O le ali’i pagota lea na tatala i tua e le afioga i le ali’i Fa’amasino ia Fiti Sunia ina ua talia e le fa’amasinoga le talosaga a le malo, e solofua ai le latou tagi fa’asaga ia te ia, na toe loka e Leoleo ina ua manino ane, o lo o i ai le isi ana mataupu i luma o le Fa’amasinoga Maualuga.

O le ali’i o Lafaele Sefo na tu’uaia i le moliaga o le faaoolima i le tulaga tolu faapea ai ma le fa’atupu vevesi i nofoaga faitele, e mafua mai i le fa’alavelave lea na la fufusu ai ma se isi ali’i i le nofoaga o loo i ai le maketi i Malaeimi i le aso 28 o Iulai 2018.

E ese i le mataupu lea, o lo o i ai le isi ana mataupu i luma o le fa’amasinoga maualuga, lea o loo tu’uaia ai o ia i lona umia fa’asolitulafono lea o vaega o le pauta fa’asaina o le aisa.

Talu mai le aso 28 o Iulai na loka ai e Leoleo ia Sefo, e le i toe tatalaina lava o ia i tua seia oo mai i le aso Tofi o le vaiaso na te’a nei, lea na toe valaau ai lana mataupu i luma o le fa’amasinoga fa’aitumalo.

O le ali’i loia fautua ia Ryan Anderson na tula’i mo Sefo, ae o le tama’ita’i loia sili lagolago ia Laura Garvey na tula’i mo le malo.

Ina ua valaau le mataupu a Sefo, na fa’ailoa ai loa e le loia a le malo i le fa’amasinoga sa latou talosaga, ina ia solofua le latou tagi fa’asaga ia Sefo.

Na fesili Sunia i le loia a le malo i le mafua’aga ua ala ai ona le mafai ona latou fa’amaonia le tagi fa’asaga ia Sefo, ae na tali le tama’ita’i loia, o lo o manino i suesuega a Leoleo e le o ia na mafua ai le vevesi e pei ona toe molia ai o ia e le malo.

Na talia e Sunia le talosaga a le malo, ma poloaina ai loa le tatala o Sefo i tua mai le vaavaaiga a le malo.

O le taimi lava na mae’a ai ona tuuina mai le fa’aiuga a le ali’i fa’amasino, na tatala ai loa e le Masela o le fa’amasinoga ia Sefo ma tuua ai loa e le ua molia le fale fa’amasino i le taimi lava lea.

Sa i ai i totonu o le potu fa’amasino i le taimi lea le isi loia a le malo o loo gafa ma le taulimaina o mataupu tau solitulafono mamafa, le susuga a Woodrow Pengelly. Na faalogo Pengelly i le faaiuga a le ali’i fa’amasino ia Sunia ina ia tatala i tua Sefo, sa ia molimauina fo’i le taimi na tuua ai e Sefo le potu fa’amasino, o le mafua’aga lea na aga’i atu ai loa Pengelly i luma ma ia fa’ailoa ia Sunia le mataupu a Sefo o loo i ai i le fa’amasinoga maualuga.

Na fa’ailoa e Pengelly i le fa’amasinoga e fa’apea, o loo i ai se mataupu o loo molia ai Sefo i le fa’amasinoga maualuga, ma ua mae’a fo’i ona fa’atulaga e le fa’amasinoga maualuga le tupe e $10,000 e totogi ona fa’atoa mafai lea ona tatala o ia i tua.

O le faateia o Sunia i le faamatalaga a Pengelly, na mafua ai ona ia fesili, poo i ai se tusi saisai a Sefo mai le fa’amasinoga maualuga. Na toe tali Pengelly i le fa’amasinoga, “O lea lava.”

“Afai o i ai se tusi saisai a Sefo mai le fa’amasinoga maualuga, e tatau ona tumau ma aloaia pea lena tusi saisai, e le mafai ona ou fa’aleaogaina le malosi o le tusi saisai mai le fa’amasinoga maualuga,” o le saunoaga lea a Sunia.

