Ads by Google Ads by Google

To’atolu pagota sosola mai le toese i Tafuna ona ua fia ‘aai


[ata: foa'i]

Ua toe tolopo i le isi lua vaiaso e le afioga i le Fa’amasino Sili ia Michael Kruse le lauina o fa’asalaga o pagota e toatolu lea na sosola mai le toese i Tafuna i le masina o Iulai i le tausaga ua te’a, 2018.

 

O le aso Faraile ua te’a sa tutula’i ai i luma o le Fa’amasinoga Maualuga ali’i pagota ia Luaao Fagota (o le isi ona igoa o Andrew Peters e pei ona iloa ai e le toatele), Jason Isaiah Muasau, ma Vatia Tugaga. O lo’o tula’i mo i latou le ali’i loia fautua ia Ryan Anderson.

 

Ma sa fa’ailoa e patoga i le Fa’amasino Sili le mafuaaga sa latou sosola ese ai mai le toese ona o lo latou fia ‘aai talu mai aso e tolu soso’o e na o le ti sa fafaga ai i latou.

 

Saunoa le loia ia Anderson ma ia finau i le fa’amasinoga mo se fa’asalaga mama mo Peters ae aua le fa’aogaina le fautuaina mai le lipoti a le Ofisa Fa’anofovaavaia.

 

Faailoa e Anderson i le fa’amasinoga, ua iloa lelei e Peters le tulaga e o’o i ai o ia ona o lana gaoigoiga sa faia. Ae sa finau foi Anderson ua mafua faia e Peters lea goioiga o le sola i tua mai le toese, ona o lona fia ‘ai.

 

Sa fa’aauau le finauga a  Anderson ma ia fa’ailoa i le fa’amasionga e faapea i le taimi na sosoloa ai i latou nei  e toatolu i tua, e leai se isi solitulafono sa latou faia, ua na o le ‘aai i latou ma toe foi i le toese, ma e le’i atoa le 24 itula sa tuua ai e i latou le toese ae toe foi i le falepuipui.

 

Ua le gata i lea, sa fa’ailoa e Anderson, e moni ua lelei tulaga o le toese ua i ai nei, ae o lo’o tele mea e tatau ona fa’aleleia, e puipuia ai aia tatau a i latou o lo’o taofia fa’apatoa i le falepuipui.

 

Ina ua maua lona avanoa i luma o le fa’amasinoga, sa fa’ailoa ai e Peters e fa’apea o i latou e fafaga i le suati i le taeao, aoaolu ma le po. Ua le gata i lea, sa ia taua foi fa’apea o lo’o i ai mea taumafa i le toese ae e le kukaina.

 

Sa toe fa’ailoa foi e Peters e i ai lava pagota ua atofaina e kukaina mea taumafa, ae e pule lava pagota ia e kukaina mea taumafa i le fa’atulagaina o mea ‘ai taumafa e koka.

 

Sa fesili Kruse ia Peters pe aisea ua taofia ai o ia i le toese ae tali Peters o lo’o tuli lona fa’asalaga e fita tausaga ona i lona fa’ao’olima i se tasi ali’i i le Karaoke Bar.

 

O se tasi o fesili e Kruse, pe sa fa’ailoa e Peters i se isi tagata lona fia ‘ai ae le’i tuua le falepuipui. Ae tali Peters a leai, ma ia fa’iloa e fa’apea e toatele i latou i le toese e fia ‘aai ma faia a la latou fuafuaga e o i lona fale e maua ai sa latou mea’ai.

 

O nisi o fesili a Kruse sa fia iloa e le fa’amasinoga pe aisea na le talosaga ai lona aiga e avatu se mea’ai taumafa i le toese, ae tali Peters e fa’asa i latou ona fa’aaoga le telefoni i luma e telefoni ai o latou aiga.

 

Ua le gata i lea, sa fa’ailoa foi e Peters i le fa’amasinoga e le mafai ona o i latou i le falema’i o le LBJ pe talosaga i leoleo o le toese ona o se fesoasoani tau soifua maloloina.

 

I se vaega o lana saunoaga sa fa’atoese ai Peters i le fa’amasinoga ona o le tulaga sese ua sa ia faia o le sola lea i tua mai le falepupui. Sa ia taua foi o le a ia tamafai pea e onosai e tuli lona fa’asalaga ma o le taimi e oso ai lona fia ‘ai, o le a fautua le Tusi Paia ma tatalo mo le fa’amalosi ‘au mai le Atua mo ia i le tuli ina o lana fa’asalaga.

 

Sa maua foi le avanoa o Muasau ma Tugaga e fa’ailoa ai o latou manatu i le fa’amasinoga. E pei ona fa’ailoa e Muasau, e toatele pagota e savavavli ese mai le toese, ae le maua i latou. Ma o le mafuaga na o ese ai mai le toese ona o le fia ‘aai, ma a uma ona ‘aai ona toe foi lea i le toese.

 

Sa fa’ailoa e Mausau i le fa’amasinoga e umi le taimi o lo’o tuli ai lana fa’asalaga fa’afalepuipi ma sa ia tautino e le toe sola ese mai le toese. Ae peitai ina ua fesiligia e Kruse, sa tali ioe Muasau e fa’apea i le taimi ne toe foi ai i le toese - ina ua ma’ea la latou solaaga - sa fa’asuaava o ia.

 

Mo Tugaga sa ia fa’ailoa i le fa’amasinoga sa latou o ese mai le tuoese ona ua fia ‘aai.

 

Sa fesiligia e le fa’amasinoga le loia a le malo, le tamaitai ia Laura Garvey, i sona taofi i lenei mataupu ma sa ia fautuagaina se fa’asalaga fa’anofovaavaia.

 

O le taimi lea sa faia ai se malologa a le fa’amasinoga. Ae ina ua toe fa’aauau le fa’amsinoga, sa saunoa Kruse e fa’apea o le vaai ma le pulega o le toese e le o se matafaioi lea a le fa’amasinoga. Ma o le fa’asalaga e tuuina mai e le fa’amasinoga e fa’atatau lea i mataupu sa tulai mai e fa’asaga se ua molia i le tulafono. 

 

Sa ia fa’ailoa foi o le vaaiga o le falepuipui o le matafaioi lea a le kovana ma le Vaega Fa’amalosi Tulafono ae o mea ua tutupu mai, ua iloa ai o le savavali ese o pagota mai le toese ma o se mataupu e tupu soo.

 

Ma o fesili e tulai mai i le mafaufau, e pei ona saunoa ai Kruse, o le mafuaga o le tutupu o ia fa’aletonu. O le isi fesili pe o lava le aufaiga i le toese, o le fia ‘aai o pagota ua oo ai i se tulaga ua sailia lava e i latou auala e maua ai mea ‘ai.

 

O ia mataupu ma isi foi mataupu sa laga e le fa’amasinoga sa fautuaina ai loia a itu e lua ina ia mafaumau lelei i ai ma sa taloasaga ai sa latou talanoaga i totonu o le potu o ali’i fa’amasino.

 

Ma ua fa’atulaga o le aso 8 o Fepuari e toe fa’aauau ai lenei mataupu.