia i latou i galuega mamafa ma faia i le la ma timuga. E agaga o ia i ana tagata faigaluega uma."

 

O le molimau a lona uso la'ititi sa iloga ai lona faiuso, tausi fanau ma le fai tuafafine ma tausi aiga lelei. "E le taitai ona misia e ia se asiasi i tina matutua o le aiga, o ana uo mamae fo'i o tagata matutua uma lava. E fiafia e fa'asoa o latou lagona ma manatu, ma e taua ia te ia le fa'asoa mai a i latou na ia te ia, ae fa'apena fo'i i le fanau talavou, ma i matou e laiti ia te ia. E faufautua ina ia sa'o matou filifiliga, sa fai o ia ma to'omaga i o matou olaga, o fanau talavou a le aiga, e fesiligia sana fesaosaoni i so'o se mea e le mafai ona tu'ua e ia. O le fa'amaoni e tima'i mai ai o ia, ia sili lona fa'ataua i so'o se mea e fai. Ia fai fo'i ae ia matua fai ia mafai!"

 

O le sauniga na fa'ai'u i le molimau a lana faifae'au Rev. Elder Fa'alevao, o ia fo'i o lo'o avea ma Taitaifono o le EFKAS i lenei tausaga. Sa ia fa'apea ai, "A fa'ia le poutu, e le tatalia pou alalo! O lea se lagona e fa'aalia ai lenei misi ua i ai nei i le ekalesia. Ae o ai e tu ma tali i le fa'aiuga a le Atua, aua lava ne'i fai so tatou loto, ua silafia e le Atua ua tatau ona malolo ma afemoe lana folauga i lenei lalolagi. Fa'afetai i le Atua i lana mea faigaluega sa tatou galulue, lea ua tali, ua tatau ona malolo, ae ia pa'u se toa, ia toe tu mai fo'i se toa, i le galuega a le Atua nei, ae maise i le galuega fo'i i le Malo ma totonu i le li'o o lona aiga."

 

I le olaga a'oa'oina o Utu na amata mai lava i le a'oga Faife'au o Iese o le EFKAS i Amouli. A'oga tulaga lua sa amatalia mai Nimitz Elementary School i Pearl Harbor Hawaii ae fa’aiu mai i le Fiailoa School i Amerika Samoa.

 

Sa maua lona Bachelor of Science i le Chemistry & English ae minor i le Maths ma le Musika i le Morningside College. I le Iunivesite o Iowa na maua ai lona fa’ailoga  Master of Science Physical Chemistry. I le Iunivesite o Pittsburgh sa maua ai lona Masters of Science i le Public Works ma toe sailia le isi ona fa'ailoga Master of Science in Engineering i le Iunivesite lava lea o Pittsburg.

 

E tele matagaluega o le malo sa tautua ai Utu o se taitai. O tele foi fa’alapotopotoga sa avea ai o ia ma taitai ma se totino.