Ads by Google Ads by Google

Toe fa’afo’i mai Amerika Samoa ia Steven Tuato’o e tali ona moliaga

ausage@samoanews.com

O le vaiaso na te’a nei na toe fa’afo’i mai ai i Amerika Samoa mai le setete o Uosigitone le ali’i sa avea muamua ma Leoleo, lea na sola talu mai le masina o Novema o le tausaga na te’a nei, ao sauni ai le malo e faila moliaga o le umia o fualaau fa’asaina fa’asaga ia te ia.

 

O le taeao o le aso Lulu na te’a nei na tula’i ai Steven Tuato’o i luma o le fa’amasinoga fa’aitumalo, ma fa’atulaga ai loa e le afioga i le ali’i fa’amasino ia Fiti Sunia le taofia pea o ia i le toese i Tafuna e aunoa ma se tupe e tatala ai i tua.

 

O loo tu’uaia Tuatoo i moliaga mamafa e 4 e aofia ai le umia faasolitulafono o vaega o le laau faasaina o le mariuana, umia faasolitulafono o le pauta o le aisa, umia o a’upega mata’utia, atoa ai ma le sola ese ma le atunu’u ina ia le mafai ai ona molia o ia. O loo tu’uaia fo’i o ia i le moliaga mama e tasi o le umi o se a’upega fa’asaina.

 

O le aso 10 o Aokuso lea ua fa’atulaga e faia ai lana ulua’i iloiloga, ma ua toe taofia nei o ia i le toese e aunoa ma se tupe e tatala ai o ia i tua.

 

O Tuato’o e to’atolu i ai i latou na pu’e fa’apagota e Leoleo i se latou osofaiga sa faia i le aso 9 Novema 2017 i se fale i Taputimu, o se fale i Alofau, atoa ai ma luga o le alatele i Pago Pago.

 

O i latou e to’atolu e aofia ai Coody Wood, Taisia Lemalie ma Tuato’o. Na taofia uma i latou nei e to’atolu i le toese i Tafuna, i le mae’a ai lea ona pu’e fa’apagota o i latou i le taeao ia Novema 9, 2017 ma le fa’amoemoe e tatau ona tutula’i i luma o le fa’amasinoga i le aso e sosoo ai.

 

Na taofia uma i latou nei mo le umi e ta’i 48 itula, e fa’atali ai le taimi e faila ai e le malo le latou tagi fa’asaga ia tei latou. Peita’i na tatala i tua Tuatoo ina ua mae’a le 48 itula na taofia ai, ae lei failaina lava e le malo le tagi fa’asaga ia te ia, ma ia tuua ai loa le atunu’u.

 

O le masina o Aperila o le tausaga nei na loka ai o ia e leoleo i le setete o Uosigitone i Amerika ma molia ai i lona le usitaia lea o le poloaiga a le fa’amasinoga, lea e fa’asa ai ona ia fa’afeso’ota’iina lona to’alua.

 

O le mae’a ai o le mataupu e pei ona ta’usala ai o ia i lona le usitaia o le poloaiga a le fa’amasinoga i Uosigitone, na toe fa’afo’i mai ai loa o ia i le atunu’u e tali i tu’uaiga fa’asaga ia te ia.

 

O loo taua i le tagi a le malo e fa’apea, o se taimi o le masina o Me o le tausaga na te’a nei, na fa’ailoa ai e se molimau fa’atuatuaina i Leoleo, le a’afia lea o Tuatoo i gaioiga e fa’atau atu ai fualaau fa’asaina i ni isi o tagatanu’u.

 

Na taua atili e le molimau fa’atuatuaina i Leoleo e fa’apea, o le tausaga e 2015 na amata ai ona vaaia Tuatoo o aafia i le tulei atoa ai ma le fa’atauina atu o fualaau fa’asaina i tagata. Sa taua ai fo’i le galulue fa’atasi o Tuatoo ma isi tagata e to’alua, o Cody Wood mai Taputimu ma se ali’i ave tasi e igoa ia DICE, poo Taisia Lemalie fo’i e pei ona taua ai o ia i le tagi a le malo.

 

Na taua e le molimau fa’atuatuaina i Leoleo e fa’apea, o nisi o taimi pe a leai se sapalai fualaau fa’asaina a Tuatoo, ona alu lea i Taputimu i le fale o Wood ma toe fa’atumu mai ai lana sapalai. Na taua atili fo’i e le molimau fa’atuatuaina, le masani lea ona tietie Tuatoo i le taxi a Lemalie mo le kilivaina o fualaau fa’asaina i tagata e le mafai ona oo atu i le fale o Tuatoo i Alofau.

 

I le mae’a ai ona maua e Leoleo o nei uma fa’amatalaga, na fa’atulaga ai loa se auala e fa’atau mai ai ni fualaau fa’asaina mai ia Tuatoo. E $50 le tupe na tuu e Leoleo i le molimau fa’atuatuaina, ma alu atu ai le molimau ma fa’atau mai se pepa iila o loo i ai vaega o le pauta o le aisa mai ia Tuato’o.

 

Sa faia se siaki i lea pepa iila ma faamaonia ai, o vaega papa’e sa maua i totonu o vaega ia o le pauta o le aisa.

 

O le aso 3 Novema 2017 na talosagaina ai loa e Leoleo se poloaiga mai le fa’amasinoga, tauala atu i le ofisa o le loia sili, e fa’ataga ai le sailia o le fale ma meatotino a Tuato’o, ma talia ai lava e Leoleo i le aso lava lea o le talosaga.

 

O le taeao po lava o le aso 9 Novema 2017 na fa’ataunuu ai loa le poloaiga a le fa’amasinoga e saili ai le fale o Tuatoo i Alofau, ma maua ai e Leoleo vaega o fualaau fa’asaina, o se fana, atoa ai ma mea uma e fa’aaoga e i latou e tagofia fualaau fa’asaina.

 

Ina ua fesiligia e Leoleo ia Tuatoo e tusa ai o fualaau faasaina sa maua i lona fale, na taua ai e le ua molia e fa’apea, na te le fa’atauina atu fualaau fa’asaina, sei vagana ai lona fa’aaogaina.

 

Na faia se suega i fualaau faasaina o le aisa ma le mariuana sa maua i le fale o Tuatoo, ma faamaonia ai o vaega uma nei o fualaau fa’asaina.