Ads by Google Ads by Google

Tete’e atu ma ia taofia le sauaga i totonu o aiga


O se va'aiga ia i latou na tutu ma latou saini ua mae'a tu'utoina o latou loto ina ia latou fa'ailo le 'auau o le fa'amoemoe, "Ia taofia Sauaga i totonu o Aiga!" i le aso ananafi. [ata: Leua Aiono Frost]

O le taeao ananafi sa fa'atasia nisi o le atunu’u e sili atu ma le to’a 50 i latou e lagolagoina le mau taua, e “Ia tineia sauaga i totonu o Aiga!"

 

O lea fo’i fa’atasiga sa fa’ailoa ai lagona ootia ona o se tasi o tina, ua a’afia i sauaga, o lea tina o le to’alua o le susuga ia Jonathan Fanene, o lo’o tu’uaia e le malo i lona fa’ao’olima i lona to’alua

 

Na poto le fa’atasiga i lumafale o le Fagatogo Square, ma amatalia fo'i le fa'amoemoe i le sauniga lotu ina ia feso'ota'i gaoioiga uma e fesoasoani ia i latou o lo'o mafatia i sauaga i totonu aiga, ma le finagalo o le Atua, ia mautu se fesoasoani mo i latou, i taimi uma e pagatia ai.

 

O le susuga le Fa'afeagaiga EFKAS i Fagatogo Rev. Iasepi Ulu na avea ma ositaulaga e si'itia le fa'afetai, ma sina upu fa'amalosi i le galuega ua finagalo i latou ua pa'au ane i lea taeao toto'a e fa'atino. Ia fa'ailoa atu, o lo'o i ai le ala e fesoasoani atu ai le tulafono ma so'o se tasi o lo ua loto e a'apa atu ma fesoasoani.

 

"O sauaga i totonu o aiga, e lutia fa'atasi ai tina ma fanauiti, e le o le finagalo lea o le Atua. Peita'i ua fa'apea fo'i ona le o le agaga lea o le olaga fa'asamoa i totonu o aiga Samoa. Peita'i, ua le 'alo ese nei ituaiga o faaletonu mai totonu o tatou aiga. A'o fiafia ma feofoofota'i le alofa i totonu o nisi aiga, ae o lo'o lotolotoi ai fo'i ma ni aiga o lo'o sauaina fanau i totonu o tatou afio'aga o alaala fa'atasi ai,” o se tasi lea o saunoaga iloga sa fa'afofogaina e i latou na auai i le tatalaga o lea fa’atasiga.

 

Na i ai sui fa'apitoa sa saunoa fa'apitoa e fa'apupula atili ala ua fesoasoani mai ai latou fa'alapotopotoga i sui ua o'o i nei sauaga, "E mafai ona matou fesoasoani atu!" O le tama'ita'i o Mona Uli mai le Alliance, Toe fausia se aiga mautu, sa ia tula'i ma fa'ailoa, "O tina uma ua latou auai i ni mafutaga i totonu o faigauo ma aiga fo'i ua sauaina, e mafai ona outou fa'ailoa mai ia i matou e ala i le laina telefoni, Telefoni 699-0272 e te maua ai se fesoasoani!"

 

Ua ia fa'amatala fo'i, "E matua tele le avanoa e le toe o'o ai le lima o lou to'alua ia te oe, pe afai e te vala'au, ma matou fesoasoani atu. Se'ia mae'a fo'i ona toe fa'amalosi'au i le tama o le aiga e ala i fautuaga ma talanoaga ma sui mamalu fa'amalosi tulafono a le tatou Malo, ona iloa ai lea o se a'oa'iga lelei mo ia, e fa'atonutonu ai lana amio i totonu o le mafutaga fa'aleaiga. A leai e mafai ona talosagaina se poloaiga faaletulafono e taofia ai lona toe mafuta ma le tina ma le fanau, se'ia mae'a suesuega a ali'i leoleo, ma faia le fa'aiuga a le fa'amasinoga”

 

Sa tula'i fo'i le susuga Ken Kuaea ma lona faletua, Luisa, ma la'ua faia se molimau matagofie, i ala e mafua ai ona tatau ona taofia sauaga i totonu o aiga. "O lo'o a'afia lagona o le fanau, ae maise le tina ua sauaina. O le a fa'aleaogaina se mafutaga sili ona taua, o le sootaga o le alofa i totonu o le aiga, o se mea taua tele i le soifua a'e o le fanau. Motusia le saogalemu sa tatau i le fanau ona ola mautinoa ai ma le fiafia. A fa'amalosia fo'i le tulafono e ave'esea ai le ua fa'asaua i lona to'alua ma le fanau, ona motusia lea o le alofa fa'amatua mai le fanau. Ae tatau lava ona atoa matua e lua mo le fanau ina ia mautu lo latou aiga atoa. O le ogaoga lena o tiga e o'o i le fanau, pe afai e le toe va'aia le isi matua i totonu o le latou aiga."

 

O se tasi sa valaaulia e saunoa i le fa’atasiga o le faipule o Amerika Samoa i le Konekeresi, Amata Coleman. "O Sauaga e le o se mea o i ai i totonu o aiga Samoa, peita'i ua le sao mai ai aiga Samoa mai lenei fa'afitauli. Ua lutia ai le saogalemu ma ua tatau ona fetu'una'i muniao ae toe fa'amalosia mai le taua o mafutaga fa'aleaiga i le va o matua ma fanau. O le taualoa, le saogalemu ma le mafanafana o mafutaga a matua ma fanau, e tatau ona toe fa'amalosia a'ia'i."

 

O le fe'au taua lenei, "Ia mautinoa e i latou uma o e fai nei soligatulafono, ua i ai fa'asalaga, ma ua to'atele fo'i ua mae'a fa'alauiloa i tusitusiga o tala fa'asalalau, ua nofosala ona o nei solitulafono ua sauaina ai fanauiti ma tina i totonu o aiga,” o se tasi lea o vaega o le folasaga a Aumua.