Ads by Google Ads by Google

Tete’e le ali’i o loo tu’uaia i le faia o uiga mataga i tu’uaiga a le malo


[ata: foa'i]
ausage@samoanews.com

O le masina o Ianuari o le tausaga fou lea ua fa’atulaga e faia ai le ulua’i iloiloga o le mataupu a James Fa’aleo i luma o le Fa’amasinoga Maualuga, i le mae’a ai lea ona ia teena o le tagi a le malo fa’asaga ia te ia i le aso Faraile na te’a nei.

 

O le aso Tofi o le vaiaso na te’a nei na fa’atulaga e faia ai le ulua’i iloiloga a Fa’aleo i luma o le Fa’amasinoga Fa’aitumalo, peita’i ina ua valaau le mataupu a le ua molia, sa fa’aalia ai e lana loia fautua ia Anna Wells le mana’o o Fa’aleo, e taofi le fa’ataunu’uina o lana ulua’i iloiloga, ae tu’u sa’o atu loa lana mataupu i luma o le fa’amasinoga maualuga.

 

Sa fa’aalia fo’i e le loia a Faaleo ia Wells se talosaga ina ia saili se isi nofoaga e taofia ai le ua molia, e ese mai i le toese i Tafuna, ona o popolega i lona saogalemu. O lea talosaga na fa’avae mai lea i se fa’alavelave sa tula’i mai i le vaiaso na te’a nei, ina ua fa’amata’u e se ali’i pagota ia Fa’aleo i totonu o le toese ma folafola i ai le fasiotia o ia.

 

Na fefe le ua molia i nei folafolaga ma ia faailoa ai loa i lana loia le mea sa tula’i mai. Na taua e le loia a Fa’aleo e fa’apea, talu ai le mataupu e lei leva atu nei, lea fo’i na tau fa’aolaola ai se alii pagota i le falema’i ina ua fasi fa’amo’amo’a e nisi ali’i pagota, o le mafua’aga lea o le talosaga ina ia saili se isi nofoaga e taofia ai Fa’aleo.

 

Ua fautuaina e le fa’amasinoga le sailiili toto’a i lenei mataupu a o le i tuuina atu i ai se faaiuga mautu. O le taimi nei, o loo taofia pea Fa’aleo i le toese i Tafuna ina ua le mafai ona totogi le tupe e $200,000 na fa’atulaga e le fa’amasinoga e tatala ai o ia i tua.

 

O loo tu’uaia e le malo ia Fa’aleo i moliaga e 27, lea e aofia ai moliaga o le faiaiga ma se tama’ita’i e laititi i lalo o le tulafono, o lona faia o uiga mataga, tagofia o itutinosa, atoa ai ma le faia o gaioiga e lamatia ai le saogalenu o fanau laiti.

 

O ia molaiga na alia’e mai i le fa’alavelave lea na tula’i mai i lona aiga i le tausaga nei, lea o loo tu’uaia ai o ia i lona faiaiga lea i le tama teine a lona to’alua e 13 tausaga le matua.

 

O le mataupu lenei na tofu atu i le Ofisa o Leoleo i Fagatogo, ona o le mataupu e pei ona fasi ai e Fa’aleo lona to’alua ma le tama teine a lona to’alua, peita’i ina ua seusue a Leoleo le mataupu, na atagia mai ai loa ma tu’uaiga o le faia lea o uiga mataga.

 

Na fa’ailoa e le tama’ita’i na a’afia i Leoleo, o le masina o Aperila o le tausaga nei na amata mai ai le la mafutaga fa’aleulugali’i ma Fa’aleo seia oo mai i le masina o Setema na te’a nei.

 

Ina ua fesiligia e Leoleo ia Fa’aleo e uiga i lenei mataupu, sa ia ioeina ai lona faia o uiga mataga i le tama teine a lona to’alua. Sa ia fa’atoese fo’i i Leoleo e tusa ai o lana solitulafono sa faia.

 

Afai ae tatala Fa’aleo i tua, ua fautuaina o ia e le fa’amasinoga e taua ne’i toe oo i le fale o loo nonofo ai lona to’alua ma le tama’ita’i na a’afia, a ia saili se isi nofoaga e nofo ai. Ua fa’asa fo’i o ia ona toe taumafai e fa’afesoota’i lona to’alua poo lana tama teine i soo se auala.