Ads by Google Ads by Google

Tete’e Ali’i ma Faipule o Ta’u filifiliga o Logoai Siaki tofi senetoa


[ata: foa'i]

O le vaiaso ua te’a sa auina atu ai se tusitusiga mai Ali’i ma Faipule o Ta’u, Manu’a i le Peresitene o le Maota Maualuga, le afioga Gaoteote Tofau Palaie, ae maise afioga i senetoa, e fa’ailoa ai lo latou tete’e i le filifilia o Logoai Siaki Logoai e avea ma senetoa fou o le Itumalo Manu’a #1 i le Maota Maualuga.

 

O le filifilia o Logoai e avea o ia ma senetoa e tauaveina le nofoa o le itumalo i le Maota Maualuga lea ua avanoa ona o le tu’umalo i le tausaga ua te’a o le afioga i le Senetoa ia Galeai Moaali’itele Tu’ufuli.

 

I le taimi o le tuumalo o le afioga ia Galeai, e toe lua tausaga o lo’o totoe i lana nofoaiga e 4 tausaga. O Manu’a #1 e aofia ai Ta’u, Faleasao ma Fitiuta. E toalua senatoa o Manu’a #1 i le Maota Maualuga. O le isi tofi senetoa o lo’o uumia e le afioga ia Nuanuaolefeagaiga Saoluaga T. Nua - ma o ia foi lea o le Sui Peresitene o le Maota Maualuga.

 

Ma ua ma’ea ona fa’atulagaina e le afioga ia Gaoteote o le taeao nei i le itula e 8:30a.m e faia ai le sauniga i le Maota Maualuga e fa’atautoina ai Logoai.

 

I sana tusi ia Tesema 27, 2018 sa fa’ailoa ai e le afioga i le Failautusi o Mataupu Tau Samoa, Mauga T. Asuega i le afioga Gaoteote le fa’aiuga a le itumalo sa faia ma filifilia ai Logoai.

 

Ae peitai o lo’o le o ‘au fa’atasi ai le itumalo i le filifilia o Logoai. I se tusi i le aso 10 Ianuari, 2019 sa auina atu i le afioga ia Gaoteote ma afioga i senetoa o le Maota Maualuga, o lo’o fa’ailoa ai le tete’e o Ali’i ma Faipule o Ta’u i lenei filifiliga.

 

“O matou o ali’i ma faipule o le afioaga o Ta’u Manu’a. Se tasi o faigamalo o le Itumalo faapalota Numera #1 e aofia ai ma faigamalo o Faleasao ma Fitiuta,” o upu tomua ia o le tusi.

 

“O le tusi lenei e faapi’iama ma lagolagoina ai tusitusiga a le Tofa i le To’oto’o, Tauese Vaa Sunia, o le na filifilia e le nu’u e molimoli atu le finagalo o le Faletolu ma se lagona o lenei nu’u e tusa ai ma le filifilia o Logoai Siaki Logoai i le tofi Senatoa o le Itumalo Numera #1.”

 

“Matou te faamaonia i lenei tusi le mea moni - e le’i usuia se fono faaitumalo a Faleasao, Ta’u ma Fitiuta faatasi e filifilia ai Logoai Siaki Logoai.  E le i logoina mai fo’i lenei nu’u mo se tauaofiaga ma se fono faaitumalo mo lea faamoemoe,” o se vaega lea o le tusi.

 

“Matou te le iloa pe faafefea ona filifilia Logoai. O le mea ua mautinoa, e le i filifilia le Tofa ia Logoai i le tofi e le itumalo e tusa ma ala o le tulafono.  O Malaetele [i Ta’u] lava e fai ai le filifiliga.  O le fono lava na faia e matai o Fitiuta ma latou filifilia ai Logoai.  O saini a le Tootoo o Faamausili ma le Susuga ia Leasau o loo i ai i le pepa a le Tofa ia Logoai, o la’ua lava loto ae le o le finagalo ‘autasi a le Faletolu.”

 

“O le tatalo o lenei nu’u, ia alofagia e lau Afioga ma le mamalu o le Maota Maualuga, ia le tauoloa le suafa o Logoai e nofoia le nofoa ua avanoa ona o le tu’umalo o le Afioga Galea’I Tu’ufuli.”

 

“Ae se’i toe tuu mai se avanoa e faia ai se filifiliga e tusa o ala o le tulafono.  O le Maota Maualuga o loo se’ei ai Tama o le atunu’u, o loo teu ai le tofa saili ma le faautautaga loloto e tua i ai le faigamalo ma le atunu’u.”

 

Sa fa’ailoa fo’i e ali’i ma faipule o  Ta’u, “O le fono mulimuli nei i Malaetele, Ta’u sa faia ia...Ianuari 5, 2019.  O le Afioga i le Senatoa ia Nuanuaolefeagaiga se tasi o tamali’i o lenei nu’u sa ‘auai ma molimauina le finagalo o le Faletolu.”

 

O le filifiliga o Logoai, sa tula’i mai ai fo’i se isi tusi lea na auina atu i le afioga Gaoteote mai i ali’i ma faipule o Faleasao, o lo’o sainia e le “Ali’i ole Gafa”, le tofa ia “Solia Mutini”. I lea tusi, o lo’o fa’ailoa ai foi e Falesao lo latou le lagolagoina o le filifiliga o Logoai, ma le latou finauga, o lea filifiliga e le’i mulimuli i ala o le tulafono ma le Fa’avae o Amerika Samoa.

 

Fa’aalia i lea tusi e leai se fono a le itumalo sa faia mo le filifilia o se senetoa fou, ma sa fa’ateia i latou ina ua maua se tala, ua ma’ea on filifilia le tofa Logoai.

 

I sa latou talosaga i le afioga Gaoteote ma le Maota Maualuga, e aua ne’i talia le tofiga o Logoai e pei ona tuuina atu i afioga i Senetoa.

 

I lalo o le fa’avae o Amerika Samoa o lo’o manino mai ai le filifili ina o senetoa o le Maota Maualuga e ala lea i le fa’aSamoa, i fonotaga a itumalo eseese ma o le fa’aiuga e fa’amonia e fa’alupega o ia itumalo.