O le ali’i mai Saina lea ua ta’usala i le fa’alavelave lea na maua i ai e Leoleo i le 2016 fualaau fa’asaina, o se fana o le ituaiga o le 45 ma ni pulu fana, faapea ai ma vaega e fa’aaoga e i latou e tuleiina fualaau fa’asaina, ua poloaina e le Fa’amasinoga Maualuga ina ia toe fo’i i lona atunu’u pe a mae’a ona tuli lana fa’asalaga fa’a falepuipui i le toese i Tafuna.

O le vaiaso na te’a nei na tuuina mai ai le fa’asalaga a le Fa’amasinoga Maualuga fa’asaga i le ali’i o Tao Liu, 36 tausaga le matua mai Saina.

E 2 mataupu tau solitulafono mamafa na molia ai e le malo ia Liu. I le mataupu muamua, na molia ai o ia i moliaga o le umia faasolitulafono o aisa, umia faasolitulafono o mariuana, umia faasolitulafono o se fana e lei lesitalaina, atoa ai ma le umia o pulu fana. Ae i lalo o se maliliega sa latou faia ma le malo, na tali ioe ai Liu i moliaga o le umia faasolitulafono o aisa, umia faasolitulafono o mariuana, atoa ai ma le umia faasolitulafono o se fana e lei lesitalaina.

I le mataupu e 2, na tuuaia ai o ia e le malo i le moliaga mamafa e tasi o le sola ese mai le toese ao taofia ai o ia i lalo o le vaavaaiga a le malo. I lalo o se maliliega ma le malo, na tali ioe ai le ua molia i le moliaga o le sola i tua mai le toese.

Na ta’utino Liu i luma o le fa’amasinoga e fa’apea, i le masina o Aokuso 2016, na maua ai e Leoleo vaega o fualaau fa’asaina, o se fana, atoa ai ma pulu fana i totonu o lana ta’avale.

Sa ia ta’utino atili e fa’apea, a o taofia ai o ia i le toese mo lea mataupu, sa ia sola ai i tua i le masina o Novema 2016 e aunoa ma se fa’atagana mai le fa’amasinoga poo le malo.

Na fa’atoese Liu i le fa’amasinoga e tusa ai o lana solitulafono sa faia, ma ia talosagaina ai se avanoa e toe fo’i atu ai i lona aiga i Saina e tausi lona Tina ma lona aiga. Sa ia talosagaina fo’i le Fa’amasinoga mo se avanoa e toe fo’i ai i Saina ma ave lona atali’i e 2 tausaga le matua o loo taofia nei i lalo o le vaavaaiga a le Ofisa o Auaunaga ma Tautua Lautele a le mao (DHSS).

Na talosaga le loia a Liu ia Michael White mo se avanoa e fa’asala ai o ia i se fa’asalaga faanofovaavaaia, e aofia ai ma le poloaina o ia e tuua le teritori ae toe fo’i atu i Saina. Na tautino atili White e fa’apea, e le fesiligia le matuia o le solitulafono sa faia e le ua molia, ma ua ia lagona fo’i lona salamo mai lana solitulafono sa faia.

Na talosagaina e le loia a le malo ia Christy Dunn le fa’amasinoga ina ia fa’asala le ua molia i se fa’asalaga faanofovaavaaia, ae aofia ai ma le tuutuuga na te tuua ai le teritori ae toe fo’i atu i lona aiga i Saina.

Na fa’ailoa e Dunn i le fa’amasinoga e fa’apea, o le masina o Me 2016 na mae’a ai le aoga o le pepa nofomau a le ua molia, ma ua avea nei o ia ma tagata ua le tusa ma tulafono tau Femalagaaiga lona aumau ai i le atunu’u.

A o le i tuuina mai le faaiuga a le Fa’amasinoga, na saunoa le afioga i le Faamasino Sili ia Michael Kruse e fa’apea, o se tasi o itu o loo fia malamalama i ai le fa’amasinoga, o le mafua’aga na aumai ai Liu i Amerika Samoa. Ona e tusa ai ma le ripoti mai le Ofisa o Femalagaaiga, na aumai o ia na te fa’atinoina galuega e pei o le teu oloa mo le pisinisi a le Karaoke Bar i Satala.

Saunoa Kruse e faapea, e leai se malosi o le Vaega Iloilo a le Fa’amasinoga latou te talanoaina ai le mataupu e fa’atatau i le atali’i e 2 tausaga le matua a le ua molia. O le mataupu lena e gafa ma le Fa’amasinoga o Aiga (FDA).

E 40 masina lea ua poloaina e le fa’amasinoga e taofia ai Liu i le toese i Tafuna, o se tasi lea o tuutuuga o lana nofovaavaaia e 5 tausaga. O le a aofia ai ma le umi e 33 masina lea ua mae’a ona ia tuliina i le taimi nei.

A mae’a ona ia tuliina masina e 40 o le toese, ona ia tuua lea o le teritori ae toe fo’i atu i lona atunu’u ma aumau ai mo le umi e 5 tausaga o lana nofovaavaaia. Ua poloaina o ia ma lana sponsor la te totogiina le salatupe e $5,000.

Ua poloaina fo’i e Kruse le tuuina atu o le kopi o le faaiuga a le fa’amasinoga i le Pulesili o le Ofisa o Femalagaaiga a le malo, ina ia mafai ai ona tu’u le igoa o Liu i le Lisi o tagata e le tatau ona toe ulufale mai i le teritori.