Ads by Google Ads by Google

Toe fa’afo’i i Samoa le ali’i na fa’aoolima i lona nephew i le agaese


Setefano Petelo, lea fo’i e iloa i le isi igoa o Setefano Vaifale. [ata AF]
ausage@samoanews.com

O le ali’i e 55 tausaga le matua lea na ia fa’aaoga le agaese e fa’aoo ai manu’a i lona nephew i le amataga o le tausaga nei, ua poloaina e le Fa’amasinoga Maualuga lona tuua o le teritori ma aumau ai i fafo atu o le atunu’u mo le umi o lana nofovaavaaia, pe afai ae mae’a ona tuli lana fa’asalaga fa’a falepuipui e 20 masina i le toese i Tafuna.

 

O se tasi o itu na tele ai fesili a le afioga i le ali’i Fa’amasino Sili ia Michael Kruse i le mataupu a le ua molia, o le mafua’aga e ala ai ona lua igoa e iloa ai o ia e tagata.

 

O le vaiaso na te’a nei na tula’i ai Setefano Petelo i luma o le fa’amasinoga mo le lauina o lana fa’asalaga, ina ua fa’amaonia e le fa’amasinoga le moliaga mamafa o le fa’aoolima i le tulaga lua na tu’uaia ai o ia e le malo.

 

Ae pei ona taua i totonu o le ripoti a le Ofisa Fa’anofovaavaaia, e iloa fo’i le ua molia i le isi igoa o Setefano Vaifale. Na fesili Kruse ia Petelo pe i ai se isi ona igoa e ese mai ia Setefano Petelo, na tali le ua molia, sa valaau muamua o ia ia Setefano Vaitele.

 

Ae i le tausaga e 2005 ina ua tula’i i luma o le fa’amasinoga fa’aitumalo, na fa’atonu ai loa o ia e le afioga i le ali’i Fa’amasino sa i ai i lena vaitau o Malaetasi Sialega, lea ua tuumalo, e aua ne’i ona toe fa’aaogaina le fa’ai’u o Vaifale, a ia suia lona fa’ai’u ia Petelo.

 

Sa fesili Kruse ia Petelo poo ai lona igoa moni o loo i luga o lona tusi folau, na tali le ua molia, o Setefano Petelo. Na toe fesili Kruse poo fea e oso mai ai le igoa o Setefano Vaifale, na tali le ua molia, o lona igoa lea o loo i luga o le pepa fanau. Na vaaia le fa’anunumi o le muaulu o le ali’i Fa’amasino i le felavasa’i solo o tali a le ua molia.

 

Na ulua’i tuuaia Petelo i moliaga e 3, lea e aofia ai le moliaga mamafa o le faaoolima i le tulaga lua, atoa ai ma moliaga mama e 2 o le faaoolima i le tulaga tolu ma le fa’atupu vevesi i nofoaga faitele. Ae i lalo o se maliliega na ia sainia ma le malo, na ia tali ioe ai i le moliaga mamafa o le faaoolima i le tulaga lua, ae solofua e le fa’amasinoga moliaga mama e 2 na totoe ai i le pepa o le tagi na fa’aulu e le fa’amasinoga fa’asaga ia te ia.

 

I le tali ioe ai o le ua molia i le moliaga e pei ona ta’usala ai o ia e le fa’amasinoga, na ia ta’utino ai e fa’apea, i se taimi o le aso 30 Ianuari 2018, sa ia fa’aoo ai manu’a i lona nephew e ala i lona sasaina lea o lona ulu i le sapelu ma manu’a tigaina aio ia.

 

Ina ua maua lona avanoa i luma o le fa’amasinoga, na fa’atoese ai le ua molia e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i tua e tausi lona aiga, aemaise lava lona to’alua ma lana fanau. Sa ia ta’utino i le fa’amasinoga, ua lagona lona salamo moni e tusa ai o lana solitulafono.

 

“Ou te ta’utino atu i lau afioga i le fa’amasino sili, ou te le toe tula’i lava i luma o lenei fale i se isi solitulafono. O le fa’alavelave na mafua ai ona taofia a’u i le falepuipui, na mafua mai ina ua vave lo’u ita, atoa ai ma le fa’aosooso mai o le tiapolo ia te a’u, lea na mafua ai loa ona ou fa’atinoina lenei solitulafono,” o le fa’amatalaga lea a Petelo.

 

Na talosaga lana loia fautua ia Michael White mo se fa’asalaga faanofovaavaaia, ae aofia ai le avanoa e auai atu ai le ua molia i ni aoaoga fa’afaufautua, e fesoasoani ai i le tulaga o le ita.

 

Ae na finau le loia a le malo ia Woodrow Pengelly, ina ia fa’asala le ua molia i se fa’asalaga fa’a falepuipui, ae aofia ai ma le tuutuuga o lona tuua lea o le atunu’u ae toe fo’i atu i Samoa mo le umi o lana nofovaavaaia.

 

Na fa’ailoa e Kruse ia Petelo e fa’aea, e foliga mai i fa’amaumauga a le fa’amasinoga, o ia e i ai lona fa’afitauli i le tulaga o le ita. O le tausaga e 2005 na ta’usala ai fo’i o ia i le moliaga o le faaoolima i le tulaga tolu, e mafua mai i le fa’alavelave lea na ia alu ai ma se sapelu i lona to’alua ina ua tula’i mai se la feeseeseaiga, a o sii e lona to’alua le la pepe e 8 masina.

 

Ina ua iloa atu e lona afafine e 4 tausaga lona matua lana gaioiga sa taumafai e fai, na mafua ai loa ona savali atu lona afafine ia te ia, peita’i sa ia faliu ane loa ma fasi fa’amo’amo’a lona afafine ma manu’a ai o ia.

 

E 5 tausaga na manatu le fa’amasinoga e fa’asala ai le ua molia, peita’i ua fa’amalumalu lona tuliina o lea fa’asalaga, ae o le a faanofovaavaaia o ia mo le 5 tausaga i lalo o tuutuuga e ao ona ia usita’i i ai. O ni isi o ia tuutuuga e aofia ai lona tuliina o masina e 20 i le toese i Tafuna.

 

Afai ae mae’a ona ia tuliina masina e 12 i le toese i Tafuna, ona taofi loa lea o le palenni o loo totoe o lana fa’asalaga e 20 masina, ae ona tuua loa le teritori ae toe fo’i atu i Samoa ma aumau ai mo le umi o lo o totoe o lana nofovaavaaia e 5 tausaga.

 

Saunoa atiti Kruse e fa’apea, o le fa’asalaga ua tuuina atu e le fa’amasinoga, ina ia puipuia ai le toe tula’i mai o ni isi fa’alavelave matuia faapenei i le va o le ua molia ma lona aiga, aemaise ai lava le fa’aaogaina o a’upega mata’utia.