O le aso 19 o Novema, 2018 lea ua fa’atulaga e faia ai le ulua’i iloiloga o le mataupu a Tumuatasi Lefatia, i le mae’a ai lea o lona tula’i ma teena tu’uaiga fa’asaga ia te ia i le taeao ananafi. O le ali’i loia tua ia Marcellus T. Uiagalelei o lo o tula’i mo Lefatia, ae o le ali’i Loia Sili lagolago ia Woodrow Pengelly o loo tula’i mo le itu a le malo.

O moliaga e 4 o lo o tu’uaia ai e le malo ia Lefatia e aofia ai moliaga mamafa e 2 o lona umia fa’asolitulafono o le fualaau fa’asaina o le aisa, faapea ai ma le moliaga o lona umia fa’asolitulafono o le laau fa’asaina o le mariuana; aemaise ai isi moliaga mamafa e 2, o lona umia fa’asolitulafono lea o le pauta o le aisa ma le fa’amoemoe e tule’i pe fa’atau atu i isi tagata, atoa ai ma lona umia fa’asolitulafono o le laau fa’asaina o le mariuana ma le fa’amoemoe e tule’i pe fa’atau atu i isi tagata.

O le iloiloga muamua a Lefatia sa faia i le aso Faraile na te’a nei, na mafua ai ona tofu atu le mataupu a Lefatia i luma o le fa’amasinoga maualuga, ina ua tuuina mai le fa’aiuga a le afioga i le Tama’ita’i Fa’amasino ia Gwen Tauiliili-Langkilde, ua lava ma totoe mau sa tu’uina atu e le malo e mafai ai ona tuu atu le mataupu a Lefatia e fa’amasinoina i luma o le fa’amasinoga maualuga.

E to’alua molimau sa valaauina e le malo i le iloiloga muamua sa faia i le taeao o le aso Faraile o le vaiaso na te’a nei. O ia molimau e aofia ai le ali’i Leoleo sa autu i ai le suesueina o le mataupu a Lefatia, susuga Det. Justin Thomsen, ma le ali’i Leoleo e fa’apitoa i le faia o suega i fualaau fa’asaina, susuga Det. John Paselio.

Na taua e Thomsen i lana molimau e fa’apea, o le mataupu e pei ona tu’uaia ai se ali’i pagota i lona sola i tua ma fana se alii i Leone i le vaveao o le aso 12 o Aokuso, 2018, na mafua ai ona talosagaina e le Ofisa o Leoleo se poloaiga a le fa’amasinoga, e fa’ataga ai ona saili le nofoaga autu o le pisinisi o le Le Aute i Malaeloa. Ona o le ali’i pagota ia Manu Lefatia o lo o tu’uaia na sola i tua ma fa’atino le solitulafono, o ia lea o le tama a Tumuatasi Lefatia, le pule o le pisinisi a le Aute.

O le taeao sesegi o le aso 12 o Setema na osofa’i ai e Leoleo le nofoaga o le Aute, ma tu’uaia le maua ai o fualaau fa’asaina o le aisa ma le mariuana, atoa ai ma le anoano o mea e fa’aaoga e tagata o loo tuleiina fualaau fa’asaina e pei o taga pepa iila e fa’aaoga e utu ai i totonu o le pauta, o paipa tioata e ula ai le aisa, faapea ai ma straws e ta tipi tulimanu e fa’aaoga e asu ai le pauta o le aisa.

E tusa ma le 3 aunese le mamafa o le pauta o le aisa na maua i le nofoaga o le Aute i le osofaiga a Leoleo, tusa lea e i le va o le $80,000 i le $85,000 lona tau aofa’i pe a fa’atauina atu i isi tagata. Na taua e le ali’i Leoleo ia Thomsen e fa’apea, o le tele o le aofa’i o le pauta o le aisa na maua i le fale o Lefatia, ua fa’amaonia ai masalosaloga o lo o fa’atauina atu e ia fualaau fa’asaina i si tagata.

O fualaau fa’asaina uma na maua i le osofaiga, na faia i ai se suega faapitoa, a o le i tu’uina atu i le potu e teu ai mau fa’amaonia a le malo, e sauni ai mo le taimi o le fa’amasinoga autu o lenei mataupu.

Na taua e le ali’i Leoleo ia Paselio i lana molimau, o ia na faia suega i le fualaau fa’asaina na maua. Sa ia sueina le pepa na maua i ai le pauta pa’epa’e ma fa’amaonia ai, o vaega ia o le pauta o le aisa, sa ia faia fo’i le suega i le sikaleti sa i ai lau mamago lanumeamata ma fa’amaonia ai, o vaega ia o le laau fa’asaina o le mariuana.

Na fesili le ali’i Loia ia Uiagalelei i le ali’i Leoleo ia Thomsen, e fa’amatala le mafua’aga na ala ai ona talosaga le Ofisa o Leoleo mo se poloaiga e saili ai le nofoaga o le Aute, ae na tali le molimau, na latou taumafai e saili pe maua i ai ni fana atoa ai ma ni pulu fana.

Na toe fesili Uiagalelei ia Thomsen pe na maua e Leoleo ni fana ma ni pulufana i le latou osofaiga, na tali le molimau, “E leai”.

Na fesili le ali’i loia mo le itu tete’e pe aisea na latou manatu ai e saili le nofoaga o le Aute pe maua i ai ni fana, ae na tali le molimau, e mafua mai i le fa’alavelave lea na sola ai i tua le ali’i pagota ia Manu Lefatia ma fana se ali’i i Leone.

Na fia malamalama Uiagalelei i fualaau fa’asaina sa maua i le fale o Lefatia, pe na tusi ai ai le igoa o Lefatia i pepa ta’itasi sa latou maua, na tali le molimau e leai. Na toe fesili le ali’i loia a le itu tete’e pe na i ai se pepa poo ni faamaumauga na maua mai i le Matagaluega o Fefa’atauaiga a le malo, e faamaonia ai o Lefatia e pulea le pisinisi o le Aute, na tali fo’i le molimau e leai.

I fa’afinauga fa’ai’u a loia, na finau ai Uiagalelei i le fa’amasinoga ina ia fa’aleaoga le tagi fa’asaga ia Lefatia, ina ua le mafai e le malo ona tu’uina atu mau e lagolagoina ai le latou tagi fa’asaga i le ua molia. Ae na finau le loia a le malo ia Pengelly e fa’apea, ua lava ma totoe mau na folasia e fa’amaonia ai, sa i ai se solitulafono sa fa’atinoina, o Lefatia fo’i o lo o tu’uaia i le fa’atinoina o lea solitulafono.

Na fa’amalieina le fa’amasinoga i mau sa tu’uina atu e le malo, ma faia ai loa le fa’aiuga ina ia tu’uina atu le mataupu a Lefatia e fa’aauau i luma o le fa’amasinoga maualuga. O lo o taofia pea Lefatia i le toese i Tafuna ina ua le mafai ona ia totogi le $100,000 na fa’atulaga e tatala ai o ia i tua.