O le vasega o Ta'ita'i Leoleo, fa'apea ma leoleo ua agava'a mo le tusia o pepa fa'ailo o soligatulafono na vala'au fa'apitoa e le Komiti Fa'afoe o le Tobacco Diabetes Coalition a le Matagaluega o le Soifua Maloloina, e auai i le Semina na fa'atautaia e tamau ai so latou silafia tau tulafono ua mae'a pasia, e fa'asa ai fetauaiga o tapa'a i fanau laiti fa'atasi ai ma le tulafono e aiaia ai le ulaula tapa'a i nofoaga faitele.

Mai le to'atele o i latou na auai, o le ulua'i fesili na tu'uina mai e le ali'i Loia o Jedediah A. Bigelow, "E i ai se tasi o outou o leoleo fa'amalosi tulafono ua aofia i lenei semina, ua ia mae'a tusia se pepa fa'ailo ua solitu e se tasi o tagata lautele le tulafono tau le ulaula tapa'a i nofoaga faitele, po'o se faipisinisi ua soli le tulafono tau fefa'ataua'iga o tapa'a i le tatou nei malo?" O le tali e matua leai lava se isi.

O le aoga o lea semina, ia iloga ona malamalama Leoleo i le aoga na pasia ai nei tulafono e fa'atulafonoina ai nofoaga e le tatau ona ulaula tapa'a ai, po'o tulafono fo'i tau fefa'ataua'iga o tapa'a i totonu o faleoloa ma isi aiaiga uma e ao e le faioloa ona faia, e usita'ia ai tulafono o fefa'ataua'iga o Sikaleti ma tapa'a o so'o se ituaiga.

O le isi aoga, ua mafai ona fesili ali'i ma tama'ita'i leoleo i ni vala po'o le fa'aupuga o le tulafono ua mae'a pasia e tusa o le ulaula tapa'a ma fefa'ataua'iga o tapa'a. Ua iloga mai, ona o nisi o manatu fa'aalia, sa le mailoa e i latou po'o fea e fa'aulu i ai nei pepa solitulafono ua mae'a tusia.

Ua iloga e le avea e i latou i le District Court po'o le fale fa'amasino, ae ave i le Matagaluega o Alagamanuia mo Tagata Lautele (DHSS).

O le fesili, o ai o le DHSS latou te avea i ai nei pepa tusia o soligatulafono? "Pe afai e le'i mua'i faia lava e se leoleo lenei galuega ua fa'asino ia i latou e ao ina fa'ataunu'u, o lona uiga, e fa'ate'ia fo'i le matagaluega o Alagamanuia Lautele pe afai o le a fa'ao'o atu ni matou pepa nei."

Ae afua ona ave i lea Ofisa, ona o le fa'asalaga o nei sui ua solituina tulafono tau le ulaula tapa'a i nofoaga faitele ma soligatulafono tau le fefa'ataua'iga o sikaleti ma tapa'a, e iloailoa lea e le Komiti Fa'afoe a le DHSS, lea latou te taliaina fo'i ma taua'ao maia laisene mo pisinisi e fa'ataga ai ona latou fa'ataua sikaleti ma tapa'a i le atunu’u.

Ua iloga mai sa matua mana'omia lava lea ituaiga fetufa'iga i le va o ali'i ma tama'ita'i leoleo latou te fa'amalosia nei tulafono uma e aiaia ai le ulaula ma le fefa'ataua'ia o sikaleti ma tapa'a ma le Komiti Fa'afoe o le Tobacco Diabetes Coalition, ua tele mea ua fa'ato'a fa'amautuina ai le iloa ona fa'amalosi tulafono a le Malo, ona o le fonotaga i le aso ananafi, ma ua tima'ia fo'i i latou, i le mafuaga ua a'apa atu ai le Komiti Fa'afoe lenei e fia maua lava le tulaga tausoa fa'atasi ma i latou o lenei mau.

"E faigata ona matou o atu e fa'amalosi lenei tulafono, aua ua a'oa'oina i matou i isi tulafono uma lava, ae le'i afea lava ia i matou tulafono o le ulaula tapa'a ma fefa'ataua'iga o tapa'a. O lea fo'i fa'ato'a matou mautinoa, ua pasia ma e tatau ia i matou ona tusi soligatulafono nei pe a matou va'aia a'o tiute i matou,” o se tala lea a se tasi o ali'i leoleo sa auai i le fonotaga.

"Ia o le isi lava mea, o a'u fo'i ia e ulaula, e sili ona faigata ia te a'u pe a ou fai atu i se tasi e taofi lana ulaula, ae o lo'o o'u faia fo'i, peita'i o iina la na ou fa'ato'a iloa ai, ua sa ona toe ulaula i luga o pasi ma ta'avale ae maise fo'i o fale fa'atalipasi ma paka faitele a'o i ai nisi e latalata mai ia te a'u,” o se isi lea o ona lagona na fa'aalia i le Samoa News.

Ina ua fa'asolo pea folasaga o le semina, sa lagona lava fo'i nisi sa fesiligia, "Aisea le sikaleti? Ua i ai se aafiaga fa'ataua ai le tulaga taumafai e taofi loa lava le ulaula i tagata e to'atele? Ae o le faitalia fo'i lea a tagata lava ia, pe fia olaola lelei pe fia ola ma'ima'ia?"

I folasaga uma sa faatino e lima, na iloga ona fo'i le vasega o leoleo o le Malo ma le va'a ua goto i fa'amaumauga, ae maise o le tele o latou fesili e tusa o a'afiaga o le soifua maloloina o tagata lautele ona o le ulaula tapa'a, ua fa'amalosia ai o latou loto e fa'atino lo latou tiute o le fa'amalosia o tulafono tau le ulaula ma fefa'ataua'iga o sikaleti i le teritori.

O suiga fou fo'i ua taumafai le Komiti Fa'afoe o le Tobacco Diabetes Coalition e fa'aofi ina ia pasia ua mae'a talanoaina ma fa'amanino atili i lea lava semina. E lua tulafono tetele ua i ai ma ua fa'apena fo'i ona aiaia eseese maga mo nei tulafono e lua i lalo o le tusi tulafono vaega: ASCA 13:11 (tulafono tau tapa’a) ma le ASCA 13:13 (tulafono fa’asa ai ulaula i nofoaga faitele).

O suiga la ua talosagaina e tuuina i totonu o le tulafono o lo’o i ai nei, ina ia fa'aofi i ai ma ituaiga sikaleti fa'aeletoronisi i so'o se ituaiga e taua o ecigarette po'o vapor cigarette. A'o le vaega mulimuli o le tulafono tau fefa'ataua'iga ua fa'amamafa atili ai sala ua tu'uina atu i pisinisi pe afai o le a solituina tulafono ua mae'a tamau.

A'o le isi vaega sili ona taua, o le suia lea o le tulafono o i ai nei mai le fa'ataga o fanau e 18 tausaga ona tagofia le sikaleti i le tu'u atu lea i le 21 tausaga o le tagata fa'ato'a fa'ataga ona ia tagofia le tapa'a i Amerika Samoa.  Pe afai e te fia fa'atauina se skaleti, ua tatau ona e fealua'i ma lou pepa fa'amaonia o lou matua. E tatau ona va'ai i ai le fa'atau oloa fa'atoa fa'ataga ai ona e fa'atauina le sikaleti.

O nisi na o aiaiga fou o le a taumafai ona fa'apasia i le isi a le Fono Faitulafono i le masina o Iulai.