Toe a’afia fo’i ni ali’i se to’alua i le tulafono
O ni ali’i se to’alua o lo o fa’atalitali le fa’aiuga o a laua mataupu i luma o le Fa’amasinoga Maualuga, ua toe a’afia fo’i i laua i le tulafono, ina ua pu’e fa’apagota i laua e Leoleo i le fa’aiuga o le vaiaso na te’a nei, e mafua mai i le fa’alavelave lea na tula’i mai i Malaeimi i le fa’aiuga o le vaiaso, lea na fufusu ai a o matamata le to’atele o tagata fai fa’atoaga i totonu o se tama’i maketi i Malaeimi.
Na tutula’i ia Oliva Toimoana ma Lafaele Sefo i luma o le Fa’amasinoga Fa’aitumalo i le aso Gafua o le vaiaso nei, ma la teena ai tu’uaiga fa’asaga ia te i laua.
O loo tu’uaia Toimoana i moliaga mama e fa e aofia ai le faatupu vevesi i nofoaga faitele, gaoi, fa’aoolima, atoa ai ma le le usita’i i poloaiga a le fa’amasinoga. Ae o Sefo, o loo tu’uaia o ia i moliaga mama e tolu, lea e aofia ai le faatupu vevesi i nofoaga faitele, faaoolima i le tulaga tolu, atoa ai ma lona le usitaia o poloaiga a le fa’amasinoga.
E pei ona taua e le malo i le latou tagi e fa’apea, o le aso Toona’i o le vaiaso na te’a nei, Iulai 28 i le itula e 8:20 i le taeao, na tula’i mai ai se vevesi i le va o Toimoana ma Sefo i le tama’i maketi lea e fa’atau ai fa’aeleeleaga a le aufai fa’atoaga i Malaeimi.
Na taua e molimau i Leoleo e fa’apea, o Toimoana na alu atu e piki mai le tupe mai tagata o loo fa’atau a latou meamata i le maketi. O Sefo sa fa’atau ana meamata i totonu o le maketi.
Ina ua oo atu Toimoana i luma o Sefo, na fa’afuase’i ona ia aapa atu ma se’i mai le tupe a Sefo o loo i totonu o se tama’i atigipusa e aunoa ma lona fa’anoi ia Sefo. Sa taua fo’i e molimau le palauvale o Toimoana ia Sefo i le taimi na ia aveese mai ai le tupe.
Na ita Sefo i le gaioiga a Toimoana, ma lu’i ai loa e Sefo ia Toimoana la te fusu. Sa palauvale atu fo’i Sefo ia Toimoana, ma tu atu loa i luga ma tu’i Toimoana, ma fa’asaga mai ai loa ma Toimoana ma fai le la fusuaga.
Na tulioso atu ni isi o tagata sa i ai ma vaovao le fusuaga ae o isi ua latou vili Leoleo mo se fesoasoani.
Na taua e ni isi o tagata fai fa’atoaga i Leoleo e fa’apea, o le latou popolega ina ua tula’i mai lenei fa’alavelave, o le ono aafia atu ai lea ma i latou atoa ai ma a latou meamata o loo fa’atau, e maua ai se tupe e tausi ai aiga.
Na taunu’u Leoleo ma pu’e fa’apagota uma i laua e to’alua, ae auina atu i le Ofisa o Leoleo i Tafuna mo su’esu’ega. Mulimuli ane, na taofia uma i laua i le toese i Tafuna e fa’atali ai le taimi e tutula’i ai i luma o le fa’amasinoga fa’aitumalo.
Ua poloaina i laua e le afioga i le ali’i Faamasino ia Fiti Sunia e aua ne’i o la toe taumafai e fa’atupu se vevesi i nofoaga faitele, pe toe aga’i atu fo’i i le nofoaga na tula’i mai ai le vevesi i Malaeimi.
O Toimoana o loo i ai lana mataupu i luma o le fa’amasinoga maualuga, lea o loo molia ai o ia i le umia fa’asolitulafono o vaega o le laau fa’asaina o le mariuana. O ni isi o tuutuuga o loo tatala ai o ia i tua ina ua ia totogi le $5,000, o le aua lea ne’i ona toe solia se tulafono a le malo, ma ia avea o ia ma tagata e tausi i soo se tulafono i taimi uma.
Ae mo le susuga a Sefo, o loo i ai fo’i lana mataupu i luma o le fa’amasinoga maualuga, lea e pei ona molia ai o ia i lona umia fa’asolitulafono o vaega o le pauta fa’asaina o le aisa.
O ni isi o tuutuuga o loo tatala ai o ia i tua, o le fa’asa lea ona ia toe soli se tulafono, a ia avea o ia ma tagatanu’u lelei i taimi uma.
O le masina o Me o le tausaga nei na sainia ai e le afioga i le ali’i Fa’amasino Sili ia Michael Kruse se poloaiga e sailia mai ai Sefo, ina ua le toe oo atu o ia i luma o le fa’amasinoga mo lana mataupu.
O le aso Gafua lava fo’i na te’a nei na tau aao ai e Sefo le kopi o le poloaiga a le fa’amasinoga maualuga e pu’e faapagota ai o ia, ma ua fa’amoemoe o se taimi o le vaiaso nei e tula’i ai o ia i luma o le fa’amasinoga maualuga e tali i le poloaiga e pu’e fa’apagota ai o ia.