O le vaiaso nei na toe taofia faapagota ai i le toese i Tafuna se e galue i le Fono Faitulafono, ona o tu’uaiga i lona le usitaia lea o poloaiga o lana Nofovaavaaia sa tuuina atu i le 2014.

O le taeao o le aso Lulu o le vaiaso nei na tulai ai Perenise Taala i luma o le Fa’amasinoga Maualuga mo lana ulua’i iloiloga. O le afioga i le ali’i Faamasino Sili lagolago le tumau ia Elvis P. Patea na iloiloina lana mataupu. O le ali’i loia fautua ia Michael White na tula’i mo Taala, ae o le tama’ita’i loia sili lagolago ia Christy Dunn na tula’i mo le itu a le malo.

E pei ona taua i fa’amaumauga a le fa’amasinoga, o le aso 29 o Oketopa na te’a nei, na aga’i atu ai Taala e vaai le Ofisa Faanofovaavaaia e pei ona faatonuina ai o ia e le Fa’amasinoga.

I le taimi o lana asiasiga, na faia ai loa ma se suega faapitoa i lona tino ina ia mautinoa ai na te le o fa’aaogaina vaega o le pauta faasaina o le aisa poo le ‘ava malosi fo’i. I le suega sa faia, na faamaonia ai le fa’aaoga e Taala o le pauta fa’asaina o le aisa.

Ina ua fesiligia e le sui o le Ofisa Faanofovaavaaia ia Taala, na ia ta’utino ai, sa ula lana aisa i le aso 26 o Oketopa, ona o ni fa’alavelave a lona aiga sa pisi ai. Sa ia ta’utino e fa’apea, o lona ulaina ai o le pauta o le aisa, ua faamaonia ai lona le usitaia o poloaiga o lana nofovaavaaia sa tuuina atu i le 2014.

O le aso 29 o Novema lea ua fa’atulaga e faia ai le ulua’i iloiloga a Taala. Ua toe taofia nei o ia i le toese se’i vagana ua ia totogi le tupe e $5,000 lea ua fa’atulaga e tatala ai o ia i tua.

I faamaumauga a le fa’amasinoga o loo taua ai e fa’apea, i le aso 3 o Mati, 2017, na poloaina ai e le fa’amasinoga ia Taala na te tuliina masina e 8 sa fa’amalumalu o lana fa’asalaga fa’a falepuipui, ina ua faamaonia lona le usitaia o tuutuuga o lana nofovaavaaia.

E ui na taofia Taala i le toese mo le 8 masina, ae na maua pea lava le avanoa e tatala mai ai o ia i tua e faigaluega i lana galuega i le Fono Faitulafono, lea ua tele tausaga o galue ai.

O le masina o Oketopa 2014 na manatu ai le fa’amasinoga e fa’a falepuipui Taala mo le 5 tausaga, ina ua tausala o ia i le moliaga mamafa o le ave ta’avale ‘ona ua mafua ai ona oo le oti i se isi tagata. Ae talu ai o itu lelei na faailoa e le loia a Taala, na faamalumalu ai loa e le fa’amasinoga le tuliina o lea faasalaga faa falepuipui, ae faanofovaavaaia Taala mo le umi e 5 tausaga i lalo o tuutuuga e ao ona ia usita’i i ai.

O ni isi o ia tuutuuga e aofia ai lona tuliina o masina e 20 i le toese i Tafuna, totogi le salatupe e $2000, ma ia auai i aoaoga e fesoasoani ai i le tagofia o le ‘ava malosi. Peita’i, e na o le 12 masina na tuli e Taala i le toese ae tatala loa o ia i tua, ina ua finagalo le fa’amasinoga e taofi lona tuliina o masina e 8 na totoe ai o lana faasalaga faafalepuipui.

Na fautuaina o ia e le fa’amasinoga e aua ne’i ona toe tagofia le ‘ava malosi poo fualaau fa’asaina, o le a faia fo’i ni suega ia te ia e iloa ai o loo ia fa’amaoni i le poloaiga a le fa’amasinoga.

Ina ua faia se suega a Taala i le aso 9 o Fepuari o le tausaga na te’a nei, na faamaonia ai lona faaaogaina o le pauta o le aisa. O lona faia o lea tulaga, ua atagia mai ai lona le usitaia o le poloaiga sa tuuina atu e le fa’amasinoga, e fa’asa ai ona ia tagofia le ‘ava malosi poo fualaau fa’asaina, ma poloaina ai loa o ia e tuli masina e 8 na totoe o lana fa’asalaga fa’a falepuipui e 20 masina.

E ui na tuli e Taala masina e 8 i le toese, ae sa tatala pea lava o ia i tua e faigaluega i le Fono Faitulafono, le galuega na amata galue mai ai i le 2008.

O se faalavelave na tula’i mai ia Setema o le tausaga e 2013, lea na maliu ai se alii i Peva’ia’i ina ua fetoai ma se pou moli le ta’avale na fa’afoe e Taala.

Saunoa le afioga i le alii faamasino ia Patea i le taimi na lau ai le faasalaga a Taala i le tausaga na te’a nei, ina ua faamaonia lona le usitaia o tuutuuga a le fa’amasinoga, e le o galo i le fa’amasinoga le matuia o le solitulafono sa faia, lea na mafua ai ona uma le soifua o se isi tagata ia te ia.