Ads by Google Ads by Google

Tete'e le Meningococcal - Po'o le Fiva Matuia mai Fanau


Aufaigaluega a le Matagaluega o le Soifua Maloloina, le fa'atonusili ma lana taupulega i ali'i ma tama'ita'i foma'i ma le 'au tausima'i, ua latou galulue fa'atasi e tu'ufa'atasia se lipoti i le gasegase o le Meningococcal. [ata: Leua Aiono Frost]

O se vaaiga i foliga mai o le gasegase o le Meningococcal pe a o'o ina tetele le fiva ma a'afia le tino i le pata mageso lea. [ata: Leua Aiono Frost]

I le aso ananafi, na saunoa ai le Fa'atonu o le Soifua Maloloina Motusa Tuileama Nua ma le vasega o Foma'i fa'apitoa i luma o le Faigamalo, e aofia ai sui tofia mai le Ofisa o Mataupu Tau Samoa, DHSS, ma le Immigration e fa'ailoa le Fa'ama'i o le Meningococcal, po'o le fiva matuia, ae tigaina fo'i le fanau i le tiga o le ua ma fa'asolo atu i le ulu, ae maise o le pua'i ma le fa'afaufau i mea'ai.

 

E le gata ina fa'ailoa lea fa'ama'i ma lona afuaga, a'o le fa'ailoa o ala o le a mana'omia le galulue fa'atasi ma le Soifua Maloloina, ina ia malu puipuia Amerika Samoa mai le a'afia atu ai nisi o le tupulaga talavou i lenei gasegase tigaina ona auga pe a o'o ina a'afia ai i latou, ae maise ona e mafai ona pesia mai fanau i nisi e malaga mai i totonu o le atunu'u ae ua mae'a ma'i i lea gasegase.

 

"O le atunu’u o Fiti ua nei lea gasegase, ona e i ai so'otaga vavalalata o Fiti ma Aferika i Saute lea na matuaina mai ai le Meningococcal. Ona o turisi ma tagata femalaga'i i le va o tatou malo fa'aatumotu i le pasefika nei, e ao ai ina matua mata'alia i tatou uma i ala e tapena ai le malupuipuiga o tatou tagatanu'u ma e uma ua alaala i o tatou laufanua,” o se tala lea a le tama'ita'i Foma'i Dr. Lauvao.

 

O le afuaga o lea gasegase e mafua mai i siama ua fa'aigoaina Neisseria Meningitidis ma e mafai ona ulu i le tino o le tagata soifua mai le faua poo mea sa e manavaina mai se tasi o tale maia i fafo nei siama po'o le kisi fo'i.

 

O i latou ua matele ina maua i lea fa'ama'i o fanau talavou mai le 11 tausaga le matutua se'ia o'o i le 18 tausaga le matutua, ae nonofo i nofoaga to'atele ai tagata. O i latou fo'i nei ua agava'a e inumia le vai ua mae'a tapena mo le puipuiga o i latou ina ne'i maua ai i latou.

 

Vaila'au ua tapena mo le puipuiga po'o le togafitiga fo'i o le fanau talavou mai le maua ai i lea ma'i fita ua fa'aigoaina o le "Menactra" ma ua fa'atalosagaina matua ina ia galulue fa'atasi ma le Matagaluega ina ia sainia pepa ua taua'aoina e mafai ai ona fa'ataga i latou e tui lou lo i le Menactra.

 

O le inumaga muamua e tasi lava mo i latou o fanau e i le va o le 11 - 12 tausaga le matutua. O le inuga lona lua e faia lea i fanau ua 16 ma silia atu tausaga.

 

Ua mae'a fa'atutu nofoaga e 10 a le Matagaluega o le Soifua Maloloina e mata'ituina ai ma fa'atautaia galuega puipuia mai le Meningococcal. Ua fa'asalalauina fa'alaua'itele fo'i i le Nusipepa, Leitio ma Televise.

 

O vaega nei e 10 ua eseese mea e uati ai i latou, ua fa'asolo i latou i a'oga, ma tua i afio'aga. Ua i ai le vasega o tama'ita'i Tausima'i ua fa'avasega e faigaluega i Malaeva'alele ma Uafu.

 

Ua a fa'alauiloa fo'i foliga mai o le gasegase, e tali tutusa ma le pata mai o le ma'i Tane Susu ma le Misela le gasegase lea, ae le tiga le fa'ai o nisi e misela ma Tane Susu ona o le vevela tele e ono o'o i ai le tamaititi. Pe afai e va'aia lea tulaga, aumai le tamaititi i le falema'i, ia mautinoa e le o maua i le Meningococcal muamua.

