Ads by Google Ads by Google

Toe fa’afo’i i le toese i Tafuna le ali’i pagota na loka i Fagaitua


[ata: foa'i]
ausage@samoanews.com

O le po o le aso Tofi o le vaiaso na te’a nei na toe fa’afo’i atu ai i le toese i Tafuna le ali’i pagota lea na taofia i le Ofisa o Leoleo i Fagaitua, ina ua masalomia lona fa’aaogaina o fualaau fa’asaina o le aisa a o i ai i Fagaitua.

 

Na fa’amaonia mai e se Leoleo o le toese i Tafuna, le toe fa’afo’i atu lea o le ali’i pagota o Olataga Wilson i le toese i le po o le as Tofi o le vaiaso na te’a nei, talu mai le silia i le 2 masina na taofia ai i Fagaitua, ona o le puipuiga lava i lona saogalemu.

 

O Wilson, o se isi lea e to’afa i ai i latou sa avea ma Leoleo i le falepuipui o Tamaiti i Tafuna (JDC), lea na pu’e fa’apagota ma molia i lo latou faia o gaioiga fa’asolitulafono i totonu o le falepuipui o tamaiti, e aofia ai le umia o fualaau fa’asaina, atoa ai ma le ave faagaoi o meaai mai totonu o le JDC.

 

Na taua e se molimau i le Samoa News e fa’apea, talu ai e leai se sela e loka ai ni pagota i le ofisa o Leoleo i Fagaitua, o le mafua’aga lena e sa’oloto ai lava Wilson i ana gaioiga e fai ao i ai i Fagaitua.

 

O le tele o taimi e fa’aaoga ai e Wilson le masini computer a Leoleo i totonu o le Ofisa, a fia moe, ona taoto lea i luga o lona fa’amalu i totonu lava o le ofisa, i tafatafa o le laulau o loo i ai le masini computer. Afai fo’i e fia ‘ai Wilson, ona alu lea i tua e kuka mai lana meaai, ona sau lea ua ‘ai i luma o le ofisa fa’atasi ai ma le Leoleo e tiute, ona toe fa’aauau fo’i lea o lana galuega o le nofo i luma o le computer i le aso atoa ma fa’asolo atu ai i le po.

 

Talu ona tula’i mai masalosaloga i le fa’aaoga lea e Wilson o fualaau fa’asaina o le aisa, sa leai lava se isi na ia ripotia lenei mataupu i le Ofisa o Leoleo.

 

Ae i le po o Iulai 29, 2018, na tula’i mai ai se fa’alavelave i le ofisa o Leoleo i Fagaitua, ma mafua ai loa ona tuuina atu e se tama’ita’i leoleo sa tofia e vaaia Wilson sana ripoti i lona Ta’ita’i Leoleo, i le masalomia lea o le fa’aaoga e Wilson o le fualaau fa’asaina o le aisa.

 

O le po e pei ona taua, sa na o le tama’ita’i Leoleo na tiute i Fagaitua e vaai Wilson, ae o le isi Leoleo la te to’alua i le la sifi po, e tiute mai lava o ia i le Ofisa autu o Leoleo i Fagatogo, e sauni ai e tali atu i ni valaau e tula’i mai i le itu i sasa’e pe afai e mana’omia le fesoasonai a Leoleo i ni fa’alavelave e tutupu mai.

 

Na taua e le molimau e fa’apea, o le ripoti fa’asaga ia Wilson lea na tuuina atu e le tama’ita’i Leoleo i le Ta’ita’i Leoleo, na fa’avae mai lea ina ua fiu le tama’ita’i e saili Wilson i totonu o le ofisa i lea po, ae vaaia o ia i fafo o le vaega e paka ai ta’avale, ma se mea o loo mumu i luma o ona foliga e atagia mai o se sikaleti o loo ula.

 

Ina ua vaaia e le tama’ita’i Leoleo ia Wilson, sa ia valaau ai loa e alu atu. A o savali agai atu Wilson i le tama’ita’i Leoleo, sa vaaia e le tama’ita’i Leoleo le tago o Wilson ua momono se mea i totonu o le taga o lona ofu vae o loo ofu. Na fesili le tama’ita’i Leoleo ia Wilson poo a ana mea sa ula, ae na ita Wilson ma fa’ali’i ma fai i le tama’ita’i Leoleo, e leai sana pisinisi e su’esu’e ai fua o ia ma ana mea o loo fai. Sa fa’ailoa fo’i e Wilson ia te ia, e leai ma se gaioiga fa’asolitulafono o ia faia.

 

Na taua e le molimau e fa’apea, e tele le avanoa e mafai ai e le tama’ita’i Leoleo ona ia sailia le tino o Wilson poo ia umia ni fualaau fa’asaina poo ni vaega e fa’aaoga e ula ai fualaau faasaina. Ae talu ai o le popole i lona saogalemu, o ia o le tama’ita’i ae o Wilson o le ali’i, e leai fo’i se isi Leoleo e mafai ona fesoasoani atu ia te ia pe afai e tula’i mai se fa’alavelave pe fa’aoolima le ali’i pagota ia te ia, na mafua ai loa ona faia le fa’aiuga a le tama’ita’i Leoleo na te le fa’atinoina lea tulaga.

 

O le aso Gafua o le vaiaso na te’a nei na logoina ai loa e le tama’ita’i Leoleo lona Ta’ita’i e tusa ai o lenei mataupu. Sa ia logoina fo’i sui o le Vaega e Suesueina Fualaau Fa’asaina a le Ofisa o Leoleo mo se fautuaga, ma faia ai loa le fautuaga e ala i le logoina lea o se sui o le Ofisa Fa’anofovaavaaia, ma aga’i atu ai loa le sui o lea Ofisa i le aso Tofi na te’a nei e faia se suega faapitoa mo Wilson.

 

A o le i faia e le sui mai le ofisa o Fa’amasinoga le suega a Wilson i le ofisa o Leoleo i Fagaitua, na ta’utino Wilson i le ali’i Ofisa ma ia fa’amaonia i ai, sa ia tagofia fualaau fa’asaina ao i ai i Fagaitua. O le faaiuga o lana suega sa faia, na faamaonia ai le i ai o le vailaau o loo maua i le pauta o le aisa i lona tino.

 

O Wilson e to’afa i ai Leoleo mai le JDC o loo molia i le faia o gaioiga fa’asolitulafono eseese i totonu o le falepuipui o tamaiti, e aofia ai le umia o fualaau fa’asaina, fa’ataga o fanau e sosola i tua mai le falepuipui, atoa ai ma le ave faagaoi o meaai mai totonu o le falepuipui o tamaiti.

 

Ua mae’a ona tali ioe Wilson i moliaga mamafa e 2 o le umia faasolitulafono o vaega o le pauta fa’asaina o le aisa, faapea ai ma le moliaga o le gaoi. I lalo o se maliliega ma le malo lea fo’i ua talia e le fa’amasinoga, na ta’utino ai Wilson e fa’apea, i le va o le aso 1 Aperila e oo atu ia Iulai 31, 2016 i Amerika Samoa, sa la ulaina ai ma le isi ali’i sa avea fo’i ma Leoleo ia Okesene Alo vaega o le pauta fa’asaina o le aisa.

 

Sa ia ioeina fo’i lona gaoia o meaai mai totonu o le potu e teu i ai meaai i le falepuipui o tamaiti e aunoa ma se fa’atanaga.