O le au malaga mai le Kolisi o Missouri Valley College (MVC) lea na asia Amerika Samoa i le vaiaso na te’a nei, sa latou fa’ailoa i le to’atele o fanau aoga o loo i ai le taleni o ta’aloga faapea ai ma o latou matua, le tele o le avanoa e mafai ai ona ulufale atu i latou e fa’aauau le olaga aoga i totonu o MVC.

A o le i toe tuua e le au malaga mai MVC le atunu’u i le po o le aso Tofi o le vaiaso na te’a nei, sa maua le avanoa latou te asia ai Aoga Maualuluga i le atunu’u, mo le fa’atalatalanoaina o avanoa sikolasipi o loo ofo mai e le aoga mo fanau aoga uma i Amerika Samoa o loo i ai le taleni i ta’aloga.

Sa maua fo’i le avanoa e asia ai e le au malaga le Kolisi Tuufaatasi a Amerika Samoa, atoa ai ma Asosi o Ta’aloga eseese i totonu o le atunu’u, lea o lo o i lalo o le fa’amalu a le Ofisa o Ta’aloga a le Olimipeka a Amerika Samoa (ASNOC).

O le au malaga sa ta’ita’i mai e le Faatonu o polokalame tau ta’aloga a le aoga, susuga Greg Silvey, faatasi ai ma le ali’i faiaoga o le au football a le aoga ia Paul Troth ma lona faletua ia Heather Troth, o ia o le Polofesa lagolago i totonu o le aoga.

Na taua e Silvey i se fa’atalatalanoaga ma le Samoa News e fa’apea, o le autu o le latou malaga mai i Amerika Samoa, o le taumafai lea ina ia fa’alauiloa atu i fanau aoga o loo i ai le taleni i soo se ta’aloga, o loo tele avanoa e maua i MVC e mafai ai ona fa’alautele la latou taleni ma avea ai i latou ma totino o ‘au ta’aalo a le latou aoga.

“I le tele o tausaga ua mavae, sa to’atele naua tamaiti aoga mai Amerika Samoa nei sa auai i au ta’aalo eseese a le matou aoga, ae maise ai lava i le ta’aloga football. O ni tamaiti aoga e malolosi toe lelei la latou ta’aalo, o nisi fo’i o tausaga sa siamupini ai la matou ‘au football ona o le lelei o tamaiti Samoa sa i ai i totonu o le ‘au, o le mafua’aga lena ua matou malaga mai ai, ina ia fa’ailoa atu i isi fo’i fanau aoga a Amerika Samoa, e tele avanoa e mafai ona ulufale atu ai e fai ma sui o le aoga a MVC i soo se ta’aloga,” o le saunoaga lea a Silvey.

O ta’aloga o loo mafai ona maua i ai avanoa mo fanau mai Amerika Samoa e aofia ai le football, volipolo, soka, basketball, si’isi’i u’amea mamafa, fusuaga ma le tenisi.

O avanoa e mafai ona ulufale atu ai soo se fanau aoga mai Amerika Samoa nei e a’otauina i totonu o le aoga a MVC, e tatau ona ausia togi maualuluga faatulagaina, ma ia lelei fo’i le ripoti i totonu o le aoga.

E le gata i avanoa e ta’aalo ai, ae maua fo’i le avanoa e a’otauina ai i le poto salalau ma faauu mai ai i faailoga tikeri ta’i 4 tausaga o loo mafai ona ofoina mai e le MVC.

Na taua e Silvey le matagofie o le latou feiloaiga ma fanau aoga faapea ai faiaoga ina ua latou asia aoga maualuluga eseese uma i le atunu’u e aofia ai ma le Kolisi Tu’ufa’atasi, ma ua sauni fo’i ni isi o fanau aoga e fa’atumu a latou pepa ina ia fa’ailoa atu ai tulaga uma e fa’atatau ia tei latou mo fa’amaumauga a le aoga.

O le aso Lulu o le vaiaso na te’a nei na faia ai se fonotaga faapitoa a le au malaga ma fanau o loo i ai le faanaunauga e fia ulufale i le MVC, atoa ai ma matua. O lea fonotaga sa usuia i le potu fono a le ASNOC i Tafuna.

Na taua e le ali’i faiaoga o le au football a MVC ia Troth e fa’apea, o ta’aloga o loo ofo atu e le latou aoga mo fanau aoga, o loo mafai fo’i ona tausinio ai tagata o le lalolagi i ta’aloga a le Olimipeka.

I lona talitonuga, o se avanoa lelei lea mo fanau aoga mai Amerika Samoa e ulufale atu ai i MVC ma amata loa ona fa’alautele lo latou iloa i ta’aloga eseese o loo agava’a ai i latou.

“O le agaga atoa lava o MVC, ia tu’u atu le avanoa mo fanau aoga a Amerika Samoa e ulufale atu ai MVC, ina ia matou fesoasoani i lau aoga atoa ai ma lau taleni. E tele mea e mafai ona fa’aaoga e te koleni ai mo le fa’aleleia o lau taleni, e le gata ina ia avea oe ma tagata taalo lelei, a ia fa’auu mai fo’i oe ma sau fa’ailoga e saili ai sou lumana’i,” o le saunoaga lea a Troth.

Na taua e le tama’ita’i Polofesa lagolago ia Mrs. Troth e fa’apea, o le aoga a MVC, o se nofoaga lelei lea ma talafeagai mo fanau aoga a Amerika Samoa.

E tusa ma le 1,500 fanau aoga o loo a’otauina i totonu o lea aoga, ma o loo a’oa’oina ai faailoga eseese tau tikeri e silia i le 30 mo le umi e 4 tausaga e te aoga ai.

Na taua e le susuga a Filiga Atonio, o se tama e 56 tausaga le matua mai Nuuuli e fa’apea, o se avanoa lelei lenei mo fanau aoga a le atunu’u o loo i ai le taleni e fa’alautele ai le iloa i soo se ta’aloga.

O le alo o Atonio e ta’alo i le au football a le aoga maualuga a Tafuna, ma o loo i ai le fa’anaunauga o lenei Tama ina ia maua se avanoa o lona atali’i e ulufale atu ai i MVC mo le fa’alauteleina o lana taleni.

“O lo’u fa’anaunauga atoa o lo o i ai, ia maua se lumana’i lelei o lo’u atali’i, ma maua sona avanoa e ulufale atu ai i aoga i Amerika e pei o MVC, e fa’alautele ai le taleni toe maua ai le avanoa e saili ai le lumana’i i le poto salalau,” o le saunoaga lea a Atonio.

Na taua e nisi o fanau sa auai i lenei fonotaga mulimuli ma le au malaga mai le aoga a MVC i le Samoa News e fa’apea, o nisi o faafitauli o loo fai ma lu’itau mo latou ma latou matua i mataupu faapenei, o le tulaga i le tupe e totogi ai le aoga.

“Ou te naunau e fa’alautele la’u taleni i le ta’aloga si’isi’i u’amea mamafa i se aoga i Amerika, peita’i o le fa’afitauli o le itu tau tupe, ae faafetai i le au malaga mai le aoga a le MVC, ua mafai ai ona maua mai lenei avanoa e tuuina atu ai la’u talosaga pe talia, ina ia ou ulufale atu ma aoga i totonu o le latou aoga i le lumana’i,” o le molimau lea a le ali’i o James Mapu.