Ads by Google Ads by Google

Toe faafo’i i Samoa se ali’i i lona le usita’ia poloaiga Fa’amasinoga


[ata: SN]
ausage@samoanews.com

Ua poloaina e le Fa’amasinoga Maualuga le toe fa’afo’i o le ali’i o Harry McCarthy i Samoa, e mafua mai i lona le usitaia lea o poloaiga a le Fa’amasinoga sa tuuina atu i le 4 tausaga talu ai.

 

O se tasi o poloaiga na tuuina atu e le Fa’amasinoga ia McCarthy mo lana nofovaavaaia e 10 tausaga, ina ua ta’usala o ia i le fa’alavelave lea na ia fa’aoolima ai i lona tuafafine e fa’aaoga ai se samala i le 2014, o le avea lea o ia ma tagata e tausi i tulafono a le malo, ma ia aua ne’i ona toe tagofia le ‘ava malosi pe soli fo’i se tulafono a le malo.

 

Faatoa 3 tausaga talu ona amata le nofovaavaaia a McCarthy ae toe molia fo’i o ia i le solitulafono mamafa o le faaoolima i le tulaga lua. O lea solitulafono na mafua mai ina ua ‘ona le ua molia ma ia fa’aaoga ai fo’i se samala e fa’aoolima ai i se tasi tagata, e pei ona fa’ailoa i fa’amaumauga a le fa’amasinoga.

 

O le vaiaso na te’a nei na tula’i ai McCarthy i luma o le fa’amasinoga maualuga mo le tuuina atu o lana fa’asalaga.

 

O le afioga i le alii Fa’amasino ia Elvis P. Patea na taulimaina le mataupu a le ua molia, fa’atasi ai ma le lagolagosua a afioga i alii Fa’amasino Lagolago ia Mamea Sala Jr ma Muasau Tofili.

 

O le alii loia ia Michael White na tula’i mo le ua molia, ae o le ali’i loia ia Woodrow Pengelly na tula’i mo le malo.

 

E to’alua molimau na valaau e le itu a le ua molia, la te tuuina atu ni fa’amatalaga e fesoasoani ai i se fa’asalaga mo le ua molia. O ia molimau e aofia ai le faletua o McCarthy atoa ai ma lona tuafafine.

 

Na taua e le faletua a le ua molia i luma o le fa’amasinoga le tele o le a’afiaga ua feagai ma lo la aiga, talu ona loka lona to’alua i le falepuipui. Sa ia faailoa e fa’apea, ao lei tula’i mai lenei fa’alavelave, sa faigaluega lona to’alua e fesoasoani ai i le tausiga o le aiga. O le taimi nei, ua toe lava o ia ma le la pepe le aiga, ua leai se isi e fa’alagolago i ai le tausiga o le la pepe.

 

Na talosaga le faletua o McCarthy i le fa’amasinoga mo se avanoa e toe tatala atu ai le ua molia i tua e saili sana galuega e tausi ai le la aiga.

 

Na taua e le tuafafine a le ua molia e fa’apea, o McCarthy o se ali’i e lagolago malosi i le latou aiga. Ao lei tula’i mai le fa’alavelave e pei ona taofia ai o ia i le toese, sa faigaluega o ia e fesoasoani ai i le tausiga o le aiga. O ia fo’i e fa’alagolago ma lima taumatau i ai le aiga, ona latou te le o toe mafuta ma o latou matua. O le latou Tina o loo i Utah i Amerika ae o le latou Tama ua maliu.

 

Na talosaga le loia a McCarthy i le fa’amasinoga ina ia fa’asala le ua molia i se fa’asalaga fa’a falepupui, e aofia ai ma le poloaiga ina ia nofo pea o ia i Amerika Samoa.

 

Na taua e White e fa’apea, e ui o McCarthy na fanau i Samoa, ae o lona olaga atoa o Amerika Samoa, e le gata na tupu a’e ai o ia ae sa aoga ma fa’au’u mai ai, seia oo lava ina avea o ia ma tagata matua ma faigaluega mo lona aiga.

 

Na taua atili e White e fa’apea, e le tete’e o ia i le matuia o le solitulafono sa faia e le ua molia, peita’i e i ai lona talitonuga e tatau ona auai McCarthy i ni aoga fa’a faufautua e fesoasoani ai i le tulaga o le ita.

 

Na finau White e fa’apea, e leai ma se aoaoga e maua e McCarthy pe afai ae taofia o ia i le falepuipui mo se taimi umi.

 

Na faafetaia e le loia a le malo molimau a le faletua a le ua molia ma lona tuafafine, e tusa ai o fa’afitauli ua tutupu i le aiga talu ona loka le ua molia i le toese. Ae i le silasila a le malo, e leai se lesona na aoaoina e McCarthy mai le avanoa na tuuina atu e le fa’amasinoga ia te ia i le 2014.

 

Na finau le loia a le malo i le fa’amasinoga, ina ia fa’asala McCarthy i se fa’asalaga fa’a falepuipui, a mae’a ona ia tuliina lea fa’asalaga, ona toe fa’afo’i lea o ia i Samoa.

 

Saunoa le afioga i le ali’i Fa’amasino ia Patea e fa’apea, e le mama i le fa’amasinoga le talosaga e fa’atatau i le mana’omia o McCarthy i totonu o lona aiga, peita’i e tatau fo’i ona silasila toto’a le fa’amasinoga i le saogalemu o le atunu’u lautele ma le tulaga ita o le ua molia.

 

Saunoa atili Patea e fa’apea, sa tuuina atu muamua e le fa’amasinoga le avanoa ia McCarthy e fa’aleleia ai lona olaga, peita’i na te lei fa’aaogaina lea avanoa, ma ua manatu ai loa le fa’amasinoga, o le a tuuina atu se aoaoga mo ia.

 

E 5 tausaga lea ua nofovaavaaia ai McCarthy i lalo o tuutuuga e ao ona ia usita’i i ai. O ni isi o ia tuutuuga e aofia ai lona tuliina o masina e 20 i le toese i Tafuna. A mae’a ona tuli lana fa’asalaga fa’a falepuipui, ona ia tuua lea o le atunuu ae toe fo’i atu i Samoa ma aumau ai mo le umi o lana nofovaavaaia.

 

Ua poloaina fo’i o ia na te totogi le tupe e $79 mo le pili o le falema’i a le sa a’afia i lana solitulafono.