Ads by Google Ads by Google

To’afa tagata faigaluega a le TSM ua molia i le gaoi

ausage@samoanews.com

E to’afa tagata faigaluega a le Kamupani Supamaketi a le TSM Mart o lo o taofia i le Falepuipui i Tafuna i le taimi nei, ona o tu’uaiga i lo latou ave fa’agaoi o se vaega tupe tele mai totonu o masini tupe a le kamupani.

 

O tama’ita’i e to’afa e aofia ai Kalameli Tauave; Faatamalii Atiae; Manaia Iopu and Alofagia Alofipo, o lo o molia i latou ta’itasi i moliaga mamafa ta’i 2 o le gaoi atoa ai ma le ave fa’agaoi o meatotino sa tu’uina atu i lalo o le latou vaavaaiga.

 

E ta’i $10,000 a le tagata e to’atasi lea ua fa’atulaga e le afioga i le ali’i Fa’amasino ia Elvis P. Patea e totogi ona fa’atoa mafai lea ona tatala i latou i tua.

 

O le aso Faraile o le vaiaso nei i le itula e 11:00 i le taeao lea ua fa’atulaga e faia ai le ulua’i iloiloga o lenei mataupu i luma o le afioga i le ali’i Fa’amasino ia Patea.

 

TAGI A LE MALO

 

O lenei mataupu na tofu atu i le Ofisa o Leoleo i Tafuna, ina ua talosagaina e le Ta’ita’i o le Supamaketi a le TSM sa latou fesoasoani, mo le suesueina o le mataupu e pei ona masalomia ai ni tama’ita’i faigaluega se to’afa, i lo latou ave faagaoi lea o se vaega tupe e tusa ma le $46,000 mai totonu o masini e tali ai tupe a le kamupani.

 

O le tauaaoina ai e le Ofisa o Leoleo o lenei talosaga, na tofia ai loa le ali’i Leoleo Suesue ia Det. Filemoni Amituana’i na te su’esu’eina lenei mataupu.

 

I le tagi a le malo o lo o taua ai e faapea, i le aso 26 o Me 2019, na faia ai se suesuega a se tasi o Ta’ita’i o le TSM i tulaga o tupe o lo o maua mai i masini tali tupe a le pisinisi. O le masini sa galue ai Tauave na fa’aaoga a le Ta’ita’i a le TSM e faia ai lana su’esu’ega.

 

I lea su’esu’ega, na maua ai isi o gaioiga o tupe sa totogi atu i totonu o le masini ua tape ma aveesea mai i luga o faamaumauga o le masini. Mo se faata’ita’iga, sa i ai le fa’atau e $928.90 le aofa’i sa totogi i totonu o le masini a Tauave, peita’i ina ua saili atu e le Ta’ita’i fa’amaumauga a Tauave, e le o maua ai i luga o lana masini faamaumauga e fa’atatau i le fa’atau lea.

 

Na taua e le Ta’ita’i lea i Leoleo, o ia sa i ai i tafatafa o Tauave i le taimi na totogi atu ai e le ulugali’i le tupe tele lea mo le la fa’atauga, ae na faateia o ia ina ua saili atu le masini e le o maua ai i totonu faamaumauga e tusa ai o le fa’atau tele lea.

 

Na fesili le Ta’ita’i lea ia Tauave e tusa ai o le fa’atau tele lea e $928.90, ma ioeina ai e Tauave lona aveese mai i luga o le masini o fa’amaumauga e faatatau i le fa’atau tele lea, atoa ai ma lona aveesea mai fo’i o le tupe ae fa’aaoga mo ia lava.

 

Na faaalia atili e Tauave e faapea, sa ia fa’aaoga le numera ‘pin code’ na tuu atu e lana ‘Supervisor’, ma ia tatalaina ai le masini ae aveese faamaumauga e fa’atatau i le fa’atau tele sa faia i lana masini.

 

Ina ua logoina Leoleo e uigai lenei mataupu, sa auina uma atu i latou nei e to’afa i le Ofisa o Leoleo i Tafuna mo le faatalatalanoaina o lenei mataupu.

 

Na taua e le Ta’ita’i o le TSM Mart i Leoleo, e na o ia lava le tagata i totonu o le Supamaketi atoa e iloaina le numera faapitoa ‘pin code’ e mafai ai ona tatala ituaiga masini tali tupe fou o lo o fa’aaoga e le pisinisi, pe afai e i ai se suiga e fia faia i fa’amaumauga o loo tuuina i totonu.

 

O ituaiga masini tali tupe fou nei, o le ituaiga fou e taua o le “POS Touchscreen Models”. O le masini lenei e mafai ona teuina uma i ai gaioiga ma faamaumauga uma e fa’atatau i fa’atauga ta’itasi sa faia i lea aso ma lea aso.

 

E le mafai e se tagata faigaluega ona tatala masini pe afai e mana’omia le fia faia o se suiga i ni faamaumauga ua sese ona tuuina i totonu. E na o le Ta’ita’i lava o le TSM Mart e i ai le numera faapitoa e mafai ai ona tatala le masini lea.

 

Na taua e le Ta’ita’i o le TSM Mart i Leoleo e fa’apea, sa i ai le aso na ia fa’aaogaina ai le masini a Atia’e, ona sa i ai ni faamaumauga sa mana’omia le fia aveesea mai i luga o le masini.

 

O le taimi lava na ia fa’aaogaina ai le masini a Atia’e, na maitau ai e Atia’e le numera, ma ia fa’aaogaina ai loa le numera e tatala ai le masini ma aveese faamaumauga o fa’atauga ta’itasi ina ia atagia mai ai e leai ni fa’amauga sa faia, ma fa’aaoga ai loa le tupe e ala i le aveese faagaoi.

 

Ina ua fesiligia e Leoleo ia Atia’e, sa ia ioeina ai lona maitauina o le numera faapitoa i le aso na fa’aaoga ai e le Ta’ita’i lana masini, ma amata ai loa ona ia aveese faamaumauga mai luga o le masini, atoa ai ma le fa’aaoga faagaoi o tupe. O le masina o Oketopa o le tausaga na te’a nei na amata faia ai e Atia’e lea tulaga, e pei ona ia fa’ailoa i Leoleo.

 

O tupe na maua e Atia’e mai lea gaioiga faasolitulafono sa ia tufa atu i le isi to’atolu o i latou uma ua a’afia i lenei mataupu.

 

Sa i ai le aso na faailoa ai e Atia’e ia Tauave le numera faapitoa e mafai ai ona tatala le masini, ma fa’aaoga ai loa fo’i e Tauave le numera faapitoa lea e tatala ai le masini, aveese faamaumauga o loo i ai ae ave faagaoi tupe ma fa’aaoga mo ia lava. O le isi vaega o lea tupe na tufatufa atu e Tauave ia Atia’e, Iopu ma Alefosio.

 

Ina ua fesiligia e Leoleo i latou uma nei e to’afa e tusa ai o lenei mataupu, sa latou ioeina ai lo latou fa’aaoga o le numera faapitoa e tatala ai le masini ae ave faagaoi tupe mai totonu ma fa’aaoga mo i latou lava.

 

Na taua e i latou nei i Leoleo e fa’apea, o le mafua’aga autu e tasi na mafua ai ona unaia i latou e faia lenei gaioiga, e le gata e le lelei o latou totogi o lo o maua mai le Supamaketi, ae faamatala fo’i le kamupani i le totogiina atu o latou itula ova taimi.