Ads by Google Ads by Google

Toe fa’amanatu e le Kovana i Pisinisi tulafono mo le fa’atauina mai o oloa


Le ali’i Kovana ia Lolo Matalasi Moliga [ata: foa'i]
ausage@samoanews.com

Ua tuuina atu nei e le afioga i le ali’i Kovana ia Lolo Matalasi Moliga se tusi i le aufai pisinisi tumaoti uma i le atunu’u, e toe fa’amanatu i ai auala e fa’atino ai fefa’atauaiga i le va o le malo ma pisinisi tua, mo le fa’atauina mai o ni oloa e mana’omia e le malo mai le atunuu poo fafo atu fo’i o Amerika Samoa.

 

Na taua e le tofa i le Tootoo ia Lolo i lana tusi i le aso 9 o Oketopa e fa’apea, o le Tausaga Tupe na mavae atu nei, na maitauina ai le tele o atugaluga na tula’i mai i le tuai lea ona totogi atu o tupe mo pisinisi tua, e tusa ai o oloa sa fa’atauina mai e le malo.

 

Ina ua toe faia se iloiloga i lenei mataupu aemaise ai o le sailia o le mafua’aga ua tuai ai ona totogi tupe a pisinisi tua, na manino mai ai, e mafua ona tula’i mai lea tulaga, o le fa’atamala lea o le pisinisi aemaise ai o le Ofisa o le malo sa latou osi feagaiga, i le usitaia lea o le ta’iala e tatau ai ona sainia pepa e faamaonia ai le oka o le a faia.

 

O le tusi la lenei e pei ona taua e le ali’i Kovana, o le a toe fa’amanatu ma lapataia ai le aufai pisinisi tumaoti i le atunu’u, ina ia aua ne’i toe fa’amatu’uina atu ni oloa poo nisi lava auaunaga i soo se lala poo se Ofisa o le malo o Amerika Samoa, se’i vagana ua sainia muamua le pepa e fa’amaonia ai le fa’atau o le a faia.

 

Soo se fa’atauga a le malo e faia i soo se pisinisi tua e atagia mai ai le le usitaia o le fautuaga ua tuuina atu, o le a le mafai loa ona totogi e le malo le tupe i le pisinisi sa fa’atau mai ai oloa.

 

O le Fa’atonusili o Ofisa a le malo, o ia lea ma lona Ofisa ua taoto atu i ai le malosi mo le totogiina o soo se fa’atau e fa’atinoina lea e le malo ma pisinisi tua e uia ala o le tulafono.

 

O le a le mafai lava ona totogi e le malo se tupe i soo se pisinisi latou te le usitaia pe mulimulita’i fo’i i ta’iala ua fa’ataoto atu i le tulafono.

 

Saunoa atili le ali’i Kovana e fa’apea, o le ta’iala lenei na tuuina atu i le Tausaga Faaletupe ua mavae atu, ma ua manatu ai fo’i le malo e toe fa’amalosia atili i le amataga o le tausaga tupe fou lenei ua amata, ina ia mautinoa ai e le toe tula’i mai ni isi fa’aletonu i le lumana’i.

 

O le kopi o lenei tusi ua tufatufaina atu i Fa’atonusili uma o le Kapeneta a le Kovana, faapea ai ni isi o le aufaigaluega Sinia a le malo o loo fesoota’i ma pisinisi tumaoti i le atunu’u.