 

O auga nei o le gasegase lea: Fiva Matuia; Tiga ma vili i le Ulu; E malo le Ua; E fa'afaufau, a pupula i le moli e tiga mata; e pata mai le tino e pei se tane susu; ma tau galogalo mea i lona mafaufau ma e aupua'i fo'i pe a tigaina tele.

 

Mo le vasega o matua, pe afai o le a taua'aoina pepa e fa'ataga ai ona tui lau tama i lenei tui puipuia o le Meningococcal, e tatau ona e silafia lelei, e le mafai ona e fa'atu'iese ai i lea tui.

 

Ua mae'a fa'atulafonoina fo'i ina ia faia tui puipuia o fanau, afai o le a e tete'e e le faia tui nei o lou alo, e i ai le aia tatau a le Matagaluega o le Soifua Maloloina e fa'auia ai le Matagaluega o A'oga ina ia tu'ua e lou alo le a'oga, aua ua le mafai ona usita'ia le tulafono ia faia tui puipuia o le fanau a'oga uma lava.

 

"Ia aua lava ne'i avea se talavou e to'atasi ma se auala e afaina uma ai le to'atele o fanau a le atunu'u, ia tausisia e matua lenei fa'asalalauga, ma ia faia le fa'aiuga e tatau ma le tulafono. Peita'i afai o i ai se tulaga e masalosalo ai oe le matua i nei tui, e mafai ona e vala'au mai i le Laina a le Matagaluega mo se fa'amalamalamaga atili o oe, e ala i tui puipuia o le fanau talavou mai le Meningococcal lea ua na'o le 11 tausaga se'ia o'o i le 18 tausaga e tui ai,” o se toe fa'apupulaga lea a Motusa.

 

Ua amata ona va'ai toto'a i le puipuiga o le Manu'atele i lenei lava galuega o lo'o ua fa'asolo nei, o le Uafu ma le Malae Vaalele lea ua amata atu ai nei galuega va'ava'ai toto'a mo le Manu'atele, ina ia le alu lava so'o se talavou i le va'alele a'o le'i siaki le pepa tui. O le fanau o tu'ua mai i Tutuila nei, o le a aofia uma i lenei siakiga a'o le toe fo'i i le Manu'atele.

 

I pou uati nei i le Malaeva'alele ua to'afa i latou ua tuia mai i lo latou taunu'u mai o e na malaga mai i totonu o Amerika Samoa i le va'alele, ae to'alua i la'ua ua faia tui puipuia nei a'o le'i tu'ua le atunu'u mo Samoa.

 

"O a lava gaoioiga ua faia i le tatou nei malo, ua fa'apea fo'i ona faia i malo tuaoi uma o malo fa'aatumotu. O se mea lelei le feso'ota'i i galuega lelei, ia tausia le saogalemu o le soifua o e uma e soifua ma femalaga'i i le va o tatou malo fa'aatumotu ma malo tetele o Amerika, Niu Sila ma Ausetalia, lea tatou te mafaia ona malaga sa'o atu lava i ai,” o se isi lea tala a Motusa.

 

O le aufaigaluega fo'i ua matua mataala i latou ina ia tini taunu'u le fa'amoemoe, ia matua saogalemu Amerika Samoa mai le Meningococcal. I le taimi nei, ua i ai le gasegase e na'o le lua masina le matua o le pepe, e malaga mai Niu Sila ae ua o'o mai i Amerika Samoa le asiasiga ma lona aiga, ua taofia nei o ia i le ICU, o lo'o mataituina pea e tali foliga i auga o le Meningococcal, peita'i e le'i fa'amaonia mai i vaega ua auina atu mo suesuega i fafo ina ia faia mai ai se fa'aiuga. Afai o le a fa'amaonia mai o lea fa'ama'i, e toe faia vave se isi tala fa'asalalau fa'avave e lapata'ia ai le atunu'u.

 

Peitai, i le taimi nei, o galuega ua faia nei ma tima'ia ai le mamalu o matua ma le atunu'u atoa, ia nofouta i ai ma usita'ia, ina ia taofia le o'o mai o lea fa'ama'i pepesi i le atunu'u. O le aumaiaga o vaila'au mo tui puipuia, ua fa'atupeina e le Immunization Funds a le Soifua Maloloina.