Ads by Google Ads by Google

Toe fa'apa'ia le malumalu EFKAS "Ua Taunu'u" - Kanana Fou


"Ua Taunu'u" le malumalu i le Laumua o Kanana Fou mo le EFKAS lea ua mae'a ona toe fa'aleleia i le tau aofa'i e $2,282,089.83. Peita'i e le'i mae'a galuega i fafo o le Malumalu, ma ua atagia ai, e mae'a lelei lava le malumalu i lona tau aofa'i lea. [ata: Leua Aiono Frost]

Na poto le Ekalesia Fa'apotopotoga Kerisiano i Amerika Samoa i le Laumua i Kanana Fou i le aso Faraile ua te’a mo le sauniga o le toe fa'apa'iaga o le Malumalu tele "Ua Taunu'u" ina ua mae'a galuega toe fa'aleleia sa alofaiva i ai le Paramount Builders Inc.

 

Sa ta'ita'ia le sauniga e le Taitaifono o le Fono a le Au Toeaina EFKAS, Rev Elder Fiti Aofia i lumafale o le "Ua Taunu'u." O le taua'aoina o tusi fa'amau e fa'ataga ai ona fa'aaogaina lea Malumalu na taua'aoina fa'apitoa e le tama'ita'i Fa'atonusili o Galuega a le Malo, Faleosina Voigt.

 

"O le ua i ai lima ma vae ma le loto e mama, O e ua le auauna i le mea fa'atauva'a, O i latou ia e faia le galuega mo a'u!"

 

O upu ia o le ulua'i vi'iga sa peseina e le Pulega a Fofo ma Alataua na tatala ai le sauniga ina ua mae'a o'otia le Lipine o le galuega e le faletua o le afioga le Kovana Sili, Cynthia Malala Moliga, ma tatala faitoto'a o le malumalu.

 

Tula'i le ta'ita'i o le sauniga o le fa'apa'iaga Rev. Elder Fa'aeteete Saifoloi ma amatalia le sauniga. O le faitauga o le Tusi Pa'ia na tula'i ai le susuga le FS Mafutaga Fa'aleaoga o le Pulega a EFKAS i Aukilani, Niu Sila.

 

Tala o le galuega ua fa'ailoa e le Failautusi Aoao EFKAS - FS Nafatali Faleali'i, “Mai ia Fepuari 19, 2017 na fa'aleagaina ai uma le tioata o le Malumalu ma nisi vaega o lona taualuga ua tutulu ma sao i ai le vai. Na talosagaina lea o le Matagaluega o Galuega a le malo, ina ia latou faia se suesuega ae fa'ailoa mai ai i le Taitaifono Rev Elder Mamoe i lena vaitau, le tulaga ua i ai afaina o le Malumalu. Mai nei sailiga ma fa'ai'uga na taua'aoina i le Taitaifono ma le laulauatofi ua tuana'i atu, sa talo ai loa se fonotaga fa'atopetope a le Ekalesia Aoao, ia Mati 22, 2017, ina ia lafo taofi i le tulaga ua i ai le Malumalu, ma ia faia se fa'aiuga a'o le'i o'o i le fonotaga lautogia o le tausaga ua mavae ia Iulai. Na pasia e tapena loa le toe fa'aleleia o le Malumalu, ma saili fa'avave se tinoitupe e fa'atino ai le galuega lea.”

 

Ianuari 21, 2018 na fono ai ma fa'atino tauofoga a pisinisi faufale mo le galuega lea, ina ua mae'a taoto le tinoitupe e fa'atino ai le galuega atoa. O le Paramount Builders i le latou Ofo na taua'ao, $450,000 ae lima masina e fa'atino ai galuega toe fa'aleleia, e le suia foliga o le malumalu sa i ai.

 

Ianuari 31, 2018 na faia ai le sauniga e amatalia ai le galuega i lona toe fa'afouina. Fepuari 01, 2018 sainia lea feagaiga i le va o le Paramount Builders ma le Komiti Fa'afoe o le Galuega ma ua fa'atulaga mai ia Fepuari se'ia o'o ia Iuni 2018.

 

I le masina o Iulai i lona amataga, 2018 ua silafia lelei e Rev. Elder Eveni Mamoe e le mae'a le galuega lenei i lona taimi atofa, aua sa toe lutia le galuega i le afa o Gita ma ua atili ona fa'aleagaina le malumalu aua e maua mai e le afa o Gita, ua talai le tele o vaega o le Malumalu e toe fa'afou. Ma ua fa'ateleina atili ai le Oka o mea faufale e aumaia mai fafo, e tatau ona faia, ae ua le o'o mai fo'i i le taimi vave nei mea uma, ua le mafai ai ona maua le taimi atofa mo le fa'amae'aina o le malumalu, e faia ai le fonotele.

 

Iulai 31, 2018 toe sainia ai le feagaiga fou ma le Paramount Builders ina ia o'o atu i le fonotaga lenei, Ianuari 18, 2019, ua mae'a le malumalu.

