Ads by Google Ads by Google

Toe faafo’i i Samoa le Tina e 11 tausaga o ova i le Teritory

ausage@samoanews.com

O le Tina e 42 tausaga le matua lea na faaauau pea ona aumau i Amerika Samoa ma lona aiga e ui ua 11 tausaga talu ona mae’a le aoga o lona ID, ua faatonu e le Fa’amasinoga Maualuga ina ia toe fo’i i Samoa ma aumau ai mo le umi e 5 tausaga o lana nofovaavaaia, ina ua ta’usala o ia i le moliaga mamafa o lona umia faasolitulafono o vaega o le laau fa’asaina o le aisa.

 

O le vaiaso na te’a nei na tula’i ai Lili Apolo i luma o le Fa’amasinoga Maualuga mo le lauina o lana fa’asalaga. O le ali’i loia fautua lagolago ia Rob McNeill na tula’i mo ia, ae o le ali’i loia sili lagolago ia Doug Lowe na tula’i mo le malo.

 

Na ulua’i tu’uaia e le malo ia Apolo i le moliaga mamafa o le umia faasolitulafono o vaega o le pauta fa’asaina o le aisa, lea e mafai ona fa’asala ai se tasi i le toese mo le umi e mafai ona oo atu i le 10 tausaga, ma le salatupe e mafai ona oo atu i le $20,000.

 

Ae i lalo o se maliliega na sainia e le ua molia ma le malo, lea fo’i na talia e le Fa’amasinoga Maualuga, na malie ai Apolo e sui lana tali tete’e i le ioe, i le moliaga na toe suia e le malo, ina ia faailoa ai le moliaga o le umia faasolitulafono o vaega o le pauta fa’asaina o le aisa, le moliaga e mafai ona fa’asala ai se tasi i le toese mo le umi e le sili atu i le 5 tausaga, pe faasala i le salatupe e le sili atu i le $5,000, poo le fa’asala fo’i i fa’asalaga uma ia e lua.

 

I le tali ioe ai o Apolo i le moliaga e pei ona ta’usala ai o ia e le Fa’amasinoga Maualuga, na ia ta’utino ai loa e faapea, i se taimi o le aso 11 o Ianuari o le tausaga nei i Vaitogi, Amerika Samoa, na ia umia faasolitulafono ai vaega o le pauta fa’asaina o le aisa e aunoa ma se faatanaga faaletulafono.

 

Na ta’utino atili Apolo e fa’apea, i le aso e pei ona taua, na taofi ai e Leoleo lana ta’avale i luga o le alatele i Vaitogi ina ua ia le usitaia tulafono i luga o le alatele. I le taimi na taofia ai e Leoleo lana ta’avale, sa i ai i totonu o lana ta’avale se paipa e ula ai le aisa faapea ai ma vaega o le aisa i totonu.

 

Na faatoese le ua molia i luma o le Fa’amasinoga e tusa ai o lana solitulafono sa faia, ma ia talosagaina ai se isi avanoa mo ia sei toe fo’i atu ai e tausi lana fanau e to’a 5 o loo latou matua misia lava o ia.

 

Sa taua e Apolo e fa’apea, o masina e tele na taofia ai o ia i le toese, ua ia lagona ai lona salamo e tusa ai o lana solitulafono, ma ua ia a’oa’oina ai fo’i ma se lesona taua i lona olaga, e le o se mea lelei le solitulafono.

 

Na ta’utino le ua molia e fa’apea, afai ae maua se isi ona avanoa mai le Fa’amasinoga, na te le toe solia lava se tulafono a le malo, na te le toe faia fo’i se gaioiga e ono avea ai o ia ma tagata e le usita’i i tulafono a le malo ma le Ofisa o Femalagaaiga a Amerika Samoa.

 

Na talosaga le loia a Apolo ia McNeill i le Fa’amasinoga mo se faasalaga faanofovaavaaia. Na taua e le ali’i loia e fa’apea, e to’a 5 le fanau a le ua molia, ma ua tele fo’i vaega o le olaga aoaoina o lana fanau ua misia e le ua molia, talu mai le taimi na taofia ai o ia i le falepuipui mo le 8 masina.

 

Na lagolagoina e le loia a le malo ia Lowe le talosaga a McNeill mo se fa’asalaga faanofovaavaaia mo Apolo. Na taua e le itu a le malo e fa’apea, e talitonu i latou, ua matua salamo lava le ua molia e tusa ai o lana solitulafono, ma ua ia aoaoina fo’i se lesona aoga mo lona olaga i le lumana’i.

 

A o le i malolo le Fa’amasinoga mo le iloiloina o sana faaiuga, na fesiligia e le Fa’amasinoga se sui mai le Ofisa o Femalagaaiga e tusa ai o le mafua’aga ua tele ai tausaga o aumau pea Apolo i le atunuu e ui ua mae’a le aoga o lona ID e faataga ai ona aumau i Amerika Samoa.

