Ads by Google Ads by Google

Toe faafo’i i Samoa le alii na ta’usala i le umia o fualaau fa’asaina


[ata: foa'i
ausage@samoanews.com

O le ali’i mai Samoa lea ua ta’usala i le moliaga o le umia faasolitulafono o vaega o le pauta fa’asaina o le aisa, ua poloaina o ia e le fa’amasinoga maualuga na te tuua le atunu’u ae toe fo’i atu i Samoa mo le 5 tausaga o lana faasalaga faanofovaavaaia.

 

O le vaiaso na te’a nei na tula’i ai Soo Savelio i luma o le fa’amasinoga maualuga mo le lauina o lana fa’asalaga. O le ali’i loia fautua lagolago ia Rob McNeill na tula’i mo ia, ae o le tama’ita’i loia sili lagolago ia Laura Garvey na fai ma sui o le malo.

 

Na ulua’i tu’uaia e le malo ia Savelio i le moliaga mamafa o le umia faasolitulafono o vaega o le pauta faasaina o le aisa, o se solitulafono mamafa e mafai ona fa’asala ai o ia i le toese mo le umi e le itiiti ifo i le 5 tausaga pe sili atu fo’i i le 10 tausaga, poo le fa’asala fo’i i le salatupe e le itiiti ifo i le $5,000 ae le sili atu i le $20,000.

 

Ae i lalo o se maliliega na sainia e Savelio ma le malo, sa ia tali ioe ai i le moliaga feololo na toe teuteu e le malo, lea e mafai ona fa’asala ai o ia i le toese mo le umi e le sili atu i le 5 tausaga, poo le salatupe e le sili atu i le $5,000, poo le fa’asala fo’i i fa’asalaga uma ia e lua.

 

Ua ta’utino Savelio e fa’apea, i se taimi o le aso 1 o Novema 2018, sa ia umia faasolitulafono ai vaega o le pauta fa’asaina o le aisa.

 

Na ta’utino atili Savelio e fa’apea, sa la i ai fa’atasi ma le ali’i o Sharnel Sagote i le nofoaga e aga’i i luga o le mauga o Logotala i le taimi na aga’i atu ai Leoleo e saili le ali’i o Tautua Letasi, poo Kovaga fo’i e pei ona iloa ai o ia e le to’atele.

 

Ina ua siaki e leoleo lona tino i le aso lea, na maua i ai pepa iila o lo o i ai vaega o le pauta fa’asaina o le aisa.

 

Na faatoese Savelio i le fa’amasinoga e tusa ai o lana solitulafono, ma ia talosagaina ai se avanoa e toe fo’i ai i Samoa e tausi ona matua ma fai sona aoga i lona aiga.

 

Talu ai o tulaga fa’aletonu i pepa nofomau a Savelio, na mafua ai ona talosaga lana loia mo se avanoa e toe faafo’i ai ia i Samoa, o se tuutuuga lea o lana faanofovaavaaia.

 

I le mae’a ai ona iloilo e le fa’amasinoga o faamatalaga uma e uiga i lenei mataupu, na faasala ai loa Savelio i le toese i Tafuna mole 5 tausaga. Ua faamalumalu le tuliina o lea faasalaga, ae ua nofovaavaaia ia mo le 5 tausaga i lalo o tuutuuga e ao ona usita’i iai.

 

O nisi o ia tuutuuga e aofia ai lona tuliina o masina e 20 i le toese i Tafuna e aunoa ma le tatalaina o ia i tua. O le a faamalumalu le tuliina ole 14 masina o loo totoe o lana faasalaga faa falepuipui, ae ua faaaoga le 6 masina sa taofia ai o ia i le toese e fai ma ana faasalaga.

 

Ua poloaina fo’i o ia ina ia tuua loa le teritori ae toe fo’i i Samoa ma aumau ai mo le  5 tausaga o lana nofovaavaaia.

 

O le mataupu lenei na amata mai i se ripoti e fa’atatau i se tama’ita’i e 21 tausaga, na ave faamalosi e se alii fa’atasi ai ma se ta’avale rental i le aso 1 o Novema 2018.

 

Na taua e le fafine na ia ripotia lenei mataupu i Leoleo e fa’apea, o le tagata e igoa ia Tautua “Govana Fiti” Letasi mai Logotala, na ia avea faamalosi lana ta’avale rental, ma avatu fa’atasi atu ai lava ma lona niece e 21 tausaga le matua.

 

Na aga’i atu Leoleo i  Logotala, lea fo’i e iloa i le isi igoa o “LE FILIFILI” e saili le fale o Letasi. E taunu’u atu Leoleo i le auala e aga’i i luga i Logotala, o loo toso mai le filifili u’amea e poloka ai ta’avale, ae o loo nofonofo ai ni ali’i se to’alua i luga o se ogalaau e leoleo le filifili u’amea.

 

O i la'ua nei o Soo Savelio ma Sharnel Sagote.

 

Na fesili Leoleo pe la te iloa se tagata e igoa ia Letasi, ae na tali Sagote, e lei leva na aga’i atu i luga o le mauga i Logotala, o loo alu atu i le ta’avale rental. A o talatalanoa Leoleo ma i laua e to’alua ua molia, na vaaia le paepae solo o pepa iila laiti ia e masani ona fa’aaoga e utu ai i totonu le aisa.

 

Na vaaia fo'i e Leoleo le fai ma fetagofi o i laua i totonu o taga o la ofu, e foliga mai o loo i ai se mea o loo la taumafai e aveese.

 

Na talosaga Leoleo pe mafai ona saili o la tino. O lea na maua ai pepa iila atoa ai ma paipa tioata o loo i ai le pauta fa’asaina o le aisa.

 

E 2 paipa tioata na maua i le taga taumatau o le ofu a Savelio, ae o le taga agavale na maua ai le isi paipa tioata o loo i ai le aisa. O Sagote na maua i le taga taumatau le tinoitupe e $506 faapea ai ma se pepa iila o loo i ai le aisa, ae o le taga agavale sa maua ai le tele o pepa iila e fa’aaoga e utu ai le aisa.

 

Na faia se suega ma faamaonia ai, o le pauta pa’epa’e sa maua ia te i laua, o le aisa.

 

Na taua e Sagote i Leoleo e fa’apea, i le taeao o le aso lea, na tu’u atu ai e Letasi pepa iila o loo i ai le aisa ia te ia ma le fa’amoemoe na te fa’atau atu i isi tagata. E $50 i le pepa iila e tasi.

 

Na ioe fo’i Savelio i Leoleo, o le aisa sa maua ia te ia, o mea na avatu e Letasi.