Na teena e Sio Godinet Jr moliaga o lo o tu’uaia ai o ia e le malo, ina ua tula’i i luma o le Fa’amasinoga Maualuga i le aso Faraile na te’a nei.

O lona teena ai o moliaga mamafa e 6 o lo o tu’uaia ai o ia e le malo, ua fa’atulaga ai loa lana ulua’i iloiloiga e fofogaina lea i le masina o

O le ulua’i iloiloga a Godinet sa faia i le aso Lulu na te’a nei i luma o le afioga i le ali’i fa’amasino ia Fiti Sunia, o le Fa’amasinoga Fa’aitumalo, na mafua ai loa ona tofu atu lana mataupu i luma o le Fa’amasinoga Maualuga, ina ua fa’amalieina le Fa’amasinoga i mau sa tu’uina atu e le malo, e lagolagoina ai la latou tagi ua faia fa’asaga ia Godinet.

E 8 moliaga mamafa na tu’uaia ai e le malo ia Godinet, ae i le mae’a ai o lana ulua’i iloiloga, na solofua ai loa e Sunia isi moliaga mamafa e 2, ina ua le mafai e le malo ona tuuina atu ni mau e lagolagoina ai ia moliaga, ae totoe ai loa na o moliaga mamafa e 6 lea ua mae’a ona ia teena.

I le ulua’i iloiloga sa faia i luma o le Fa’amasinoga Fa’aitumalo, sa tula’i ai le tama’ita’i loia sili lagolago ia Christy Dunn mo le malo, ae tula’i le ali’i loia fautua lagolago ia Ryan Anderson mo Godinet.

E $50,000 le vaega tupe na fa’atulaga e le fa’amasinoga e totogi, ona fa’atoa mafai lea ona tatala Godinet i tua. Ae i le mae’a ai o lana ulua’i iloiloga, na fa’aitiitia ai loa i le $30,000 le tupe e tatala ai o ia i tua.

E tasi le molimau na valaau e le malo i le taimi o le ulua’i iloiloga sa faia i le vaiaso na te’a nei, o le susuga lea i le ali’i leoleo suesue sa autu i ai le suesueina o lenei mataupu, le ali’i leoleo ia Det. Justin Thomsen. E to’atasi fo’i le molimau a le itu tete’e sa valaauina, o le susuga i le ali’i Suesue mai le Ofisa a le Loia Fautua, susuga a Eddie Fruean.

Na taua e Thomsen i lana molimau e fa’apea, o ni fa’amatalaga sa tuuina atu e se molimau fa’atuatuaina i Leoleo i le masina o Fepuari o le tausaga nei, na amata mai ai loa iina ona suesueina e le Vaega e Suesueina Fualaau Fa’asaina a le Ofisa o Leoleo, le mataupu fa’asaga ia Godinet, atoa ai ma ni isi sa taua lo latou galulue fa’atasi i se pisinisi e fa’atau faasolitulafono atu ai fualaau fa’asaina, e pei o Merika Lomu ma Lyon Grey.

Na taua e le molimau faatuatuaina i Leoleo e fa’apea, e masani ona ia vaaia le to’atele o tagata faapea ai ma ta’avale, e aga’i atu i le fale o Godinet i Pago Pago ma fa’atau mai ai fualaau fa’asaina o le aisa ma le mariuana.

Sa taua fo’i e le molimau lona fa’alogoina o ni talanoaga i le va o Godinet ma isi o lo o autova’a atu e fa’atau mai fualaau fa’asaina, o fa’amatala i ai e Godinet lo la galulue fa’atasi lea ma Lomu i le la pisinisi e fa’atau atu ai fualaau fa’asaina, ma ua maitauina fo’i le tupu ola ola o le la pisinisi ma Lomu.

O le maua ai e Leoleo i nei mau fa’amatalaga mai le molimau fa’atuatuaina, na fa’atulaga ai loa se fa’atau faapitoa e saili mai ai le vaega muamua o se taumafaiga e pu’e faapagota Godinet ma Lomu, ma fa’atau mai ai e le molimau fualaau faasaina o le mariuana mai ia Lomu, a o i ai fa’atasi o ia ma Godinet, faapea ai ma isi tagata e to’a 3 i totonu o le ta’avale a Godinet.

O le aso 15 Me o le tausaga nei, na osofaia ai loa e Leoleo le fale o Godinet i Pago Pago, i lalo o se poloaiga mai le fa’amasinoga, e saili ai fualaau fa’asaina pe fa’amaonia ripoti a le molimau fa’atuatuaina.

I lea osofaiga, na maua ai e Leoleo i se tama’i potu o le fale fogafalelua a Godinet se vaega tele o mariuana ma aisa, atoa ai ma isi mau mea e fa’aaoga e tulei ma fa’atau atu ai le fualaau fa’asaina i isi tagata. Sa maua ai fo’i i totonu o le potu lea ia Lomu ma Grey.

O fafo o le potu i totonu lava o le fale fogafalelua na maua ai e Leoleo le isi ali’i, ae o Godinet na maua i totonu o le isi ona fale. E leai ni fualaau fa’asaina na maua e Leoleo ia Godinet.

Na valaau fo’i e le malo le latou molimau i luga o le nofoa molimau, le ali’i Suesue ia Fruean. I le molimau a Fruean, sa ia fa’ailoa ai ata sa ia pu’eina mai le fale o Godinet i Pago Pago, o le ata o le mita o le fale atoa ai ma le ata o le pili moli. I ia ata, e ese le igoa o le tagata o lo o alu ai le mita o le fale ma le pili moli, e le o alu i le igoa o Godinet.

I le fa’afinauga a le itu tete’e, e ui o lea na poloaina e le fa’amasinoga Leoleo latou te sailia le fale e pulea e Godinet, e talitonu le itu tete’e, e le o Godinet e ana le fale fogafalelua lea o lo o tu’uaia sa maua i ai fualaau fa’asaina. E ese le tagata o lo o alu ai le lesitalaina o le fale.

E ui i le fa’afinauga mai le itu tete’e, na fa’amalieina le afioga i le ali’i Fa’amasino ia Sunia, ua lava ma totoe mau sa tuuina atu e le malo e lagolagoina ai le tagi fa’asaga ia Godinet. Saunoa atili Sunia e fa’apea, e ui e le i maua ni fualaau fa’asaina ia Godinet, peita’i i lalo o le vaega o le tulafono ‘46.3207’, o lo o manino mai ai, e a’afia i le tulafono le tagata na te lagolagoina gaioiga fa’asolitulafono a le isi tagata.

I le silasila a le fa’amasinoga, sa matua lagolago malosi e Godinet gaioiga fa’asolitulafono sa faia e Lomu, e ala i lona fa’aaoga o lana ta’avale e kiliva ai fualaau fa’asaina, atoa ai ma le fa’aaoga o lona fale e tu’u pepa ai fualaau fa’asaina, atoa ai ma le avea o lona fale ma nofoaga e autu i ai fefa’atauaiga o fualaau fa’asaina.