O le aso Lua o le vaiaso lenei na tula’i ai le susuga ia Samuel Gaisoa i luma o le Fa’amasinoga Maualuga i lana uluai iloiloga ma ia tete’e ai i moliaga fa’asaga ia te ia e pei ona molia ai e le malo.

E 11 moliaga o lo o tu’uaia ai e le malo ia Gaisoa, lea e aofia ai moliaga o le umia fa’asolitulafono o fualaau fa’asaina faapea ai ma moliaga o le umia fa’asolitulafono o a’upega malolosi.

O le aso 28 Fepuari e toe fofogaina ai le mataupu a Gaisoa i luma o le Fa’amasinoga Maualuga.

ILOILOGA FA’AMASINOGA ITUMALO

Ae le’i tulai Gaisoa i luma o le Fa’amasinoga Maugalua, sa faia sana iloiloga i luma o le Fa’amasinoga Fa’aitumalo i le aso Faraile o le vaiaso ua te’a, e fa’afofoga ai le fa’amasinoga i mau a le malo pe fa’amonia moliaga fa’asaga ia Gaisoa, lea o lo’o tatala i tua ina ua ma’ea ona totogi le $50,000 e pei ona fa’atulaga e le fa’amasinoga.

E tasi le molimau a le malo sa valaauina i le taimi o lea iloiloga, o le ali’i leoleo ia Justin Thomsen. Sa fa’ailoa e Thomsen i lana molimau, o le aso 14 Novema, 2018 sa fa’ataunu’uina ai se osofaiga a leoleo e ala lea i se poloaiga a le fa’amasinoga.

O nei osofaiga e aofia ai le fale o Gaisoa i Kokoland, ma lona ofisa i le kamupani a le Tautua Mo Oe (TMO) i Tafuna. O le TMO o se kamupani a le Tama a le ua molia.

E pei ona taua e le malo i le latou tagi, e osofa’i e Leoleo le fale o Gaisoa ae o le taimi lea o loo i ai o ia ma lona faletua i Hawaii e asiasi i nisi o la aiga.

O le po o le aso 15 o Novema na toe malaga mai ai i le atunuu ia Gaisoa, ma aga’i sa’o atu loa i le Ofisa o Leoleo mo le tuu aloaia atu o ia i aao o malu o le malo

I le molimau a Thomsen, sa ia fa’amalamalama ai e faapea o le osofaiga a leoleo ina ua ma’ea ona maua fa’amatalaga mai se isi molimau fa’atuatuaina ma sa taua ai e i ai fualaau fa’asaina i le ofisa o Gaisoa.

I le tagi a le malo o lo’o fa’ailoa mai ai e fa’apea na maua i le ofisa o Gaisoa pepa iila o loo i ai se vaega o le pauta pa’epa’e i totonu e tusa ma le 3 kalama lona mamafa. Sa faapea fo’i ona maua ai ma se pepa iila o loo i ai lau laau mamago e foliga o lau o le mariuana, e tusa lona mamafa ma le 1 le kalama. Na maua ai fo’i e Leoleo i totonu o le ofisa ni paipa tioata se 2 e ula ai le aisa, o loo i ai vaega o le pauta o le aisa i totonu.

Ina ua ma’ea le osofaiga i le ofisa, sa agai ai loa leoleo i le fale o Gaisoa i Kokoland. I lana molimau i luma  o le Fa’amasinoga Itumalo, sa fa’ailoa ai e Thomsen e fa’apea na maua i totonu o le potu moe a le ulugali’i ituaiga a’upega malolosi eseese.

E pei ona taua i fa’amaumauga a le fa’amasinoga, e tusa ma le 10 ituaiga laau malosi eseese na mafai ona maua e Leoleo i le latou osofaiga, ma le silia i le 2 afe pulufana i soo se ituaiga na maua ai fo’i i totonu o le fale.

O nisi o laau malosi na maua e aofia ai le MP5 submachine gun; tasi le fana o le ituaiga o le ‘12 gauge shot gun; 2 fana o le ituaiga o le AR15.

Sa molimau foi Thomsen, e fa’apea mea uma nei sa maua, sa ave e leoleo i le Ofisa o Leoleo i Tafuna ina faia i ai suesuega. Ma ina ua ma’ea ona tuuina atu lea i le ofisa o lo’o teu mau mea molimau a leoloe i Fagatogo.

O le ali’i loia ia Marcellus T. Uiagalelei o loo tula’i mo Gaisoa, ma sa tele fesili sa tuuina atu i le molimau. Sa fesiligia le molimau pe sa iloa e leoleo o ai e nonofo i le fale o Gaisoa i Kokoland; e i ai nisi e tagata e i ai ki i le ofisa; ae po’o fea sa i ai Gaisoa i le taimi na osofai ai e leoleo lona fale.

Sa tali ia Thomsen, o le fale e nofo ai le ua molia, ma lona toalua ma le la fanau. Mo le ki o lona ofisa e na o le to’alua lava tagata e i ai ki - e le aofia ai Gaisoa - o le toalua o le ua molia ma le tama o le ua molia.

Sa i ai nisi fesili fa’aopoopo a Uiagaleleli mo le molimau. Mo le itu alo malo, sa tulai ai le tama’ita’i loia sili lagolago ia Laura Garvey ma ia finau i le fa’amasinoga ua lava ma totoe mea molimau a le malo e fa’amonia ai lana tagi fa’asaga i le ua molia. Ua le gata i lea, o a’upea malosi ma fualaau fa’asaina sa maua i le osofaiga a leoleo e fa’asa i totonu o Amerika Samoa e pei ona fa’ailoa mai i tulafono a le malo.

Ae sa finau Uiagaleleli e fa’apea e le o lava molimau e lagolagoina ai le tagi a le malo aua o mea sa maua i le osofaiga a leoleo e mafai ona ave i totonu o le fale ma le ofisa a Gaisoa e se isi tagata.

I le tali a le fa’amasinoga, sa saunoa le afioga i le Fa’amasino ia Fiti Sunia e fa’apea e leai ni fa’amaumauga e fa’amaonia ai e i ai se isi tagata sa ia aveina i totonu o le ofisa ma le fale o Gaisoa laau malolosi ma fualaau fa’asaina sa maua i le osofaiga a leoleo.

I le fa’aiuga, sa fa’ailoa ai e Sunia le lava ma totoe o mau fa’amaonia e lagolagoina ai le tagi a le malo.