 

Na taua e le susuga a Jason Laumoli i luma o le Fa’amasinoga e faapea, e tusa ai ma faamaumauga a le Ofisa o Femalagaaiga, o le aso 25 o Iulai o le 2008 na mae’a ai le aoga o le ID nofomau a Apolo. Talu mai lea taimi, e le i toe i ai lava se gaioiga a le ua molia poo lana sponsor e toe faafou ai lona ID.

 

I le tuana’i ai o tausaga e 3, na faia ai loa e le Komiti Faafoe a le Ofisa o Femalagaaiga le faaiuga i le aso 9 o Iulai 2011 ina ia tapunia aloaia loa le faila a Apolo, ina ua le mafai ona toe faafou lona ID nofomau i le atunu’u.

 

Na fesili ia McNeill i le susuga a Laumoli, poo o le a le gaioiga e faia e Apolo ina ia mafai ai ona toe faafou lona ID nofomau auala mai i lana sponsor fou lea ua maua, ae na faamanino e le susuga a Laumoli e faapea, talu ai ua tapunia le faila a Apolo, e le mafai ona nofo pea o ia i le teritori pe afai o lo o i ai se fuafuaga e toe faafou lona ID, ae tatau ona toe fo’i i lona atunu’u, ae toe amata mai le faagasoloina o pepa talosaga i le sitepu muamua.

 

Pau le itu na faamanino e Laumoli i lana saunoaga, afai ae tuuina atu se talosaga mo se ID fou mo Apolo, o le a i ai i le Komiti Faafoe a le Ofisa o Femalagaaiga le malosi e talia ai le talosaga pe teena fo’i, fuafua lava i le tulaga o lana solitulafono lea ua faamaonia e le Fa’amasinoga.

 

O se tasi o itu na taua e le afioga i le ali’i Fa’amasino ia Fiti Sunia e ofo ai le Fa’amasinoga, o le tele o tausaga o aumau pea Apolo i Amerika Samoa e aunoa ma se faatanaga faaletulafono.

 

Saunoa Sunia e fa’apea, e foliga mai o loo nofonofo lava le Ofisa o Femalagaaiga e aunoa ma le taumafai e saili tagata o loo ova i le atunuu e pei o Apolo, ae na o le faatalitali lava i le tai e fati mai ma aumai i latou nei ma tuu atu i o latou lima.

 

O le talitonuga o le Fa’amasinoga e pei ona saunoa Sunia, o le tiute o le Ofisa o Femalagaaiga, o le faamalosia lea o tulafono tau femalagaaiga, e ala i le sailia o tagata ua mae’a le aoga o pepa nofomau e nonofo ai i le atunuu ae toe faafo’i i atunu’u na malaga mai ai.

 

FAASALAGA

 

E tusa ai o le saunoaga a Sunia, ina ua taofi e Leoleo le ta’avale a Apolo i le po o le aso 11 o Ianuari o le tausaga nei, sa vaaia ai e  Leoleo foliga fefe ma le popole o le ua molia ina ua fesiligia o ia e tuu atu sona ID poo lona laisene ave ta’avale fo’i e fa’amaonia ai o ia.

 

Na taofi e Leoleo le ta’avale ina ua le maua se pepa e faamaonia ai le ua molia i Leoleo. Ae ina ua saili e Leoleo totonu o le ta’avale, na maua i ai vaega o fualaau fa’asaina.

 

E 5 tausaga na manatu le Fa’amasinoga e fa’asala ai Apolo, peita’i o lea ua fa’amalumalu lona tuliina o lea fa’asalaga, ae o le a faanofovaavaaia o ia mo le 5 tausaga i lalo o tuutuuga e ao ona latou usita’i i ai.

 

O ia tuutuuga e aofia ai lona tuliina o masina e 20 i le Toese i Tafuna, e faitau ai ma le 8 masina lea na taofia ai o ia i le Toese ao faagasolo ai taualumaga o lana matuapu. A mae’a ona tuli lana fa’asalaga, ona ia tuua lea o le atunu’u ae toe fo’i atu i Samoa mo le umi o lana nofovaavaaia.

 

E le mafai ona ia toe ulufale mai i le teritori, se’i vagana ua tuuina atu se ID fou mai le Ofisa o Femalagaaiga e ulufale mai ai. E le mafai fo’i ona ia toe ulufale mai i se pemita.

 

Afai ae toe ulufale mai le ua molia i le teritori ina ua talia e le Komiti Faafoe a le Ofisa o Femalagaaiga lana talosaga ma tuu atu i ai lona ID fou, ua poloaina o ia na te totogi le salatupe e $1,000.