Na faliu Sunia ma fesili i loia mai itu e lua poo i ai pea Sefo i totonu o le potu fa’amasino, peita’i e leai se isi na tali. O le mafua’aga lea na fa’atonu ai loa e Sunia le Failautusi a le Fa’amasinoga e toe valaau le mataupu a Sefo.

Ina ua toe valaau le mataupu a Sefo, sa leai se isi na tali mai i totonu o le potu fa’amasino.

Na fesili Sunia i le ali’i Leoleo o le falepuipui pe ua tatala i tua ia Sefo, na tali le ali’i Leoleo, “O lea lava.”

Na faliu Sunia i le loia a Sefo ma fesili i ai, pe na ia iloaina le tusi saisai a Sefo mai le fa’amasinoga maualuga, ae na tali le ali’i loia ia Anderson, e leai.

Na saunoa Sunia ma ia fa’amanatu i Loia le Tulafono o le amio e fa’atautaia ai galuega fa’apenei, lea e tatau i loia uma ona latou aloaia ma fa’atauaina.

Saunoa atili Sunia ma ia faamanino se faiga o loo faatinoina e le pulega a le Toese i Tafuna mo pagota uma e tatala i tua i le fale fa’amasino, e le mafai ona tatalaina i tua se’i vagana ua toe fa’afo’i i le toese e saini le pepa e faamaonia ai ua tatala i tua, ona fa’atoa mafai lea ona tatala i tua.

A o fa’agasolo taualumaga o le mataupu a Sefo, o le taimi lea na aga’i atu ai i fafo ma le potu fa’amasino le Leoleo o le toese e saili mai Sefo.

Na taua ese molimau i le Samoa News e fa’apea, e maua atu e le Leoleo ia Sefo o loo tu tu i le malae i Fagatogo e fa’atali sana pasi e alu ai i le fale, ma toe taofia mai ai loa o ia ae toe auina atu i le falepuipui i Tafuna.

MATAUPU UA SOLOFUA E LE FA’AMASINOGA

O le mataupu lea na solofua e le fa’amasinoga fa’asaga ia Sefo, na tula’i mai i le maketi o loo faatau ai meamata a le au fa’atoaga i Malaeimi i le aso 28 o Iulai i le taeao, ina ua tula’i mai se fusuaga i le va o Sefo ma le isi fo’i ali’i o loo molia i le umia o fualaau fa’asaina ia Olivia Toimoana.

Na taua e molimau sa i ai i Leoleo e fa’apea, o Toimoana na amataina le vevesi, ina ua ia alu atu ma aveese faamalosi mai se tupe sa i luma o Sefo, atoa ai ma lona palauvale ia Sefo. Na tula’i mai Sefo i luga ma tu’i loa ia Toimoana.

TUSI SAISAI I LE FA’AMASINOGA MAUALUGA

E $5,000 le tupe na tatala ai i tua Sefo ina ua mae’a ona faila e le malo le moliaga o le umia faasolitulafono o le pauta faasaina o le aisa faasaga ia te ia. Na tatala o ia i tua i lalo o tuutuuga e tatau ona auai i soo se taimi e valaau ai lana mataupu.

E fa’a 3 ona valaau le mataupu a Sefo i luma o le fa’amasinoga maualuga ae lei auai o ia, o le mafua’aga lea na saini ai loa e le ali’i fa’amasino sili ia Michael Kruse le tusi saisai e saili mai ai Sefo.

Ana le lokaina lava Sefo e mafua mai i le fusuaga lea na tula’i mai i Malaeimi, e le maua e Leoleo o ia, ma auina atu ai loa o ia i le faamasinoga maualuga mo lana mataupu.

Ina ua valaau lana mataupu i luma o le ali’i fa’amasino ia Kruse, na toe faatulaga ai loa e Kruse le tupe e $10,000 e totogi ona fa’atoa mafai lea ona tatala Sefo i tua.