Ads by Google Ads by Google

Toe fa’afo’i i Samoa se ali’i na maua e leai ni pepa nofomau


[ata: foa'i]
ausage@samoanews.com

O le vaiaso na te’a nei na faia ai se poloaiga a le afioga i le ali’i Fa’amasino ia Fiti Sunia, e toe fa’afo’i ai se ali’i e 19 tausaga le matua mai Samoa na fa’amaonia lana solitulafono o le tagofia o le ‘ava malosi ae le i atoa lona 21 tausaga le matua i lalo o le tulafono.

 

Ae o le itu e sili ona maofa ai le fa’amasinoga i le mataupu a lenei ali’i, e 2 tausaga o nofo fa’asolitulafono o ia i Amerika Samoa e aunoa ma ni pepa nofomau, peita’i ane ua faia lona aiga, to’alua ona alo, sa faigaluega fo’i o ia e aunoa ma se fa’atanaga mai le Komiti Fa’afoe a le Ofisa o Femalagaaiga.

 

Na ulua’i tu’uaia e le malo le ali’i o Tavita Fuifaitala i moliaga mama e 2 o le fa’atupu vevesi i nofoaga faitele atoa ai ma le tagofia o le ‘ava malosi ae lei atoa e 21 tausaga le matua. Ae i lalo o se maliliega ma le malo, lea fo’i na talia e le fa’amasinoga, na tali ioe ai le ua molia i le moliaga o le tagofia o le ‘ava malosi ae lei atoa le 21 tausaga le matua, ae solofua e le fa’amasinoga le isi moliaga sa totoe ai i le pepa o le tagi sa fa’aulu e le malo.

 

I le tali ioe ai o Fuifaitala i le moliaga e pei ona ta’usala ai o ia e le malo, sa ia ta’utino ai e fa’apea, i se taimi o le masina o Iuni na te’a nei, sa ia laulauvavale ai ma fa’aumuumu solo i totonu o le afioaga o Pago Pago, ina ua ia fa’asua’ava i le leva o le po.

 

O se inugapia sa faia a le ua molia ma nisi o ali’i talavou i Pago Pago, na mafua ai loa ona tula’i mai se faaletonu ina ua pisapisao i latou ma taua’imisa, ma i’u ina vili ai e ni isi o aiga tuaoi ia Leoleo mo se fesoasoani.

 

I fa’amaumauga a le Ofisa o Femalagaaiga sa tu’uina atu i le fa’amasinoga, sa taua ai le tulaga lea, o Fuifaitala, na ulufale mai i Amerika Samoa i se pemita e 30 aso i le aso 15 Aperila 2016, na aumau ai lava fa’asolitulafono i Amerika Samoa seia oo i le masina na te’a nei na pu’e fa’apagota ai o ia e Leoleo.

 

Na taua e le ua molia i le fa’amasinoga, o ia e faigaluega, e fai lona aiga, e to’alua fo’i si ana fanau laiti.

 

O fa’amaumauga nei na matua maofa ai le afioga i le ali’i fa’amasino ia Sunia, ma ia fesiligia ai le sui o le Ofisa o Femalagaaiga sa i ai i le fa’amasinoga, i le mafua’aga ua ala ai ona i ai umi Fuifaitala i le atunu’u e aunoa ma ni pepa nofomau.

 

“E atagia mai i fa’amaumauga fa’asaga i lenei ali’i talavou, le tele o le fa’aletonu o le pito laau a le Ofisa o Femalagaaiga o loo i ai. O lea sa faigaluega le ua molia e aunoa ma se fa’atanaga fa’aletulafono, ua silia fo’i ma le 2 tausaga o nofo o ia i le atunu’u e aunoa ma pepa nofomau,” o le saunoaga lea a Sunia.

 

O isi fa’amaumauga na maua e le fa’amasinoga, e ese le itu o le afioaga i Pago Pago e alala ai le sponsor, ese fo’i le aiga lea na nofo ai Fuifaitala.

 

Na taua e Fuifaitala i le fa’amasinoga, o ia sa nofo i le fale o le tagata e suafa ia Mala, ae le o lana sponsor.

 

Na fesili Sunia pe aisea ua nofo ai i le fale o Mala, na tali le ua molia, “Na ou sau i Amerika Samoa ou te faigaluega mo Mala, ae le o la’u sponsor.”

 

E 24 masina lea ua faanofovaavaaia ai e le fa’amasinoga Fuifaitala i lalo o tuutuuga e ao ona ia usita’i i ai. O ni isi o ia tuutuuga e aofia ai le fa’asa lea ona ia toe soli se tulafono, ma ia ona tuua vave loa le atunu’u ma aumau ai i fafo atu mo le umi o lana nofovaavaaia.

 

O le afiafi o le aso Tofi o le vaiaso na te’a nei, ina ua mae’a le iloiloga a Fuifaitala sa faia i luma o le fa’amasinoga i le taeao, na malaga ese atu ai loa o ia ma Amerika Samoa, e ala i le va’a o le Lady Naomi mo Samoa.

 

Ua fautuaina fo’i le tuuina atu o le igoa o le ua molia i le Ofisa o Femalagaaiga, ina ia tu’uina atu i le latou lisi o tagata e le tatau ona toe ulufale mai i le atunu’u, ona o lea ua fa’amaonia lo latou le usitaia tulafono a le malo.