Ads by Google Ads by Google

Toe Afiafi a Tamalii - Pesepesega o le Kerisimasi


O se va'aiga i le aulelei o le tutula'i mai o fanauiti a Susana Uesele ma le latou fa'atinoga fo'i o pesega o le Kerisimasi. [ata: Leua Aiono Frost]

I le toe po o Pesepesega o le Kerisimasi sa tapena i ai le Amerika Samoa Arts Council ma le Matagaluega o Tupulaga Talavou ma Tina, na tula’i le susuga le Faife’au Rev Uaine Fuimaono, mai le Ekalesia Metotisi i Fagaitua e amatalia le polokalama i le Malae o le Suigaula a le Atuvasa.

 

O lana ekalesia fo’i sa amatalia fa’afiafiaga o le afiafi, ina ua mae’a le saunoaga a le afioga i le Lutena Kovana, Lemanu Peleti Mauga.

 

“Ia maopoopo mai o tatou aiga i o tatou lotoifale ma ia lagona fo’i e le fanau le mafanafana o le alofa moni i totonu o le aiga. Ua o’o mai vaitau o le soifuaga ua tele suiga e va’aia i le olaga, ua a’afia ai le va’aiga, uiga ma aga a le fanau pe a vaivai le tatou puipuiga ma le fa’atonu i taimi uma. Po’o fea lava e aga’i i ai i latou, ia sili lava lona aiga ona malupuipuia ai latou lagona ma maua ai lo latou fiafia mausali i so’o se taimi.”

 

“O le ala lea e toe fia fo’i mai ai i latou pe a mae’a latou fa’amoemoe o tausailia, e leai se nofoaga e sili atu i lo lona aiga moni, ma le mafutaga ma ona matua.”

 

Fa'afiafiaga a le autalavou Metotisi mai Fagaitua sa latou fa'aaogaina ai titi felanulanua'i e talotalo mai ai le latou fa'atofa i le latou toe sao o le afiafi e fa'amanuia ai le Kerisimasi ma le Tausaga fou.

 

Na tapena mai fo'i Lauli'i i le latou sao na soso'o ai. Matagofie le latou toniga papa'e ma latou pulou Santa a ali'i ae ula tama'ita'i i ula o le Kerisimasi e mumu ma le lanu meamata.

 

O le Ekalesia Metotisi mai Futiga na soso'o ai ma sa to'atele fo'i lea autalavou. I latou toniga mumu ma le pa'epa'e na manaia fo'i latou skids na fa'atautaia mo le latou sao.

 

O le sao o le "Ave o le Fetu Ao” Metotisi mai Fagaima na soso'o ai ma sa iloga fo'i ona matagofie a latou pesega. O le toniga papa'e atoa ma le ula i laumaile lanumeamata, ae o latou pese sa usuina na fa'aaoga ai pepa felanulanua'i e lomia ai, ma ua avea fo'i o se isi fa'amatagofie o le latou sao i le maimoa atu i ai. E lua lava fo'i latou pese na tapena ma e matua'i matagofie lo latou tamauina o le taimi atofa mo le vaega e tasi i ana fa'afiafiaga.

 

Soso'o lea ma le sao o Leusoali'i Lotoanu'u mai Samoa. O i latou ia ua faia le latou so'o ma Amaluia, o le sao o Amaluia ua faimeaalofa ai i le latou taligamalo ia Leusoali'i mai Samoa. Matagofie fatuga ma pese e fa na fofogaina e i latou a'o la'eia e i latou le pa'epa'e ae elei mai i le lanumeamata o le ola lima ma fele o ofu. Ua va'aia fo'i nai a latou fa'aevagelia pupu'u sa fefiloi ai i le latou sao.

 

O le LDS Mapusaga Fou 3rd Ward ma latou viiga fa'alelagi o le fanau mai o Iesu ma sa iloga fo'i ona matua tutula'i ai le susuga le Ta'ita'i Pese a'o le latou taimi pese fo'i o Duke Purgess. O le toniga a lea aufaipese siufofoga malu ma le malie i le fa'afofoga, o le lanumoana a tama'ita'i, ae papa'e atoa ali'i i ofutino ma ie faitaga ae fusiua i le lanu moana o la'ei o tama'ita'i o le latou aufaipese.

