I lenei tausaga ua o mai fa'atasi Auauna ale Atua ma o latou Faletua ina ia tima'ia atili i lo latou tiute fai ua tofia, "Ia Tala'i atu Iesu!" O le fonotele ua usuia nei mo Faife'au ma o latou faletua o lo'o tausi ekalesia, na amatalia i le aso Gafua o le vaiaso nei, 17 Tesema 2018, i le Gov. Rex Lee Auditorium i Utulei i le latou lesitala.

O aso lea fonotele e afua mai le aso Gafua se'ia pa'ia le aso Faraile 21 Tesema, 2018 lea e mae'a ai uma polokalama na fa'ataoto mo lea fa'amoemoe.

O lenei fo'i le 'au'au ua fa'aautu i ai le latou fa'amoemoe, ina ia fa'amalosia i latou e tala'i atu le talalelei a Iesu Keriso i so'o se vaipanoa o le lalolagi o lo'o galulue ai.

O le atoa ai fo'i lenei o le 90 tausaga talu ona matuaina atu i Amerika Samoa lenei "Sulu o le Malamalama" l Ekalesia Fa'apotopotoga a le Atua, ua fa'asalalau atu ai i so'o se atunu'u o le lalolagi i le taimi nei.

O le aotelega o le taligamalo mai Samoa, Niu Sila, Ausetalia ma Amerika ua silia ma le 500 o Faife'au ma o latou faletua ma o nisi fo'i o i latou ua aumaia ma fanauiti i lea lava malaga.

"O le toe fa'amalosi, o le toe fafaga, o le toe fa'atepa tasi fo'i i lo latou vala'auina e taua tele. Aua ne'i mapu le taulogologo aua o le galuega e matua lu'ia ai agaga ae maise i le tino, e ao ina iloa e a'ea mauga, e sopoia vanu, e i ai fo'i e lofia ai i tafega a'ave peita'i, e ao ina iloa lelei e to'a mea uma i le suafa o Iesu, pe afai ua avea pea o ia ma au uo fa'apelepele e te lua 'au'au fa'atasi. ‘Afai e 'au ma i tatou Ieova, o ai se e fa'asagatau mai?’ O le mea atoa lena e ao ai ona fa'amanatu lenei 90 tausaga o le fa'atuatuaga, aua o Faife'au lava, o sui va'aia ia o le Atua i o tatou olaga i le tino nei o tatou o soifua ai,” o se tala mai lea i se tasi o Fa'afeagaiga na talanoa atu i ai, ina ia maua se 'auga o le mafuta fa'atasi o Failauga o le Upu ma o latou faletua i lenei tausaga.

Ina ua fa'ailoa mai le matua tutumu o avanoa o va'alele, ae maise ua matua tutumu fo'i ma faletalimalo ona o lenei fonotaga, sa matua'ina ai se vala'au pe aisea lava. Sa matele ina talimalo le nofoaga autu o le Ekalesia i Tafuna i nei ituaiga o fonotaga fa'aletausaga a le AOG, peita'i o le tausaga lenei ua ese, ua alaala uma aumalaga mai nei atunu'u ua o'o i ai le tala'iga a le AOG i faletalimalo i le atunu'u.

"Ona o lenei le fa'amoemoe ua na'o ta'ita'i lava o lea ua fa'auia ai le taligamalo i faletalimalo. Pe ana fa'apea fo'i e malaga uma mai Ekalesia ta'itasi ma o latou ta'ita'i, e faigofie lava ona tu'ufa'atasia le tausiga lelei ma le puipuiga o latou ta'ita'i i lana ekalesia e ala i le tausiga fa'aletino, peita'i o lea ua malaga mai na'o i latou ma faletua, e ao i le fa'atina o le AOG World ona talimalo i le mea sili ua latou mafaia,” o se fa'apupulaga lea e tusa ma le taligamalo mai se tasi o le Komiti o le fonotele a le AOG World.

O le mau ua fa'aulutalaina ai le fonotele, "O le tiute o le Faife'au o le Tala'i o Iesu." Ioane 12:32. O se tasi o mau e ao ina avea ma tamau a so'o se faife'au lava o lo'o laugaina le Upu a le Atua."