Ads by Google Ads by Google

Tele atugaluga a vetereni o Amerika Samoa ua fa'ailoa


O le isi to'atele sa tofu maua avanoa lelei e fa'afesligia ai se fesoasoani a le afioga le Faipule i le Konekeresi Aumua Amata mo a latou mataupu na fa'aalia. [ata: Leua AIono Frost]

O nisi o mataupu sa fa'ailoa e fitafita tuai i le fonotaga ma le sui o Amerika Samoa Konekeresi, Aumua Amata, ina ia taumafai ona foe fa'aleleia, na muamua lava i le fa'atulagaina o latou talavai, soloia mai o latou talavai, le mae'a latou talavai ae ua toe fa'atonuina e toe taliu mai i Amerika Samoa, ma le malosi'aga o le Ofisa o Tautua mo Vetereni i Hawaii e soloia ma fetu'una'i ai latou talavai ma foma'i i Honolulu.

 

"O le taimi nei ua faigata ona matou toe gaoioi, a'o le taimi o le talavou ma le mataalia e fa'atino uma tiute e puipuia ai le Malo tele, sa fa'atino fa'ata'alise lava. O lea la ua o'o mai ina tali ni manuia e maua mai lenei tautua, ae ua fetu'una'i i matou fa'apenei. E le'i uma talavai ae ua toe vala'au atu, O oe e alu lava nei. Aisea ea e fa'apea ai ona fai o i matou? E tatau lava ona tu'u taimi se'i talafeagai ma matou tino ua matutua ma ua vaivai fo'i,” o se tasi o lea o  tala a se tasi o veterani.

 

O le sui lona lua sa sapaia lea mau ma avatua lona fanoga. "A fa'atulaga mai matou talavai, se fai ane se'i atoa se 2 vaiaso e nonofo ai ma fa'asolo ma le filemu talavai, ae le mana'o ia o atu matou i le aso tofi ae toe taliu mai i le aso Gafua, a leai fo'i ua o atu i le aso Gafua ae toe taliu mai i le aso Tofi. E le'i maua se manatu o le nofo ae toe feosofa'i, ae o lea fa'ato'a tulaueleele fo'i le va'alele latou. Ua matutua tagata, ua lelavava vave ma ua fa'afaigata ona feoa'i pei o le pulufana le alu."

 

Na fesiligia e se tasi o i latou le agava'a mo le Clothing Allowance sa mafai ona maua e i latou ua i ai afaina ogaoaga tumau. O lea fa'amanuiaga sa tatau ona maua mai aga'i i le masina o Novema, ae o lea ua o'o mai ia Ianuari 2019 e le'i maua lava. Ua saili atu, ua fa'ailoa mai, o lo'o taofia o lo'o faia suesuega.

 

Sa talosaga ali’i vetereni o Manu Talamoa, ia Aumua e talanoa i le vaega a le Veterans Evaluation Services, lea e fa'ato'ai uma i ai latou Claims, ina ia fa'avavevave a latou galuega, aua ua i ai nisi o Vetereni ua maliliu lava o fa'atali iuga o latou mataupu sa fa'aulu i lea vaega o le tautua mo Fitafita Tuai.

 

O nisi o fanoga o mataupu ma tautua mo Vetereni sa mana'omia ai e Rosie Lancaster o le Ofisa o le Veterans Affairs a le tatou malo, le fesoasoani a Aumua:

 

"O le totogia lea o pasese o Fitafita Tuai mai Manu'a e o'o mai ai i Tutuila nei ma malaga atu ai i Honolulu, o lo'o totogia lava e le Vetereni lona pasese lea. Peita'i e tatau lava ona totogia uma e le Ofisa o Tautua mo Vetereni uma nei pasese, aua o lo'o totogia fo'i pasese o Vetereni Hawaii mai Maui i Oahu mo a latou talavai. Ua fa'apea fo'i pasese o Vetereni mai Apia i Pago Pago nei e va'ai le foma'i a le VA iinei, o lo'o totogia fo'i e i latou. Ua le talafeagai lea fo'i faiga ma le tautuaina o isi vetereni ua leva o tali pea e i latou lea alamanuia."

 

Mataupu lona lua na fa'ailoa e Lancaster o le Inisiua o ali'i Vetereni, ua faia lava na'o le Vetereni e faia lana inisiua, ae ua leai se avanoa e inisiua ai e le lona to'alua ma le fanau i lenei fo'i vaitausaga. Ua talosagaina ina ia toe fa'aulu mai se Inisiua mo Vetereni ina ia gafatia e i latou ona faia latou Inisiua ma o latou aiga ma fanau.

 

Na fesiligia le pili a'oga mo Fitafita Tuai uma, tusa po'o le a le matua o i ai lona soifua, ae fia sailia se tikeri i si kosi ua naunau i ai, pe totogia latou pili a'oga e le G.I. Bill? O le tali - IOE.

