Ads by Google Ads by Google

To’atasi na taofia i le osofaiga a Leoleo sa faia i Petesa

ausage@samoanews.com

E to’atasi se ali’i na taofia mai e Leoleo ina ua latou osofaia se fale o se aiga i Petesa i le vaiaso na te’a nei, i le taumafaiga lea e saili fualaau fa’asaina o le aisa ma le mariuana.

 

O le osofaiga sa fa’atinoina e Leoleo mai le Vaega e Suesueina Fualaau Fa’asaina, na fa’atinoina lea i lalo o se poloaiga mai le Fa’amasinoga, e sailia ai le fale, o le ta’avale, atoa ai ma meatotino o loo i lalo o le igoa o le ali’i sa latou sailia.

 

O lea ali’i, ua leva ona saili e Leoleo se auala e maua taitaia ai, e mafua mai i le tele o ripoti mai molimau fa’atuatuaina, i lona a’afia lea i le fa’atauina atu o fualaau fa’asaina, atoa ai ma ni isi o fa’alavelave sa tutupu mai i ni nai masina e le i mamao atu, ina ua taofia e Leoleo se ta’avale sa latou malaga ai ma ni ali’i se to’atolu, ae maua i ai se vaega tele o le pauta oona o le aisa.

 

Na taua e se molimau fa’atuatuaina mai le Ofisa o Leoleo, o le osofaiga a Leoleo sa fa’atinoina i le vaiaso na te’a nei, o le taunuuga lea o se taumafaiga ua tele ona galulue i ai le vaega faapitoa o leoleo, i le tau sailia lava lea o i latou o lo o aofia i le tuleiina atu o fualaau fa’asaina i tagata lautele.

 

Na taua e se molimau i le Samoa News e fa’apea, o le amataga o le tausaga lenei na amata galulue mai ai Leoleo Faapitoa i le mata’ituina lea o gaioiga a le ali’i lea ua taofia nei i le falepuipui, i le mae’a ai lea ona fa’ailoa e ni isi o tagata tuaoi i Leoleo, masalosaloga o loo i ai i lea ali’i, i le ono aafia lea o ia i se pisinisi e fa’atau atu ai fualaau fa’asaina.

 

O ni isi o ia fa’amatalaga sa tuuina atu e molimau i Leoleo, e aofia ai le vaaia o le to’atele o tagata ma ta’avale e aga’i atu i le fale o lenei ali’i, ma o ni isi o nei ta’avale o ta’avale a le malo atoa ai ma ta’avale a ni isi o pisinisi tua.

 

A o taumafai ai Leoleo e saili se auala e mafai ai ona latou maua le ua molia, ae tula’i mai ai loa ma ni fa’alavelave se 2 i le masina o Me o le tausaga lenei, lea na matua vavala mai ai loa i Leoleo masalosaloga fa’asaga i lea ali’i.

 

O le fa’alavelave muamua na tula’i mai i le po o le aso 16 Me, ina ua taofia e Leoleo se pikiapu i le fa’aletonu o moli, ae maua ai ni ali’i se to’atolu i totonu e aofia ai ma le ali’i lea ua taofia nei e Leoleo.

 

O le fa’aiuga o lea fa’alavelave, na loka ai e Leoleo ma molia le ave ta’avale o le pikiapu, o ia lea o Suifaiga Toala, i le umia faasolitulafono o se vaega o le pauta oona o le aisa, ina ua maua i totonu o le ta’avale se vaega tele o le pauta o le aisa.

 

O ali’i e to’alua sa i ai fa’atasi ma Toala i totonu o lana pikiapu lea e aofia ai ma le ua molia i le mataupu lenei, na tatala i tua ma fa’asa’oloto.

 

I le po na sosoo ai, aso 17 o Me, na tula’i mai ai le fa’alavelave lona lua, ina ua taofia e Leoleo se isi fo’i pikiapu i le fa’aletonu o moli, ae maua ai ni ali’i se to’alua i totonu o le ta’avale. O le isi o i laua nei o le ua molia i lenei mataupu.

 

O le faaiuga o le fa’alavelave lona lua lea, na loka ma molia ai le ave ta’avale o le pikiapu, le ali’i o Pio Atonio ina ua maua ia te ia vaega o le pauta oona o le aisa. Na fa’asa’oloto e Leoleo le ua molia i lenei mataupu i le po lea.

 

O le mae’a ai o fa’alavelave ia e 2, na atili ai loa ona fa’amautuina masalosaloga a Leoleo, o lo o aofia ai lenei ali’i i le fa’atauina atu o fualaau fa’asaina.

 

O le aoauli o le aso Tofi na te’a nei, na fa’ataunuu ai loa e Leoleo la latou osofaiga i le fale o lea ali’i i Petesa, i lalo o se poloaiga mai le fa’amasinoga. O le fa’aiuga o lea osofaiga, e leai ni fualaau fa’asaina sa maua i le fale, se’i vagana ai le ta’avale a lenei ali’i.

 

O le mae’a ai o le osofaiga, na pu’e fa’apagota ai loa e Leoleo lea ali’i na auina atu mo suesuega. Mulimuli ane taofia o ia i le toese i Tafuna e fa’atali ai le taimi e tula’i ai i luma o le fa’amasinoga fa’aitumalo i le taeao nei.

 

E talitonu le Samoa News, o lea ua mae’a ona faila e le malo moliaga fa’asaga i lea ali’i.