 

Soso’o ai le autalavou EFKAS mai Gataivai, toniga lanumoana malosi le ie ma le ofu pa'epa'e ae ula pu'a lanu mumu. E lua lava fo'i nai a latou pese ma le fa'aevagelia e tova ai.

 

O le Autalavou a Pavaiai Metotisi o le toniga e faia mo a latou Manuao i vaitau nei o le Kerisimasi ma le Tausaga fou. E toniga papa'e toe faia o latou pulou papa'e e ta'ai uma ai o latou ao.  O a latou pesega e fa'aakapela e le taina i ni la'au pese po'o ni kitara ma okeni.

 

O le Autalavou Ekalesia Nasareta i le latou toniga o lanu uma lava o le Kerisimasi ma le ie pa'epa'e. Na faia latou pese ma latou fa'aevagelia e tova ai.

 

O le Ekalesia Katoliko mai Nuuuli i le latou autalavou sa muta i ai le fa'amoemoe. O le latou fa'afeagaiga fo'i sa ia si'itia le tatalo fa'ai'u o le polokalama atoa. Peita'i sa i ai le avanoa na tula'i ai le sui o le Komiti Fa'afoe Vaito'a Hans Langkilde e fa'afetaia le mamalu o le au faafiafia i nei po e tolu na fa'atautaia ai Pesepesega o le Kerisimasi ma le Tausaga Fou manuia 2018.

 

Na tapena mai le fa'afetai e afua mai ia i latou uma na tausoa fa'atasi ma le Amerika Samoa Arts Councilma le DYWA ina ia taunu'u ma matagofie lenei vaitau o le tausaga i tagata uma o Amerika Samoa.

 

O i latou na tofi ma sao i le fa'amoliina o le Malae, o la'au Kerisimasi ma o latou teuteuga uma. O le fa'auaeaina o le malae atoa ina ia mautinoa e le afaina se mea i le taimi e ki ai moli uma. Ua fa'afetaia fo'i i latou sa aumaia a latou mea'ai ma oloa ma fa'atau atu i le mamalu o le atunuu. Ae maise loa o i latou uma e 30 na tofu sao i fa'afiafiaga o nei po e tolu.

 

O fa'aili fo'i sa fa'aaogaina ma tua i ai le Matagaluega i tulaga o fa'aleoteleina o mea uma na tapena, Le Siliva Brothers Band, fa'afetai. Matagaluega sa fesoasoani malosi mo i latou uma i nei tapenaga ua lisia uma i le polokalama, ae tau ina fa'aleo mai le latou agaga fa'afetai.

 

Peita'i, sa matauina e i ai le ata tele o le ali'i o Santa Claus ua laei le malofie ma fa'apea fo'i ma le tama'ita'i Lady Santa ua la'ei i le malu.

 

O le aoga o lea tulaga, ua fa'aatagia ai le matagaluega o lo'o nafa ma lenei fo'i fa'atofala'iga o le sao o Atisi Samoa moni i le fa'amoemoe.

 

"Ua iloga ai, po'o le a lava le tau ma ona aluga, ae tumau pea le taua ma le fa'amua a le atunu'u o Samoa i ana agaifanua o ana measina ia. E lalamua fo'i i o latou lagona e fa'ailo ma fa'alele a latou measina i so’o se vaitau o le soifuaga. Ua avea nei lenei fo'i vaitaimi fiafia, o se fa'ailo ma fa'alauiloa atu ai lea fo'i measina a le atunu'u e agatonu i tausala ma manaia, po'o ali'i ma tama'ita'i o aiga. O le niu o lo'o va'aia o taulima e le ali'i soga'imiti o Santa, o le fua lea o le ola pea o nei taleni i lea augatupulaga ma lea augatupulaga i o tatou malo fa'aatumotu, lea e so'o lelei o lauolaola ai lenei la'au o le Niu. O se laufou ma tatupu e lauuluola i atumotu uma o le atuvasa,” o se fa'amatalaga lea o le fa'ailo ua matauina ua i lalo ane o le La'au Kerisimasi autu i le Malae o le Suigaula.