Ads by Google Ads by Google

TO’A 6 MAUA TUSI PASI KAPETENI MAI LE OFISA O UAFU

O le aso Gafua na faia ai se fa'atasiga matagofie a le Matagaluega o Uafu, Taulaga & Malaevaalele, ina ia taualoa le taumafaiga a nisi e to'aono o le Aufaigaluega i Feoa'iga i le Tai ua ausia agava'a ma tomai fa'apitoa e avea ai ma Kapeteni Folau ma fa'afoea va'a e 200Tone ma le to'atasi e fa'afoea va'a e na'o le 100tone le mamafa.

 

O i latou nei ua ausia nei agava'a e aofia ai Imoa Leota; Asiasiaoga P. Velega; Rudy Su'a; Sasualei W. Moliga; Joseph Fa'agata ma Laniselota Fa'aumu.

 

"Ua toetoe lava mae'a kosi nei mo Paul Allen ma Loleni Ume, ae ia outou mautinoa, e maua lava fa'ailoga o le to'alua lea. E le o fa'avaivai lava le una'i a i matou uma, ina ia tofusia uma le vasega lenei ma Tusi Pasi Kapeteni." O se tala lea a le tama'ita'i fa'atonusili o le Port Administration Taimalie Claire Tuia Poumele.

 

I tusi pasi Kapeteni fo'i ua taua'aoina, e tolu vaega o lo ua mae'a pasia e nei sui ma ua taua'ao fa'atasi ai lava ma latou tusi pasi Kapeteni nei.

 

O i latou e to'alima ua ausia le avea ma Kapeteni o Va'a 200 tone le mamafa ua aofia ai ma tusi pasi o le Tosoina o Va'a ma le FCC Radio ina ia ia iloa lelei fa'aupuga o faasalalauga i luga o leitio feso'ota'i i feoa'iga i luga o le tai, ma ia iloa fo'i ona toso va'a i luga o le sami. E to'atasi le au fa'au'u na maua lona tusi pasi o le Kapetenia lea o Va'a e 100Tone le mamafa, ua na'o Joseph Fa'agata, a'o isi uma ua agava'a  e fa'afoe va'a e ta'i 200Tone.

 

Na tula'i fo'i le tama'ita'i fa'atonu o lea matagaluega, ma ia fa'afetaia se avanoa lelei na maua e malaga atu ai Capt. Lafoga Alovao ma Capt Siua Fifita ma pasi mai i a'oga e mafai ai ona avea i la'ua ma faia'oga i lea kosi fa'a-kapeteni i le tatou matagaluega nei.

 

"Ona o lea faiga ua tele le tupe ua fa'asaoina mai a le Matagaluega, ae ua maua le avanoa matagofie e mafai ai ona to'atele nisi o le aufaigaluega a le Vai e auai ma saili o latou agava'a fa'a-Kapeteni ae le tu'ua o latou aiga. O se faiga lelei ma ua fa'amanuiaina ai fo'i lenei to'atele o sui i le taimi e tasi." O sana saunoaga lea e fa'ailoa lea itu o le kosi ua mae'a.

 

Sa ia fa'ailoa fo'i, "E amata mai la'u tautua i lenei matagaluega e na'u le to'alua lava Kapeteni e agava'a mo le fa'afoega o le Manu'atele ma le tatou Va'a Toso Va'a i totonu o le tatou Uafutele, ona i ai alva lea o lenei lu'iga ina ia fa'ateleina le aofai o i latou e agava'a mo lenei faiva, lea ua tatou tepa i ula ma tatou fa'afetaia lo latou naunau ma le tinou ina ia ausia lea fo'i la'asaga fou i le olaga tautua mo le tatou malo ma ona tagata lautele." O sana toe fa'aaliga lea e tusa ai o le aofa'i o i latou ua ausia le tofi Kapeteni.

 

Sa ia fa'afetaia fo'i le sao o le susuga Kapeteni Wallace Thompson ma Harbor Master Silila Patane aua o i latou nei ua loa ona i ai i nei tiute. I le taimi nei ua tula'i se tasi o talavou Beverly Tasi e avea ma Harbor Master le tumau i le taimi nei, ae o le suiga lea ua i ai nei i le tulaga Kapeteni ua to'avalu nei mo le matagaluega aua o lea ua fou mai le to'aono.

