Ads by Google Ads by Google

To’atolu molia ina ua mae’a osofaiga a Leoleo i ni fale se 2 i Pago Pago


[ata: SN]
ausage@samoanews.com

E to’atolu na taofia e Leoleo i le po o le aso Lua na te’a nei ina ua faia sa latou osofaiga i ni fale se 2 i Pago Pago, ma tu’uaia ai le maua o fualaau fa’asaina i ia nofoaga eseese.

 

O le osofaiga sa fa’atautaia lea e Leoleo fa’a a’upegaina mai le vaega e Suesueina Fualaau Fa’asaina a le Matagaluega o Leoleo, lea na aga’i atu e fa’ataunu’u se poloaiga mai le Fa’amasinoga e saili ma su’e ai fale nei e 2, ona o lo o masalomia le fa’atauina ai o fualaau fa’asaina, le ituaiga o le aisa.

 

O le mae’a ai o lea osofaiga na taofia ai loa ni tagata se to’atolu ma molia i le umia fa’asolitulafono o vaega o fualaau fa’asaina o le aisa.

 

O i latou ua molia e aofia ai Sio Godinet Jr, Lyon Grey ma Meriko Lomu. O le taeao o le aso Lulu na te’a nei na tutula’i uma ai i latou nei i luma o le Fa’amasinoga Faaitumalo, ma faatulaga ai loa e le afioga i le ali’i Fa’amasino ia Fiti Sunia tupe e totogi ona fa’atoa mafai lea ona tatala i latou i tua.

 

E $50,000 lea ua faatulaga e tatala ai i tua Grey, ae o Godinet ma Lomu e ta’i $30,000 lea ua fa’atulaga e tatala ai i laua i tua.

 

Afai ae mafai ona tatala i latou nei i tua, ua fa’asa ona latou toe taumafai e faafesootai molimau a le malo, pe tagofia foi fualaau faasaina poo le ava malosi. Ua faatonuina i latou ina ia ofo atu o latou tino e faia i ai ni suega ina ia faamaonia latou te le o toe tagofia fualaau fa’asaina.

 

E pei ona taua e se molimau i le Samoa News, ua fai si umi o tulimata’i pea e Leoleo fale nei e lua i Pago Pago, i le mae’a ai lea ona maua o ripoti o nofoaga ia o lo o tulei ma fa’atau ai fualaau fa’asaina.

 

O le atoatoa ai o ripoti a Leoleo e tusa ai o lenei mataupu, na latou talosagaina ai loa se poloaiga mai le Fa’amasinoga e sailia ai nofoaga eseese nei lua. Na muamua osofa’i e Leoleo le fale o Godinet i le afiafi po o le aso Lua, sosoo ai loa ma le osofa’i o le fale o Grey i le po lava lea.

 

Na faatumulia i le to’atele o le atunu’u tafatafa o nei nofoaga i le taimi na faia ai le osofaiga a Leoleo. Sa fa’aaupegaina Leoleo i le taimi o le osofaiga.