 

I nogatupe mo Vetereni, sa fesiligia pe mafai ona pasia mai mo lou fanua fa'atau motu iinei ona fausia ai sona fale, ae fa'aaoga ai le faletupe o Atina'e a le tatou Malo, ina ia ave fo'i i le tatou nei malo le tupe maua mai ai. O le ala fo'i lea o le a mafai ai ona fesoasoani i le tatou lava malo i le tulaga o le tamaoaiga.

 

Ua fa'ailoa fo'i o le tele o nogatupe e fia faia ai fale nofo o tagata Vetereni ua le mafai ona pasia mai faletupe i fafo, ona o le tulaga o eleele e le o ni eleele tumaoti o le Vetereni ae o fanua tau aiga fa'asamoa.

 

O le tulaga o tagata Tausima'i lea e malaga ma le tagata Vetereni i ana talavai, o'o atu i Honolulu, taofia le Vetereni i le Falema'i, ae fa'atonu loa ma le Tausima'i e alu ese mai le potu o le faletalimalo. O fea a alu le tausima'i e fa'amautu i ai, o lea sa malaga atu lava ina ia fa'amautu i le faletalimalo? O lea fanoga e ao lava ina fa'asa'o, tuu pea lava le potu e fa'amautu i ai le tausima'i.

 

Tulaga o totogi o ta'avale e malaga mai ai le faletalimalo ma o e fai talavai. O isi falema'i e tu mamao mai le faletalimalo o nonofo ai, ae kolosi ala sili ona poloka, o le umi fo'i lea o le totogi o le ta'avale. E toe totogia mai e le VA pe a mae'a le talavai, ae totogi mai ua sili ma le tolu masina talu ona faia lena talavai.

 

O le tupe fo'i e totogi mo le tausami ai i Tripler, afai ua le tausami ai iina, e tatau ona e taulimaina se lisiti o sau tausamiga i so'o se fale'aiga sa e tausami ai, i le taimi o lau talavai ina ia toe fa'atupe mai ai lau tupe na fa'aalu i lau mea'ai.

 

Ua faailoa fo'i le latou fanoga, e tatala mai le faia o latou talavai i Niu Sila ma Ausetalia aua ua iloga mai e matua lelei fo'i le tausiga ma togafitiga o gasegase i falema'i i nei malo, ae latalata mai ma toe taugofie le pasese, ae ese ai fo'i e tele le tupe e maua ai pe a tala latou tala Amerika.

 

Ua fiafia Aumua Amata i lea mataupu, ma o le a taga'i toto'a i ai ma talosaga se suiga.

 

O le toe fanoga sili ona taua mo le afioga le Faipule, sa tula'i ai le susuga Togima'a Tuimavave, lea ua atoa nei le 30 tausaga talu ona mae'a lana tautua e 4 tausaga i le US Army, ae le o mafai ona lisia lona suafa i le lisi o fitafita tuai.

 

Ua fai si leva o taumafai lana talosaga lenei, peita'i o le tausaga ua te'a sa fa'ato'a maua mai ai se tala tusitusia ia te ia. Ua talosaga o ia ina ia mafai ona lisia lona suafa i le lisi o tagata Vetereni a le US Army ona fa'ato'a faia lea o lana talosaga atoatoa mo alamanuia.

 

Tula'i lea o Motusa Tuileama Nua ma ia fa'ailoa, "O le aotelega o nei fanoga ma atugaluga ua fa'aalia mo le afioga le Faipule e tagai ane i ai ma fesoasoani mai ai, o mea uma a nei e mafai e i tatou ona fa'atino, pe a sa'o le auala e faia ai e i latou, e le tau taga'i ma fai i ai se vaega a Aumua Amata. Peita'i e ala ona le mafai ona tatou faia, ona o lo tatou le'i galulue fa'atasi, tutu fa'atasi le tatou Asosi o Vetereni Amerika Samoa. E mafai lelei lava ona malosi le tatou finauga pe afai e auai fa'atasi uma i tatou ma loto e tasi e una'ia mataupu uma nei. E tatau ona mua'i mautu muamua le tatou Sosaiete i Amerika Samoa nei, ona fa'ato'a lelei fo'i lea o gaoioiga o tatou mataupu e fa'afinau a'i aga'i i fafo mo tatou alamanuia."

 

Fa'ailoa e Aumua, "E le fa'atali a'u se'i toe fa'atula'ia mautu lelei le Asosi a Vetereni, o le a taumafai pea ona fesilisili ma saili mai ni tali lelei mo nei fanoga ua folasia mo a'u, e aoga mai ai fo'i lou sui fa'atauva'a, ina ia tautuaina Vetereni Amerika Samoa, ou te alofa tele i ai, aua ua mae'a le latou tautua, e tatau ona tutusa lelei o latou fa'amanuiaga e maua, ma isi fo'i vetereni i setete ma isi teritori o le Malo tele."