Ads by Google Ads by Google

Tete’e le ali’i Faifeau na te le i faia ni uiga mataga i lona afafine


[ata: foa'i]
ausage@samoanews.com

Na matua teena e le ali’i Faifeau e 56 tausaga le matua tu’uaiga sa ia faia uiga mataga i lona afafine i le vaveao o le aso 6 o Tesema, 2016, ina ua maua lona avanoa e molimau ai i le aso lona tolu o lona fa’amasinoga iloilo o loo fa’agasolo i luma o le Fa’amasinoga Maualuga i lenei vaiaso.

 

E le o mafai e le Samoa News ona fa’alauiloa le suafa o le ali’i Faifeau o loo tu’uaia i lenei mataupu, ona o puipuiga i le ono mafai lea ona iloa ai le teineititi o loo a’afia.

 

O loo tu’uaia e le malo le ali’i Faifeau i moliaga mamafa e 3 e aofia ai le faia o uiga faasotoma, tagofia o itutinosa o se teineititi e le faaipoipo i ai, faapea ai ma le faiaiga i se teineititi e tau toto i ai. O loo tu’uaia fo’i o ia i le moliaga mama e tasi o le faia o uiga e ono lamatia ai le saogalemu o fanau laiti.

 

E to’a 2 molimau na valaau e le malo e aofia ai le ali’i Leoleo ia Sgt. Misi Leo ma le foma’i sa fa’atinoina le suega fa’asaga i le teineititi i le aso na tula’i mai ai le fa’alavelave. Ae mo le itu tete’e, e to’afa molimau na valaau mo le latou itu, lea e aofia ai le ali’i Faifeau atoa ai ma lana fanau e to’atolu.

 

Na taua e le fanau a le Faifeau i a latou molimau, le leai o se taimi na latou fa’alogoina ai o e e mai le teineititi na a’afia i lona mana’omia o se fesoasoani. E leai fo’i se taimi na tuua ai na o le latou Tama ma le teineititi lea i totonu o le fale na o i laua.

 

O le masani a le aiga e pei ona taua e le molimau a se tasi o le fanau, latou te feala uma i le 3:00 i le vaveao i le taimi e ola ai le ‘alarm’ a le latou Tina e tapena ai mo lana galuega, ona sosoo ai loa lea ma a latou faiga Talosaga, ona fa’atoa tuua ai loa lea e le Tina le fale mo lana galuega, ae sauni loa i latou le fanau mo le aoga.

 

Na taua e le ali’i Faifeau i lana molimau e fa’apea, e leai ma se taimi na ia faia ai ni uiga mataga i lona afafine.

 

O le vaveao loo tu’uaia na tula’i mai ai le fa’alavelave, sa latou i ai uma i totonu o le fale ma lona afafine o loo tu’uaia na a’afia, atoa ai ma lana fanau e to’atolu laiti.

 

E leai ma se taimi na ia mafaufau ai fo’i e faia ni uiga mataga i lona afafine. Na pau le faalavelave na tula’i mai i le po o le aso 5 o Tesema a o lumana’i ai le vaveao o loo tuuaia na tula’i mai ai le fa’alavelave, na ia otegiaina ai lona afafine i le ituaiga olaga o loo ola ai, aemaise ai o ituaiga lavalava o loo ofu ai.

 

O fesili a le loia fautua ia Rob McNeill faapea ai ma fesili a le loia a le malo ia Robert Morris, na mafai ai ona fa’afofoga ali’i ma tama’ita’i iloilo iuga i le molimau a le alii Faifeau i le mea sa tula’i mai i le aso 6 o Tesema.

 

O le al’i Faifeau, e galue o se Inisinia mo se kamupani i Tafuna. I le taeao o le aso 6 o Tesema, 2016, sa tofia ai o ia e galue i le uafu i Fagatogo. A o i ai i lana galuega, na fa’afuase’i ona aga’i atu ni Leoleo se to’alua ma fa’atonu o ia latou te aga’i atu i le Ofisa o Leoleo, o loo i ai se mataupu o loo fia talanoa ai ma ia.

 

I le ogatotonu o le latou talanoaga, na fesili atu ai Leoleo i le mataupu e uiga i lona afafine, ae sa ia fai i ai, na te le iloaina se tulaga e fa’atatau i le mataupu o loo la talanoa mai ai, ona e leai se mea sa tupu.

 

Na tuu atu e le isi Leoleo se pepa lanu samasama o loo tusia ai ni faamatalaga i luga, ma fai atu ia te ia e tago e kopi uma fa’aupuga o loo i le pepa samasama i luga o le isi pepa, a mae’a, ona ia saini ai lea.

 

Na faailoa atu fo’i e le Leoleo ia te ia, afai e uma ona ia faia le tulaga lea, ona ia toe fo’i loa lea i lana galuega. A mae’a le 48 itula e le i toe oo atu lava se isi Leoleo e talanoa atu ia te ia e uiga i lenei mataupu, lona uiga ua mae’a le mataupu.

 

I lona usita’i i le Leoleo, na kopi ai e le Faifeau i lalo fa’amatalaga uma sa tusia i luga o le pepa samasama. Sa ia saini ai fo’i ma lona talitonuga mama, o le a toe fo’i e faigaluega. Peita’i, o le mae’a ai ona ia faia o fa’atonuga uma sa fai atu ai le Leoleo, a taofia faapagota ai loa o ia ma molia i lona faia o uiga mataga i lona afafine.

 

Na faaalia atili e le alii Faifeau e fa’apea, o ia e le lelei sana tusitusi poo se faitau tusi, na gata lana aoga i le “Standard Three” i Samoa, tusa lea o le Level 6 i Amerika Samoa nei.

 

Na fesili le Loia a le malo i le ali’i Faifeau pe na te iloa faitau le Tusi Paia, na tali le faifeau, ioe na te iloa faitau le Tusi Paia.