 

Tala o le Galuega mai le Teutupe a le EFKAS - Fiasili Haleck sa ia fa'ailoa, "Na pasia i le fonotele o le a sailia se nogatupe mai le UCC Conrnerstone ina ia fa'atino ai le galuega ma sa fa'amatu'u mai ai le $1,982,089.83 mo lea fa'amoemoe. Ina ua mautu lea seleni sa fa'ato'a tauofo loa lea galuega” ma maua e Paramount Builders.

 

"I le mae'a ai o le fonotele ia Iulai 2018, na pasia ai le toe fa'aopoopo mai o le isi $300,000 e fa'aagaaga mo le galuega lava lenei ma ua maua ai le aotelega o le seleni na sailia e le EFKAS - $2,282,089.83. Peita'i i le aso 17 Ianuari, 2019 ua tula'i mai le aotelega o le tupe ua fa'aalu i le galuega e $2,173,854.25, o lona uiga o lo'o totoe se vaega itiiti o lea seleni atoa.”

 

“Peita'i e pei ona matauina, o lo'o i ai vaega itiiti fo'i o lenei galuega o lo'o totoe i fafo o le malumalu, e ao lava ina fa'a mae'a lelei, ma e gafatia fo'i i le seleni o totoe."

 

O le toega o le tala o le galuega na tula'i ai le susuga Papali'itele Lauli'i Alofa mo lana folasaga, ma saunoa, "O la'u vaega i lenei ripoti o le galuega, o le Fa'afetai tele. Ona o le tofia ma le mau fa'atuatuaina o le Paramount Builders mo le tou galuega. Ua le manatu o se galuega e faia mo i tatou uma, ae o le galuega ina ia Vi'ia le Atua. Atonu e le matagofie mai le va'aiga i fafo, ae fa'ato'a fa'aatoatoa e le mana o le Atua pe a o'o ina suluia mai ona fa'amalamalama le pupula matagofie o le Atua.”

 

I le avanoa o le Kovana Sili Lolo Moliga, sa tula'i ai le afioga le Peresetene o le Senate, le afioga le Tama'ita'i o le Ao, Gaoteote Pala'ie ma ia fa'amanatu i le aofia, "O le Maota fa'aleaganu'u na fa'apea o le Maota na fau i Amoa, ua lau i ula ae pou i toa, e alu atu ai le mamalu ae afai fo'i e te savali ai e te va'aia lona matagofie. Peita'i o le Maota lena fa'aleaganu'u, peita'i o lenei Nila, o le Maota lava e faia ai tapua'iga osi i lo tatou Atua, e ona mea uma lava, lea ua tula'i, ma ua matagofie, ma ua mafai ona fa'apea, ua tatou faia se mea silisili, mo le Atua o atua ma le Ali'i o ali'i!"

 

"E le o le maota i lona tino mai, a'o le anofale ia fai ia mafai, ia liua ni agaga ma ia fagaina lelei i le Upu a le Atua, fa'aosofia le naunau ia vivi'i atili i le Atua, aua o mea na faia ai le tagata soifua e lo tatou Atua, ia maua sona vi'iga mai ia te'i tatou uma lava. Fa'afetai galulue, fa'afetai le gapatia i mea lelei ia vi'ia ai le Atua. Amene."

 

Na ia faliu fo'i ma fa'afetaia le aufaigaluega na latou toe fausia ia lelei le Maota o le Atua ua tula'i a'o se Nila i lona Laumua i Kanana Fou, "O le ala lenei na fa'apoto ai i tatou e le Atua soifua i lona atamai tele, sa ia galueaina fo'i o tatou loto ina ia tatou faigaluega lelei ma le fa'amaoni, ia lima lelei i tatou i tomai e matagofie ai mea tatou te faia, aua o ia lava, o le sosia o mea lelei uma.”

 

"Ua uma nei ona tusia upu o le pese, ae ua toe nei o le galuega a le Au Ositaulaga latou te fatia le pese ina ia leo malie lana aufaipese, ia vi'ia le Atua ae fia fa'afofogaina e ia a tatou taulaga osia mai lenei fale ositaulaga! O le Atua e fai mea lelei mo i tatou, e mana'omia fo'i e Ia lo tatou fai mea lelei mo Ia." Ona mae'a ai lea o lana saunoaga fa'aleta'ita'i o le Malo o Amerika Samoa.

 

O le lauga o lea sauniga mamalu na tula'i ai le susuga le Taitaifono o le Ekalesia Fa'apotopotoga Kerisiano i Samoa (EFKS), Tautiaga Senara FT, lea sa vala'auina fa'apitoa mo lea fa'amoemoe. Na masi'i mai fo'i le si'i fa'aaloalo a le EFKS ma le latou ta'ita'i lea sa taua'aoina ai le latou meaalofa e $30,000 ma le tele o Ie tetele o le Malo.