E toalima ni ali’i, e aofia ai se ‘au uso e to’alua, ma ni ali’i sa avea muamua ma leoleo, o lo’o taofia i le Toese i Tafuna ona o tuuaiga i latou fa’afoeina o fualaau ma laau fa’asaina i totonu o le fa’alepuipui.

Ma sa fesuiai foi e i latou tupe totogi ina ia maua fualaau fa’asina i totonu o le toese.

O lea mataupu na ali’ae mai i le tausaga ua te’a ma sa faia ai loa suesuega a le vaega suesue a leoleo a le Matagaluega o Puipuiga o le Saogalemu Lautele.

O i latou ua molia e le malo, e aofia ai ni ali’i e toatolu sa avea muamua ma leoleo - Jimmy Stanley, Leasi Neueli, Faavae Papatu - ma le ‘au uso ia Spencer ma Vincent Toeava. Ua ma’ea fa’atulaga e le fa’amasinoga le ta’i $20,000 e totogi fa’atoa mafai lea ona tatala i latou nei i tua e fa’atalitali ai le taualumaga o lenei mataupu.

E fia fa’ailoa atu e le Samoa News, o le susuga ia Vincent Toeava o lo’o molia i se isi mataupu na tulai mai i le 2017, lea o lo’o tuuaia ai o ia e le malo i le faia o gaoioiga fa’agaoi i pepa o le Food Stamp - le polokalama fetarale lea e fa’afoeina i Amerika Samoa e le Matagaluega o Alagamanuia ma Tautua Lautele (DHSS).

 O lo’o toafia pea Vince Toeava i le toese mo lea mataupu ona ua le mafai ona totogi le $450,000 e tatala ai i tua. E 19 moliaga fa’asaga ia Vince i le mataupu i le Food Stamp.

MOLIAGA FOU

I le tagi a le malo sa faila i le fa’amasinoga o lo’o auiliili mai ai tuuaiga fa’asaga ia i latou nei e to’alima, ma sa amata le suesuega a leoleo ina ua logoina e leoleo o le Toese ia le ofisa autu o leoleo le maua lea o ni “straws” ua ma’ea ona tipi tulimanu ma o lo’o i ai i totonu o ia straws se pauta pa’epa’e. Ma sa taumafai Toeava e tuuina atu i se tamaita’i pagota e suafa ia Meriko Lomu.

Sa osofa’i e leoleo le sela o lo’o taofia ai Toeava i le toese ma ali’ae mai ai nisi o tulaga fa’aletonu ina ua maua straws, marijuana ma nisi o fa’alaau fa’asaina. O lo’o fa’amanino mai i fa’amaumauga a le fa’amasino tuuaiga fa’asaga ia i latou nei e toalima i lo latou fa’afoeina o tulaga fa’asolitulafono i totonnu o le Toese.

O lo’o taua ai mai foi i le tagi a le malo se se tamaitai pagota o lo’o tuaia sa auai i solitulafono i totonu o le toese. O ia lea o Meriko Lomu, o lo’o i luma o le fa’amasinoga lana mataupu i le taulimaina o fualaau fa’asaina i le tausaga ua te’a.

O lo’o fa’ailoa foi i le tagi a le malo le aofaiga o tupe sa totogi mo taulimaina o fualaau fa’asina i lenei gaoioiga fa’asolitulafono i totonu o le toese.