Ads by Google Ads by Google

Tete’e Tautua Letasi i mau faamaonia na maua e Leoleo i lona fale


Le taimi na tauaao atu ai e sui o le malo meaalofa i le sui o le Ofisa o le DEA mai Amerika, susuga Layne Higgins, e fa’afetaia ai lona sao i le mataupu e pei ona tu’uaia ai e le malo ia Tautua Letasi i le umia faasolitulafono o fualaau fa’asaina ma a’upega. O le po o le aso Tofi o le vaiaso na te’a nei na toe fo’i atu ai Higgins i Amerika. O i latou o lo o i ai i le ata e aofia ai loia a le malo ia Woodrow Pengelly ma Bianca Lherisson, ma Leoleo e to’alua, Officer Zenobia Jennings ma Det. Savelio Vaofanua [ata AF]
ausage@samoanews.com

E ui i le tele o mau fa’amaonia na fa’ailoa e le itu a le malo i luma o le vaega iloilo iuga, e lagolago ai le latou tagi fa’asaga ia Tautua Letasi, peita’i na taua e le loia a le itu tete’e, e le moni tu’uaiga a le malo fa’asaga i le ua molia, e o o fo’i i mea molimau o loo finau le malo sa maua i le fale a leu a molia, e talitonu le itu tete’e, e le moni lea molimau.

 

O le taeao o le aso Tofi o le vaiaso na te’a nei na mae’a aloaia ai taualumaga o le fa’amasinoga o Letasi, i le mae’a ai lea ona valaau e le malo o a latou molimau.

 

O loo tu’uaia e le malo ia Letasi i moliaga e 4. O ia moliaga e aofia ai moliaga mamafa e 2 o lona umia fa’asolitulafono o le fualaau fa’asaina o le aisa ma le fa’amoemoe e tulei ma fa’atau atu i isi tagata, atoa ai ma le umia fa’asolitulafono o le laau fa’asaina o le mariuana ma le fa’amoemoe e tulei ma fa’atau atu i isi tagata. O lo o tu’uaia fo’i o ia i moliaga mama e 2 o lona umia fa’asolitulafono o ni aupega se 2 e le i lesitalaina.

 

Na taua e le loia a le malo ia Woodrow Pengelly i lana folasaga fa’ai’u e fa’apea, o moliaga fa’asaga ia Letasi, na afua mai i le fa’alavelave lea na tula’i mai i le taeao o le aso 21 o Me, 2017, ina ua taofia e le ali’i Leoleo ia Justin Thomsen lana ta’avale i luga o le alatele i le alu saoasaoa, ae maua ai se fana ma se ato faafafa sa i ai fualaau fa’asaina, atoa ai ma mea e fa’aaoga e utu ai i totonu o fualaau fa’asaina.

 

Na osofa’i e Leoleo lona fale i le aso lea lava i Aoloau, ma maua ai le isi fana, faapea ai ma isi mea e fa’aaoga e i latou e tagofia fualaau fa’asaina e aofia ai ma le paipa tioata e ula ai le aisa.

 

O mau fa’amaonia uma na maua e le malo mai ia Letasi, na mafua ai ona fa’avae le talitonuga o le malo, o le ua molia o se tagata sa galue e tulei ma fa’atau atu fua laau fa’asaina i tagata lautele.

 

O molimau e to’a 6 na valaauina e le malo e aofia ai Leoleo e to’a 4, o se tagata e i ai lona tomai faapitoa i le faia o suega i fualaau mai le Ofisa e Suesueina Fualaau fa’asaina a le Feterale i Kalefonia (DEA), susuga Layne Higgins, fa’apea ai ma se tagatanu’u o Aoloau e tuaoi lona maota ma le fale a le ua molia.

 

Na faamaonia e Leoleo i a latou molimau i le vaega iloilo iuga e fa’apea, o fualaau fa’asaina sa maua, o fana faapea ai ma isi uma mea e fa’aaoga e tagata latou te tuleiina fualaau fa’asaina, o mea uma ia sa maua i totonu o le ato fa’afafa sa i totonu o le ta’avale na fa’afoe e Letasi, ae o isi mea na maua mai i lona fale.

 

Na taua e Pengelly i lana folasaga fa’ai’u e fa’apea, na fa’amaonia e le ali’i Leoleo ia Thomsen i lana molimau, o ia na taofia le ta’avale na fa’afoeina e Letasi, o ia fo’i na mauaina le fana ma le ato fa’afafa i totonu o le ta’avale.

 

Na fa’amaonia e le isi molimau a le malo ia Det. John Paselio i lana molimau e fa’apea, o ia sa faia suega i vaega o fualaau fa’asaina sa maua ia Letasi ma faamaonia ai, o vaega ia o le pauta o le aisa ma le laau fa’asania o le mariuana.

 

Sa ia faamaonia atili fo’i e fa’apea, sa latou sailia le fale o Letasi i Aoloau ma maua i ai le paipa tioata o lo o totoe ai vaega o le pauta o le aisa.

 

Na faamaonia e le sui o le DEA mai Amerika ia Higgins e fa’apea, o fualaau fa’asaina na auina atu i Amerika Samoa, sa ia faia i ai se suega ma faamaonia ai, o vaega ia o le pauta fa’asaina o le aisa.

 

Na taua e le isi molimau a le malo e fa’apea, i le masina o Me o le tausaga na te’a nei, sa ia vaaia ai le to’atele o tagata e aga’i atu i le fale o Letasi ae le masani ai, e foliga mai o loo aga’i atu i latou e fa’atau mai fualaau fa’asaina.

 

Na taua e Pengelly i le vaega mulimuli o lana folasaga e fa’apea, ua lava ma totoe ia fa’amatalaga e fa’amaonia ai le latou tagi fa’asaga ia Letasi.

 

Ae na taua e le loia a Letasi ia Ryan Anderson i lana folasaga fa’ai’u e fa’apea, o le tagi a le malo fa’asaga i le ua molia, o lo o fa’avae i luga o masalosaloga ae aunoa ma ni mau fa’amaonia.

 

O le ta’avale na fa’afoeina e Letasi i le aso na taofia ai o ia, na taua e Anderson i le vaega iloilo iuga e fa’apea, e le o sana ta’avale. O meatotino fo’i sa i totonu o le ta’avale e aofia ai ma le ato fa’afafa na maua i ai fualaau fa’asaina, e le malamalama i ai le ua molia.

 

E oo foi i le paipa tioata lea e finau le malo sa maua i le fale o Letasi, na finau le itu tete’e e fa’apea, e le moni lea molimau, e lei i ai fo’i le ua molia i totonu o le fale i le taimi na sailia ai e Leoleo le fale.