 

"Peita'i e le tatau lava ona moe ai i le to'avalu lea, e vala'auina pea i latou e fia tautua i lea tofi ina ia fa'aulu mai le suafa, e o'o loa i le taimi e fa'atautaia ai a'oa'oga fa'apitoa i le potu fono o le Matagaluega fa'apea ma le a'oga fo'i i luga o va'a e tamau ai le agava'a e folau, ona aofia ai fo'i lea ma tou suafa i lea vasega.

 

O le to'atasi fo'i o lenei to'aono, e le o se tasi na faigaluega muamua i le Matagaluega, na fa'asalalauina lea kosi o le a faia i le nusipepa, ae fa'aulu mai ai lona suafa, ma ua fa'amanuiaina nei o se tasi o le to'aono, Laniselota Fa'aumu. O ia lea ua ia fa'aaogaina tatau le avanoa ma ua ausia fo'i togi e taua'aoina ai lona tusi pasi Kapeteni 200Tone, FCC Radio ma le Towing.

 

O i latou nei e to'alima ua agava'a e fa'afoea va'a uma o le MV Sili, MV Manu'atele lll ma le Iseula, va'a tosova'a a le Matagaluega. o Uafu & Taulaga.

 

I le sao o le afioga le Lutena Kovana Lemanu Peleti Mauga sa ia fa'afetaia ai le tama'ita'i fa'atonu i lona ma'ema'ea i mea lelei e tau atina'e le tulaga tau fa'afoega o Sa o le Malo, ia mautinoa fo'i ua saogalemu le soifua lautele o i latou e femalaga'i ma uta fo'i e fe'avea'i i luga o tatou va'a la'u pasese ma uta. Ua fa'afetaia aua o le tausoa fa'atasi ma le US Coast Guard ina ia le sala le matagaluega, ae ia feso'ota'i ina ia mautinoa ua usita'ia tulafono uma ma aiaiga e fa'asaga i folauga ma femalaga'iga i le va o tatou atumotu ma isi fo'i malo.

 

Peita'i, sa ia fa'afetaia le onosa'i i aiga, ona o taimi e faigaluega ai nei ali'i ua avea nei ma Kapeteni, e aveesea ai i latou mai le li'o mafanafana o latou lotoifale ma aiga.

 

Sa ia maua se avanoa e malaga ai i Swains Island i le Manu'atele ma sa ia iloa ai, le malu puipuia fo'i o femalaga'iga i le vasa o le mamalu o le atunu'u ona o le agaga o ali'iva'a i o latou faiva. Lea ua to'atele ua avea ma Kapeteni, fa'afetaia lea o le avanoa ua fa'asoa ai tomai, o agava'a ae maise fo'i o le a si'itia ai ma se taui aua le tausiga o aiga.

 

Na tapena fo'i le matagaluega i se keke matagofie mo le fa'amoemoe e tatala aloa'ia ai le 'aiga fiafia fa'atasi ma fa'auluuluga o le Malo, ae maise o le pulega a le Matagaluega o Uafu Taulaga ma Malaeva'alele ma le aufaigaluega atoa sa fa'atasia ona o lea la'asaga fou ua ausia e le Vaega o Tautua Tau Femalaga'iga ma Fela'ua'iga o Uta i luga o le vasa.

 

Na auai fa'atasi ma sui mai aiga o ali'i fa'au'u i lea fo'i fa'atasiga ae maise o le susuga le Fa'afeagaiga Rev Fa'avae ma le Faletua mai le Ekalesia Fa'apotopotoga Kerisiano i Amerika Samoa i Pago Pago. O ia lea sa ia si'itia le fa'afetai ma se upu fa'afetai ae maise ole fa'amalosi'au fo'i i nisi e to'atele o le vasega o Ali'iva'a i le Matagaluega o Uafu ma Taulaga, ina ia finafinau ma fai le faiva ia ausia ai tofiga maualuluga nei, e fa'aea aiga, e fa'afiafiaina fo'i i lona taui e tele.

 

O nisi na o tima'iga, sa fa'afofogaina a'o saunoa i ai le Auauna a le Atua, e fa'amalosi ai i o latou faiva ua sauni atu e fa'atino. O le sui fo'i o le US Cost Guard, LT. Blaisdel, lea latou te va'ava'ai toto'a i suega ua mae'a faia e le vasega o Kapeteni fou nei mo le FCC, po'o ala o feso'ota'iga i luga o alaleo fa'asalalau i le vasa ma uiga o fe'au ta'itasi e auina atu.